How Rural Workers Get Paid: ୧୨୫ ଦିନ କାମ ଦେବାକୁ ଗ୍ୟାରେଣ୍ଟି , ବେକାରୀ ଭତ୍ତା ମିଳିବା ନେଇ ପ୍ରସ୍ତାବ

ବଦଳିଲା MGNREGA । ଆସିଲା VB G RAM G ବିଲ୍ । ଏଣିକି ଆଉ ଜବ୍ କାର୍ଡରେ ମିଳିବନି ନିଯୁକ୍ତି । ସରକାର  ଦେବେ ଗ୍ରାମୀଣ ନିଯୁକ୍ତି ଗ୍ୟାରେଣ୍ଟି କାର୍ଡ ।  ମହାତ୍ମା ଗାନ୍ଧି ଜାତୀୟ ଗ୍ରାମୀଣ ନିଶ୍ଚିତ ରୋଜଗାର ଯୋଜନା ବଦଳରେ ସଂସଦରେ ଆଗତ ହୋଇଛି ବିକଶିତ ଭାରତ ଗ୍ୟାରେଣ୍ଟି ଫର ରୋଜଗାର ଆଣ୍ଡ ଆଜୀବିକା ମିଶନ ବିଲ । ଦୁଇ ଦଶନ୍ଧି ଧରି ଗ୍ରାମାଞ୍ଚଳରେ ନିଯୁକ୍ତି ପ୍ରଦାନ କରୁଥିବା କେନ୍ଦ୍ର ସରକାରଙ୍କ ମନରେଗା ଆଇନର ନାମ ପରିବର୍ତ୍ତନ କରିବା ପାଇଁ ପ୍ରସ୍ତାବ ଦିଆଯାଇଥିବା ବେଳେ ଏବେ ଏନେଇ ପ୍ରସ୍ତୁତି ଚାଲିଛି । ବିକଶିତ ଭାରତ ୨୦୪୭ର ଲକ୍ଷ୍ୟ ପୂରଣ ପାଇଁ ନୂଆ ବିଲ VB G RAM G ଆସିବ ବୋଲି ସରକାରଙ୍କ ପକ୍ଷରୁ ସୂଚନା ଦିଆଯାଇଛି । ୨୦୦୫ରେ ତତ୍କାଳୀନ ୟୁପିଏ ସରକାର MGNREGA ଯୋଜନା ଆଣିଥିଲେ । ଏଥିରେ ଗ୍ରାମାଞ୍ଚଳରେ ୧୦୦ ଦିନର କାମ ପାଇଁ ଗ୍ୟାରେଣ୍ଟି ଦିଆଯାଇଥିଲା । ଏହା ୨୦ ବର୍ଷ ଧରି ଚାଲିଆସିଛି । ତେବେ ନୂଆ ବିଲରେ କ’ଣ ପରିବର୍ତ୍ତନ ହୋଇଛି ଆସନ୍ତୁ ଜାଣିବା । 

ନୂଆ ବିଲ୍ VB G RAM Gରେ ୧୦୦ ଦିନ କାମ ବଦଳରେ ୧୨୫ ଦିନ କାମ ଦେବାକୁ ଗ୍ୟାରେଣ୍ଟି ଦିଆଯିବାକୁ ପ୍ରସ୍ତାବ ରହିଛି । କାମ ସରିବାର ସପ୍ତାହେ କିମ୍ବା ୧୫ ଦିନ ଭିତରେ ଶ୍ରମିକଙ୍କୁ ମଜୁରି ଦିଆଯିବ । ଯଦି ମଜୁରି ଡେଡଲାଇନ ଭିତରେ ଦିଆଯାଇପାରିବ ନାହିଁ ତେବେ ସଂପୃକ୍ତ ଶ୍ରମିକଙ୍କୁ ବେକାରୀ ଭତ୍ତା ମିଳିବା ନେଇ ପ୍ରସ୍ତାବ ରହିଛି । ଏହି ନୂଆ ସ୍କିମରେ କାର୍ଯ୍ୟକୁ ୪ ଭାଗରେ ବିଭକ୍ତ କରାଯାଇଛି । ସେଗୁଡ଼ିକ ହେଲା ଜଳ ସୁରକ୍ଷା, ଗ୍ରାମୀଣ ଭିତ୍ତିଭୂମି, ଜୀବିକା ଭିତ୍ତିଭୂମି ଓ ବିପର୍ଯ୍ୟୟ ପୁନଃ ନିର୍ମାଣ । ତେବେ ଚାଷବାସ ଅମଳ ସମୟରେ ଗ୍ରାମୀଣ ଆଞ୍ଚଳରେ ଲୋକେ ବ୍ୟସ୍ତ ଥିବା ବେଳେ ଏହି VB G RAM G ସ୍କିମର କାର୍ଯ୍ୟ ଲାଗୁ ହେବ ନାହିଁ । ରାଜ୍ୟଗୁଡ଼ିକୁ 60 ଦିନ ପାଇଁ କାମ ସ୍ଥଗିତ ରଖିବାକୁ ଅନୁମତି ଦିଆଯିବ ଯାହା ଦ୍ୱାରା ଶ୍ରମିକମାନେ ଚାଷ କାର୍ଯ୍ୟରେ ଯୋଗଦାନ ଦେଇପାରିବେ । ସରକାରଙ୍କ ଅନୁଯାୟୀ, ଏହି ଯୋଜନା କେବଳ ନିଯୁକ୍ତି ପ୍ରଦାନ କରିବ ତାହା ନୁହେଁ ବରଂ ଗ୍ରାମାଞ୍ଚଳରେ ପକ୍କା ରାସ୍ତା ଏବଂ ଭିତ୍ତିଭୂମି ନିର୍ମାଣ କରିବା ପାଇଁ ମଧ୍ୟ ଲକ୍ଷ୍ୟ ରଖିଛି । କୁହାଯାଉଛି ଯେ ଏହି ଯୋଜନା କେବଳ ଗ୍ରାମାଞ୍ଚଳ ଶ୍ରମିକଙ୍କୁ ନୁହେଁ ବରଂ ଚାଷୀମାନଙ୍କୁ ମଧ୍ୟ ଲାଭ ଦେବ । ସ୍ବଚ୍ଛତା ରକ୍ଷା ପାଇଁ ବାୟୋମେଟ୍ରିକ୍ ଓ ଜିଓଟ୍ୟାଗିଂ ବ୍ୟବହାର ହେବ । ଏହି ସ୍କିମରେ ଶ୍ରମିକଙ୍କ ସମସ୍ୟା ଶୁଣାଣି ପାଇଁ ମଧ୍ୟ ବିଭିନ୍ନ ସ୍ତରରେ ବ୍ୟବସ୍ଥା ରହିବ । ଏବେ ଜାଣିବା ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ଖର୍ଚ୍ଚ ପରିବହନ ସମ୍ପର୍କରେ । 

MGNREGAରେ ଅଣକୁଶଳୀ ଶ୍ରମିକଙ୍କ ୧୦୦ ପ୍ରତିଶତ ମଜୁରି କେନ୍ଦ୍ର ବହନ କରୁଥିବା ବେଳେ କୁଶଳୀ ଶ୍ରମିକ ବ୍ୟବହାର ହେଲେ କିଛି ପରିମାଣର ଖର୍ଚ୍ଚ ରାଜ୍ୟ ସରକାର ବହନ କରିଥାନ୍ତି। ତେବେ G Ram G schemeରେ କେନ୍ଦ୍ର ୬୦ ପ୍ରତିଶତ ଓ କିଛି ରାଜ୍ୟ ୪୦ ପ୍ରତିଶତ ଖର୍ଚ୍ଚ ବହନ କରିବେ । ତେବେ ଉତ୍ତର ପୂର୍ବ ଓ ହିମାଳୟ ଅଞ୍ଚଳରେ ଥିବା ରାଜ୍ୟରେ ୯୦ ପ୍ରତିଶତ କେନ୍ଦ୍ର ଓ ୧୦ ପ୍ରତିଶତ ରାଜ୍ୟ ସରକାର ଖର୍ଚ୍ଚ ବହନ କରିବେ । ସେହିପରି କେନ୍ଦ୍ର ଶାସିତ ଅଞ୍ଚଳରେ କେନ୍ଦ୍ର ସରକାର ଶତ ପ୍ରତିଶତ ଖର୍ଚ୍ଚ ବହନ କରିବେ । ବାର୍ଷିକ ଏହି ଯୋଜନା ପାଇଁ ୧ ଲକ୍ଷ ୫୧ ହଜାର କୋଟି ଖର୍ଚ୍ଚ ପାଇଁ ପ୍ରସ୍ତାବ ଥିବା ବେଳେ ଏଥିରୁ ୯୫ ହଜାର ୬୯୨ କୋଟି କେନ୍ଦ୍ର ସରକାର ବହନ କରିବେ । 

ମନରେଗା ଜବ୍ କାର୍ଡ ନିଯୁକ୍ତି ପ୍ରଦାନ କରିବ ନାହିଁ । ଏହି ଯୋଜନା ଅଧୀନରେ, କେବଳ ନାମ ପରିବର୍ତ୍ତନ ହେବ ତାହା, ବରଂ ଅନେକ ନିର୍ଦ୍ଦେଶାବଳୀ ମଧ୍ୟ ପରିବର୍ତ୍ତନ ହେବ । ଉଦାହରଣ ସ୍ୱରୂପ, 100 ଦିନ ପରିବର୍ତ୍ତେ 125 ଦିନ ପାଇଁ ନିଯୁକ୍ତି ସୁନିଶ୍ଚିତ କରାଯିବ। ଗ୍ରାମ ପଞ୍ଚାୟତଗୁଡ଼ିକ ନିଜେ "ବିକଶିତ ଗ୍ରାମ ପଞ୍ଚାୟତ ଯୋଜନା" ତିଆରି କରିବେ । ଏପର୍ଯ୍ୟନ୍ତ, ମନରେଗାରେ ଯୋଗଦେବା ପାଇଁ ଶ୍ରମିକମାନଙ୍କୁ ଏକ ଜବ୍ କାର୍ଡ ପାଇବାକୁ ପଡୁଥିଲା । କିନ୍ତୁ ବର୍ତ୍ତମାନ, ଏହି କାର୍ଡ ଆଉ ନିଯୁକ୍ତି ପ୍ରଦାନ କରିବ ନାହିଁ । ଏଥିପାଇଁ, ଶ୍ରମିକମାନଙ୍କୁ ଏକ ଗ୍ରାମୀଣ ନିଯୁକ୍ତି ଗ୍ୟାରେଣ୍ଟି କାର୍ଡ ହାସଲ କରିବାକୁ ପଡିବ, ଯାହା ସେମାନଙ୍କ ନିଯୁକ୍ତିର ଆଧାର ହେବ ।

ତେବେ ଗ୍ରାମୀଣ ନିଯୁକ୍ତି ଗ୍ୟାରେଣ୍ଟି କାର୍ଡ କିପରି ପାଇବେ ? ୧୮ ବର୍ଷରୁ ଅଧିକ ବୟସର ଗ୍ରାମୀଣ ପରିବାରର ଯେକୌଣସି ସଦସ୍ୟ ଗ୍ରାମୀଣ ନିଯୁକ୍ତି ଗ୍ୟାରେଣ୍ଟି କାର୍ଡ ପାଇଁ ଆବେଦନ କରିପାରିବେ । ଆଗ୍ରହୀ ବ୍ୟକ୍ତିମାନଙ୍କୁ ଗ୍ରାମ ପଞ୍ଚାୟତ କାର୍ଯ୍ୟାଳୟକୁ ଯାଇ ସେମାନଙ୍କର ନାମ, ବୟସ ଏବଂ ଠିକଣା ପଞ୍ଜୀକରଣ କରିବାକୁ ପଡିବ ।

ଗ୍ରାମୀଣ ନିଯୁକ୍ତି ଗ୍ୟାରେଣ୍ଟି କାର୍ଡ ପାଇଁ କେଉଁ ଡକ୍ୟୁମେଣ୍ଟ ଆବଶ୍ୟକ? ଗ୍ରାମୀଣ ନିଯୁକ୍ତି ଗ୍ୟାରେଣ୍ଟି କାର୍ଡ ପାଇବା ପାଇଁ, ଆପଣଙ୍କୁ ଏକ ଆଧାର କାର୍ଡ ଏବଂ ଆପଣ ରହୁଥିବା ଗାଁର ଠିକଣା ସହିତ ବାସସ୍ଥାନର ପ୍ରମାଣପତ୍ର ଆବଶ୍ୟକ ହେବ। ଏହା ସହିତ, ଆପଣଙ୍କୁ ଏକ ବୟସ ପ୍ରମାଣପତ୍ର ଏବଂ ବ୍ୟାଙ୍କ ଆକାଉଣ୍ଟ ନମ୍ବର ପ୍ରଦାନ କରିବାକୁ ପଡିବ। କାର୍ଡ ପାଇବା ପାଇଁ ଆପଣଙ୍କୁ eKYC ପ୍ରକ୍ରିୟା ଦେଇ ଯିବାକୁ ପଡ଼ିପାରେ ।

ସବୁଠୁ ବଡ଼ କଥା ଜି ରାମ୍ ଜୀ ଯୋଜନା ଅଧୀନରେ କେଉଁ ମାନଙ୍କ ପାଇଁ ସ୍ୱତନ୍ତ୍ର କାର୍ଡ ତିଆରି କରାଯିବ, ଆସନ୍ତୁ ଜାଣିବା । ଦର୍ଶକବନ୍ଧୁ, ଭିବି-ଜି ରାମ୍ ଜୀ ଯୋଜନା ଅଧୀନରେ ଏକ ସ୍ୱତନ୍ତ୍ର ଜବ୍ କାର୍ଡ ତିଆରି କରାଯିବ । ଏକାକୀ ମହିଳା, ଅର୍ଥାତ୍ ଏକାକୀ ରହୁଥିବା ମହିଳାମାନଙ୍କୁ ସ୍ୱତନ୍ତ୍ର ଗ୍ରାମୀଣ ନିଯୁକ୍ତି ଗ୍ୟାରେଣ୍ଟି କାର୍ଡ ପ୍ରଦାନ କରାଯିବ । ଏହା ସହିତ, ଭିନ୍ନକ୍ଷମ ବ୍ୟକ୍ତି, 60 ବର୍ଷରୁ ଅଧିକ ବୟସ୍କ ବ୍ୟକ୍ତି, ଟ୍ରାନ୍ସଜେଣ୍ଡର ବ୍ୟକ୍ତି ଏବଂ କିଛି ଜନଜାତିର ବ୍ୟକ୍ତିମାନେ ମଧ୍ୟ ଏହି ସ୍ୱତନ୍ତ୍ର କାର୍ଡ ପାଇପାରିବେ । ଏହି ସ୍ୱତନ୍ତ୍ର କାର୍ଡର ରଙ୍ଗ ଅନ୍ୟ ଜବ୍ କାର୍ଡଠାରୁ ଭିନ୍ନ ହେବ ।