Assassination Threat Looms Over: ଇରାନର ପରବର୍ତ୍ତୀ ସର୍ବୋଚ୍ଚ ନେତାଙ୍କୁ ହତ୍ୟା ଧମକ, ଇସ୍ରାଏଲ ଖାମେନେଇଙ୍କ ପୁଅକୁ ବି କଲା ଟାର୍ଗେଟ

ଇସ୍ରାଏଲର ପ୍ରତିରକ୍ଷା ମନ୍ତ୍ରୀ ଇସ୍ରାଏଲ କାଟ୍ଜ ଇରାନର ନୂତନ ସର୍ବୋଚ୍ଚ ନେତା ପଦ ଗ୍ରହଣ କଲେ ତାଙ୍କୁ ହତ୍ୟା କରାଯିବ ବୋଲି ଧମକ ଦେଇଛନ୍ତି। ଆମେରିକା-ଇସ୍ରାଏଲ ଆକ୍ରମଣରେ ପ୍ରାଣ ହରାଇଥିବା ଅଲ୍ଲୀ ଖାମେନେଇଙ୍କ ପୁଅ ମୋଜତାବା ଖାମେନେଇଙ୍କୁ ପରବର୍ତ୍ତୀ ସର୍ବୋଚ୍ଚ ନେତା ଭାବରେ ବାଛିବା ନେଇ ଗଣମାଧ୍ୟମ ରିପୋର୍ଟ ମଧ୍ୟରେ ଏହି ଧମକ ଦିଆଯାଇଛି। 

ସୋସିଆଲ ମିଡିଆ ପ୍ଲାଟଫର୍ମ X ରେ ଏକ କଡ଼ା ଶବ୍ଦରେ ପୋଷ୍ଟ କରି କାଟ୍ଜ କହିଛନ୍ତି: "ଯେକୌଣସି ନେତା ଯିଏ ଇରାନର ଆତଙ୍କବାଦୀ ଶାସନର ନେତୃତ୍ୱ ନେବାକୁ ଆସି ଇସ୍ରାଏଲକୁ ଧ୍ୱଂସ କରିବା ଯୋଜନାରେ ରହିବ, ଆମେରିକାକୁ ଧମକ ଦେବ ଓ ଇରାନ ଲୋକଙ୍କୁ ଦମନ କରିବା ପାଇଁ ଯୋଜନା ଜାରି ରଖିବ, ତାକୁ ନିପାତ କରିବା ଆମର ଏକ ସ୍ପଷ୍ଟ ଲକ୍ଷ୍ୟ ହେବ।"
କାଟଜ୍ ହିବ୍ରୁ ଭାଷାରେ ଆହୁରି ଲେଖିଛନ୍ତି: "ତାଙ୍କର ନାମ ଯାହା ହେଉ ଏବଂ ସେ ଯେଉଁଠାରେ ଲୁଚି ରହିଥାଆନ୍ତୁ।"

ନୂତନ ସରକାର ଚାହୁଁଛି ଇସ୍ରାଏଲ୍

ସେ କହିଛନ୍ତି ଯେ ସେ ପ୍ରଧାନମନ୍ତ୍ରୀ ଏବଂ ଇସ୍ରାଏଲ ପ୍ରତିରକ୍ଷା ବାହିନୀ (IDF)କୁ ଏହି ମିଶନକୁ ସଫଳ କରିବା ପାଇଁ ସବୁ ପ୍ରକାର କାର୍ଯ୍ୟ କରିବାକୁ ନିର୍ଦ୍ଦେଶ ଦେଇଛନ୍ତି । ଏହା ଇସ୍ରାଏଲର ଅପରେସନ ରୋରିଂ ଲାୟନ ଉଦ୍ଦେଶ୍ୟର ଏକ ଅଂଶ। ସେ ଆହୁରି ମଧ୍ୟ କହିଛନ୍ତି: ଆମେ ଏହି ଶାସନର ଶକ୍ତି ଭାଙ୍ଗିବା ପାଇଁ ଆମର ସମସ୍ତ ଆମେରିକୀୟ ଅଂଶୀଦାରଙ୍କ ସହିତ କାମ କରିବୁ ଏବଂ ଇରାନର ଲୋକମାନଙ୍କୁ ଏହାକୁ ଭାଙ୍ଗି ଏକ ନୂତନ ସରକାର ଗଠନ କରିବା ପାଇଁ ପରିସ୍ଥିତି ସୃଷ୍ଟି କରିବୁ।

ଏହା ଉଲ୍ଲେଖ କରିବା ଉଚିତ ଯେ ଫେବୃଆରୀ 28 ତାରିଖରେ ଆମେରିକା ଏବଂ ଇସ୍ରାଏଲ ଇରାନ ବିରୁଦ୍ଧରେ ଆକ୍ରମଣ ଆରମ୍ଭ କରିଥିବା ସମୟରେ ଅଲି ଖାମେନେଇଙ୍କ ମୃତ୍ୟୁ ହୋଇଥିଲା। ତାଙ୍କ ଝିଅ, ଜ୍ୱାଇଁ ଏବଂ ନାତୁଣୀ ମଧ୍ୟ ଏହି ଆକ୍ରମଣରେ ପ୍ରାଣ ହରାଇଥିଲେ। ତାଙ୍କ ପତ୍ନୀ ମନସୁରେହ ଖୋଜାସ୍ତେହ ମଧ୍ୟ ଆହତ ହୋଇଥିଲେ ଏବଂ ପରେ ତାଙ୍କର ମୃତ୍ୟୁ ହୋଇଥିଲା।

ଆମେରିକା ଏବଂ ଇସ୍ରାଏଲୀ ଆକ୍ରମଣରେ ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲ୍ଲୀ ଖାମେନେଇଙ୍କ ମୃତ୍ୟୁ ପରେ ତାଙ୍କ ପୁଅ ମୋଜତାବା ଖାମନେଇ ତାଙ୍କ ଉତ୍ତରାଧିକାରୀ ହେବାକୁ ଯାଉଛନ୍ତି। ଇସ୍ରାଏଲୀ ଗଣମାଧ୍ୟମ ଅନୁସାରେ, ଇରାନର ୮୮ ସଦସ୍ୟ ବିଶିଷ୍ଟ ବିଶେଷଜ୍ଞ ସଭା ମୋଜତାବାଙ୍କୁ ନିର୍ବାଚିତ କରିଛି। ଇରାନ ଇଣ୍ଟରନ୍ୟାସନାଲ ମଧ୍ୟ ସୂତ୍ରକୁ ଉଦ୍ଧୃତ କରି ଏହି ଖବର ପ୍ରକାଶ କରିଛି। ଇରାନର ସମ୍ବିଧାନ ଅନୁଯାୟୀ ସର୍ବୋଚ୍ଚ ନେତାଙ୍କୁ ଉଚ୍ଚ ଧାର୍ମିକ ପଦବୀ ଧାରଣ କରିବାକୁ ପଡିବ। 

ଜଣେ ବରିଷ୍ଠ ଇରାନୀ ଅଧିକାରୀ ସରକାରୀ ଗଣମାଧ୍ୟମକୁ କହିଛନ୍ତି ଯେ ବୁଧବାର ବିଳମ୍ବିତ ରାତିରେ ତେହେରାନରେ ଏକ ସମାରୋହରେ ଇରାନୀମାନେ ଦିବଂଗତ ସର୍ବୋଚ୍ଚ ନେତା ଆୟାତୋଲ୍ଲା ଅଲ୍ଲୀ ଖାମେନେଇଙ୍କୁ ବିଦାୟ ଦେବା ଆରମ୍ଭ କରିବେ। ଇରାନର ଇସଲାମିକ୍ ପ୍ରଚାର ପରିଷଦର ମୁଖ୍ୟ ହୋଜ୍ଜାତୋଲେସଲାମ୍ ମହମୁଦି କହିଛନ୍ତି ଯେ ବିଦାୟ ସମାରୋହ ତିନି ଦିନ ଧରି ଚାଲିବ ଏବଂ ଅନ୍ତିମ ସଂସ୍କାର ପରେ ଘୋଷଣା କରାଯିବ।

ସେ କହିଛନ୍ତି ଯେ ସାଧାରଣ ଜନତା ରାତି ୧୦ଟାରୁ ତେହେରାନର ଇମାମ ଖୋମେନି ପ୍ରାର୍ଥନା ହଲରେ ସ୍ୱର୍ଗତ ସର୍ବୋଚ୍ଚ ନେତା ଅଲ୍ଲୀ ଖାମେନେଇଙ୍କ ପାର୍ଥିବ ଶରୀରକୁ ଶ୍ରଦ୍ଧାଞ୍ଜଳି ଜଣାଇପାରିବେ।