Ama Bus Accidents: ରାଜଧାନୀରେ 'କିଲର୍ ବସ୍‌': ବେପରୁଆ ଡ୍ରାଇଭିଂ, ୩ ମାସରେ ହେଲାଣି ଏତିକି ଦୁର୍ଘଟଣା

ରାଜଧାନୀରେ ପୁଣି ଘାତକ ସାଜିଲା ଯାତ୍ରୀ ପରିବହନର ଲାଇଫଲାଇନ ସାଜିଥିବା ‘ଆମ ବସ୍’ । ଖଣ୍ଡଗିରି ଛକରେ 'ଆମ ବସ୍' ଧକ୍କାରେ ଜଣେ ବୃଦ୍ଧଙ୍କ ଜୀବନ ଯାଇଛି । ବାରମ୍ବାର ଦୁର୍ଘଟଣା ଘଟୁଥିବା ବେଳେ, ଏପଟେ କିନ୍ତୁ କ୍ରୁଟ ଓ ପୋଲିସର ସମସ୍ତ ପ୍ରୟାସ ବିଫଳ । ୩ ମାସରେ ୭୦ ଦୁର୍ଘଟଣା ପରେ ବି ବୋଲ ମାନୁନି "ଆମ ବସ୍" । ଗତକାଲି ଖଣ୍ଡଗିରି ଛକରେ ତୁମୁଳକାଣ୍ଡ ପରେ ଡ୍ରାଇଭର ଜଣଙ୍କୁ ଗିରଫ କରାଯାଇଥିବା ସୂଚନା ଦେଇଛନ୍ତି ଭୁବନେଶ୍ୱର ଡିସିପି ।

ରାଜଧାନୀ ଭୁବନେଶ୍ବରରେ ଆମ ବସ୍ ସାଜିଛି କିଲର୍ ବସ । ଗତକାଲି ପୁଣି ଏକ ମୁଣ୍ଡ ନେଇଛି ଆମ ବସ୍ । ଖଣ୍ଡଗିରି ଛକରେ ତ୍ରିନାଥ ବେହେରା ନାମଙ୍କ ଜଣେ ବ୍ୟକ୍ତିଙ୍କୁ ଦଳିଦେଇଛି । ଘଟଣାରେ ପୋଲିସ ନିଜ ଆଡୁ ଏକ ମାମଲା ରୁଜୁ କରି ସଂପୃକ୍ତ ଡ୍ରାଇଭରକୁ ଗିରଫ କରିଛି । ପୂର୍ବରୁ ପାତ୍ରପଡ଼ା ଓ ନନ୍ଦନକାନନ ଅଂଚଳରେ ଜୀବନ ନେଇ ଥିଲା ଆମ ବସ୍ । 

ଅଧିକ ପଢ଼ନ୍ତୁ: ରାକ୍ଷସ ପୁଅର ନାରକୀୟ କାଣ୍ଡ, ନିଶା ଖାଇବାକୁ ଟଙ୍କା ନ ମିଳିବାରୁ...

ବାରମ୍ବାର ଦୁର୍ଘଟଣା ଯୋଗୁଁ ଲୋକଙ୍କ ଅସନ୍ତୋଷ ବଢୁଥିବା ବେଳେ, କ୍ରୁଟ୍ କର୍ତ୍ତୃପକ୍ଷ ବିଭିନ୍ନ ପଦକ୍ଷେପ ନେଇଥିଲେ । ମାତ୍ର ଦୁର୍ଘଟଣା ଥମିବାର ନାଁ ନେଉନି । ଏମିତି ବେପରୁଆ ଗାଡ଼ି ଚାଳନା ପାଇଁ ୧୮ ଜଣ ଡ୍ରାଇଭରଙ୍କୁ ନିଲମ୍ବନ କରାଯାଇଥିଲେ ମଧ୍ୟ ସୁଫଳ ମିଳିନି । ପୂର୍ବରୁ ଆମ ବସ ଡ୍ରାଇଭରଙ୍କୁ ଗାଡି ଚାଳନା ଟ୍ରେନିଂ ଦେଇଥିଲା ପୋଲିସ । ସୁରକ୍ଷିତ ଚାଳନା ପାଇଁ ସ୍ପିଡ୍ ଗଭର୍ଣ୍ଣାନସର ବି ବ୍ୟବସ୍ଥା ରହିଛି । ହେଲେ ବାରମ୍ବାର ଦୁର୍ଘଟଣା ପ୍ରମାଣିତ କରୁଛି ଯେ, ସବୁ ଯେମିତି ଫୁସ୍ ।

ସ୍ଥିତି ଏପରି ହୋଇଛି ଯେ, ବାରମ୍ବାର ଦୁର୍ଘଟଣା ଘଟାଉଥିବା ମୋ ବସକୁ ଦେଖିଲେ ଛାନିଆ ହୋଇପଡୁଛନ୍ତି ରାଜଧାନୀ ବାସିନ୍ଦା । ଡ୍ରାଇଭରଙ୍କ ମଦ୍ୟପାନ ଅଭ୍ୟାସ, ମାନସିକ ଦୁଶ୍ଚିନ୍ତା, କାର୍ଯ୍ୟ ସମୟସୀମା, ଦକ୍ଷ ଓ ଅଭିଜ୍ଞ ଡ୍ରାଇଭର ଅଭାବ କଥାକୁ ପୂର୍ବରୁ ଦାୟୀ କରାଯାଇଥିଲା । ପରେ କ୍ରୁଟ କର୍ତ୍ତୃପକ୍ଷ ଓ ପୋଲିସ ତତ୍ପର ହୋଇ ବିଭିନ୍ନ ନିୟମାବଳୀ କରିଥିଲେ । 

ସହର ମଧ୍ୟରେ ସର୍ବାଧିକ ୪୦ କିମି ଓ ସହର ବାହାରେ ୫୦ କିମି ବେଗରେ ବସ୍ ଚାଳନା ପାଇଁ ନିର୍ଦ୍ଦେଶ ରହିଥିଲା । ଏପରକି ବ୍ୟାଟେରିଚାଳିତ ବସର ବେଗ ୩୫ କିମି ରଖିବାକୁ ନିୟମ ରହିଛି । ସବୁ ଡିପୋ ମାନଙ୍କରେ ବ୍ରିଥ ଆନାଲାଇଜର ବ୍ୟବସ୍ଥା ରହିଛି । ଗାଡି ଛାଡିବା ପୂର୍ବରୁ ଚାଳକମାନେ ମଦ୍ୟପାନ କରିଛନ୍ତି ନା ନାହିଁ ପରୀକ୍ଷା ବି କରାଯାଉଛି । ଏସବୁ ସତ୍ତ୍ବେ ବି ଦୁର୍ଘଟଣା କମିବ କ'ଣ ବଢିଚାଲିଛି । ହେଲେ ଏ ସଂପର୍କରେ ମୁହଁ ଖୋଲୁନାହାନ୍ତି କ୍ରୁଟ କର୍ତ୍ତୃପକ୍ଷ । 

ଅଧିକ ପଢ଼ନ୍ତୁ: ବିଜେଡି ବିଧାୟକଙ୍କ ବଡ଼ ବୟାନ; କହିଲେ, ବିଜେଡିକୁ ବିଶୃଙ୍ଖଳିତ କରିବା ପାଇଁ ଦଳ ଭିତରେ ହେଉଛି ପ୍ରୟାସ