Romeo Lane’s Saurav Luthra: ରୋମିଓ ଲେନର ବିର୍ଚର ମାଲିକ ସୌରଭ ଲୁଥ୍ରା, ସ୍ୱର୍ଣ୍ଣ ପଦକ ବିଜେତା ଇଞ୍ଜିନିୟରରୁ ହୋଇଥିଲେ ହୋଟେଲ୍ ବ୍ୟବସାୟୀ

ଗୋଆର ଏକ ନାଇଟ୍ କ୍ଲବରେ ଅଗ୍ନିକାଣ୍ଡ ଘଟି ପାଞ୍ଚ ଜଣ ପର୍ଯ୍ୟଟକଙ୍କ ସମେତ ୨୫ ଜଣଙ୍କର ମୃତ୍ୟୁ ହୋଇଛି। ଯେଉଁ କ୍ଲବରେ ଅଗ୍ନିକାଣ୍ଡ ଘଟିଥିଲା ତାହାର ନାମ "ବିର୍ଚ ବାଇ ରୋମିଓ ଲେନ୍" । କୁହାଯାଉଛି ଯେ କ୍ଲବ ପରିଚାଳନାରେ ଅନେକ ନିୟମକୁ ଅଣଦେଖା କରାଯାଇଥିଲା। ପୋଲିସ ଏହି ମାମଲାରେ ଚାରି ଜଣ କ୍ଲବ ପରିଚାଳକଙ୍କୁ ଗିରଫ କରିଛି।

ପୋଲିସ ଏହାର ମାଲିକ ସୌରଭ ଲୁଥ୍ରା ଏବଂ ଗୌରବ ଲୁଥ୍ରାଙ୍କୁ ମଧ୍ୟ ଖୋଜୁଛି, ସେମାନେ ଉଭୟ ଦିଲ୍ଲୀର ବାସିନ୍ଦା। ସେମାନଙ୍କୁ ଗିରଫ କରିବା ପାଇଁ ପୋଲିସ ଟିମ୍ ଦିଲ୍ଲୀରେ ପହଞ୍ଚିଛନ୍ତି। ଏହି ଅଗ୍ନିକାଣ୍ଡ ପରେ ଚର୍ଚ୍ଚାକୁ ଆସିଥିବା ସୌରଭ ଲୁଥ୍ରା ହୋଟେଲ ବ୍ୟବସାୟୀ ହେବା ପଛରେ ରହିଛି ଏକ କାହାଣୀ । 

'ରୋମିଓ ଲେନ୍'ର କାହାଣୀ

ରୋମିଓ ଲେନର ୱେବସାଇଟ୍ ଅନୁଯାୟୀ, ଏହାର ଅଧ୍ୟକ୍ଷ ସୌରଭ ଲୁଥ୍ରା ଜଣେ ସ୍ୱର୍ଣ୍ଣ ପଦକ ବିଜେତା ଇଞ୍ଜିନିୟର। ଇଞ୍ଜିନିୟରିଂ ଛାଡି ହସ୍ପିଟାଲିଟି ବ୍ୟବସାୟରେ ପ୍ରବେଶ କରିଥିଲେ । ସୌରଭ ଲୁଥ୍ରା ୨୦୧୬ ରେ ରୋମିଓ ଲେନ୍ ଆରମ୍ଭ କରିଥିଲେ। ସେବେଠାରୁ ସେ କେବେ ପଛକୁ ଫେରି ଚାହିଁ ନାହାନ୍ତି। କମ୍ପାନୀର ୱେବସାଇଟ୍ ଅନୁଯାୟୀ, ରୋମିଓ ଲେନ୍ର ବର୍ତ୍ତମାନ ୨୨ଟି ସହର ଏବଂ ୪ଟି ଦେଶରେ ରେଷ୍ଟୁରାଣ୍ଟ, ବାର୍ ଏବଂ ରିସର୍ଟ ଅଛି।

କମ୍ପାନୀର ୱେବସାଇଟ୍ ସୌରଭ ଲୁଥ୍ରାଙ୍କୁ ରୋମିଓ ଲେନ୍, ବିର୍ଚ ଏବଂ ମାମାସ୍ ବୁଓଇର ଅଧ୍ୟକ୍ଷ ବୋଲି ଦର୍ଶାଇଛି। ତାଙ୍କର ବ୍ୟାପକ ବ୍ୟବସାୟ ବିସ୍ତାର ପାଇଁ ସୌରଭ ଲୁଥ୍ରାଙ୍କୁ ଅନେକ ସ୍ୱୀକୃତି ଓ ସମ୍ମାନ ମିଳିଛି। ଗୌରବ ଲୁଥ୍ରା, ଯାହାଙ୍କ ବିରୁଦ୍ଧରେ ଗୋଆରେ ଏକ ଏଫଆଇଆର ଦାୟର କରାଯାଇଛି, ସେ ହେଉଛନ୍ତି ସୌରଭ ଲୁଥ୍ରାଙ୍କ ଭାଇ। 

ମାତ୍ର ଦୁଇ ସପ୍ତାହ ପୂର୍ବରୁ ଏକ ଅନ୍ତର୍ଜାତୀୟ ବ୍ୟବସାୟ ଏବଂ ଶିଳ୍ପ ପତ୍ରିକା, ଫୋର୍ବସ୍ ଇଣ୍ଡିଆ, ଚଳିତ ବର୍ଷ ନଭେମ୍ବର ୧୭ ତାରିଖରେ ସୌରଭ ଲୁଥ୍ରାଙ୍କ ଏକ ପୂର୍ଣ୍ଣ ପୃଷ୍ଠା ପ୍ରୋଫାଇଲ୍ ପ୍ରକାଶ କରିଥିଲା । ସେଥିରେ ତାଙ୍କୁ ଭାରତରେ ଭୋଜନ ଏବଂ ନାଇଟ୍ ଲାଇଫ୍ ସଂସ୍କୃତିରେ ବିପ୍ଳବ ଆଣିଥିବା ଜଣେ ବ୍ୟକ୍ତି ଭାବରେ ବର୍ଣ୍ଣନା କରାଯାଇଥିଲା। ସୌରଭ ଲୁଥ୍ରା ମଧ୍ୟ ଏହି ପ୍ରୋଫାଇଲ୍ ତାଙ୍କ ଇନଷ୍ଟାଗ୍ରାମରେ ସେୟାର କରିଥିଲେ। 

ଶନିବାର ବିଳମ୍ବିତ ରାତିରେ ଏହି ଘଟଣା ପରେ ସୋମବାର ସୌରଭ ଲୁଥ୍ରା ନିଜର ନୀରବତା ଭାଙ୍ଗିଛନ୍ତି। ସୋସିଆଲ ମିଡିଆ ସାଇଟ୍ ଇନଷ୍ଟାଗ୍ରାମରେ ଏକ ପୋଷ୍ଟରେ ସେ କହିଛନ୍ତି, "ଏହି ଘଟଣା ପାଇଁ ପରିଚାଳନା ଗଭୀର ଦୁଃଖ ପ୍ରକାଶ କରୁଛି। ବିର୍ଚରେ ଘଟିଥିବା ଦୁର୍ଭାଗ୍ୟଜନକ ଘଟଣା ଯୋଗୁଁ ଜୀବନ ଏବଂ ସମ୍ପତ୍ତିର ଦୁଃଖଦ କ୍ଷତି ପାଇଁ ଆମେ ଗଭୀର ଦୁଃଖିତ।" ସୌରଭ ଘଟଣାର ପୀଡିତମାନଙ୍କୁ ସମସ୍ତ ପ୍ରକାରର ସହାୟତା, ସମର୍ଥନ ଏବଂ ସହଯୋଗର ଆଶ୍ୱାସନା ଦେଇଛନ୍ତି।

'ରୋମିଓ ଲେନ୍'ରେ ଆଉ ଦୁଇଟି ସମ୍ପତ୍ତି ସିଲ୍

ଶନିବାର ଦିନ ପ୍ରାୟ ୧୨ଟା ସମୟରେ ଉତ୍ତର ଗୋଆର ଆରପୋରାରେ ଥିବା "ବିର୍ଚ ବାଇ ରୋମିଓ ଲେନ୍" ନାଇଟ୍ କ୍ଲବ୍ରେ ଅଗ୍ନିକାଣ୍ଡ ଘଟି ୨୫ ଜଣଙ୍କର ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ୨୦ ଜଣ କ୍ଲବ୍ କର୍ମଚାରୀ ଏବଂ ୫ ଜଣ ପର୍ଯ୍ୟଟକ ଅଛନ୍ତି। ଏହି ଘଟଣାରେ ପୋଲିସ କ୍ଲବ୍ର ମୁଖ୍ୟ ମହାପ୍ରବନ୍ଧକ ରାଜୀବ ମୋଦକ, ମହାପ୍ରବନ୍ଧକ ବିବେକ ସିଂହ, ବାର ପରିଚାଳକ ରାଜୀବ ସିଂଘାନିଆ ଏବଂ ଗେଟ୍ ପରିଚାଳକ ରିୟାଂଶୁ ଠାକୁରଙ୍କୁ ଗିରଫ କରିଛି। 

'ବିର୍ଚ ବାଏ ରୋମିଓ ଲେନ୍' ନାଇଟ୍ କ୍ଲବ୍କୁ ୨୦୨୩ ମସିହାରେ ଆରପୋରା-ନାଗୋଆ ପଞ୍ଚାୟତ ଦ୍ୱାରା କାର୍ଯ୍ୟ ଆରମ୍ଭ କରିବାକୁ ଅନୁମତି ଦିଆଯାଇଥିଲା, ଯାହା କ୍ଲବ୍କୁ ଏକ ବ୍ୟବସାୟ ଲାଇସେନ୍ସ ପ୍ରଦାନ କରିଥିଲା। ଅଗ୍ନିକାଣ୍ଡ ପରେ କର୍ତ୍ତୃପକ୍ଷ ଗୋଆରେ କମ୍ପାନୀର ମାଲିକାନା ଥିବା ଅନ୍ୟ ଦୁଇଟି ସମ୍ପତ୍ତିକୁ ମଧ୍ୟ ସିଲ୍ କରିଛନ୍ତି। ସିଲ୍ ହୋଇଥିବା ସମ୍ପତ୍ତି ମଧ୍ୟରେ ଭାଗାଟରରେ ଏକ ବିଚ୍ କାଫେ ଏବଂ 'ରୋମିଓ ଲେନ୍' ଶୃଙ୍ଖଳାର ଅଂଶ ଆସଗାଓଁରେ ଏକ କ୍ଲବ୍ ଅନ୍ତର୍ଭୁକ୍ତ।

ଗୋଆ ମୁଖ୍ୟମନ୍ତ୍ରୀ ପ୍ରମୋଦ ସାୱନ୍ତ ରବିବାର ଏହି ଘଟଣାର ମାଜିଷ୍ଟ୍ରେଟ୍ ତଦନ୍ତ ନିର୍ଦ୍ଦେଶ ଦେଇଛନ୍ତି। ଅଧିକାରୀମାନେ କହିଛନ୍ତି ଯେ "ବିର୍ଚ ବାଏ ରୋମିଓ ଲେନ୍" ନାଇଟ୍ କ୍ଲବ୍ରେ ଅଗ୍ନିକାଣ୍ଡର କାରଣ ଆତସବାଜି ହୋଇପାରେ। ସେମାନେ ଏହା ମଧ୍ୟ କହିଛନ୍ତି ଯେ କ୍ଲବ୍ରେ ଅଗ୍ନିଶମ ବିଭାଗର ଏନଓସି ନଥିଲା।