Afghanistan-Pakistan Tension: ଆଫଗାନିସ୍ତାନ ଉପରେ ଏୟାର ଷ୍ଟ୍ରାଇକ୍ କଲା ପାକିସ୍ତାନ

ଗୁରୁବାର ରାତିରେ ବିସ୍ଫୋରଣରେ ଥରି ଉଠିଛି ଆଫଗାନିସ୍ତାନ। ପାକିସ୍ତାନର ଜୋରଦାର ଆକ୍ରମଣରେ ଆଫଗାନିସ୍ତାନ ବେହାଲ ହୋଇ ପଡିଛି। କାବୁଲରେ ତେହେରିକ-ଏ-ତାଲିବାନ ପାକିସ୍ତାନ (ଟିଟିପି) ଶିବିରଗୁଡ଼ିକୁ ଟାର୍ଗେଟ କରି ଏୟାର ଷ୍ଟ୍ରାଇକ୍ କରିଛି ପାକିସ୍ତାନ ବାୟୁସେନା। ତାଲିବାନ ବୈଦେଶିକ ମନ୍ତ୍ରୀ ଆମିର ଖାନ ମୁତାକିଙ୍କ ପ୍ରଥମ ଭାରତ ଗସ୍ତରେ ଥିବା ବେଳେ ପାକିସ୍ତାନ ଆଫଗାନିସ୍ତାନ ଉପରେ କ୍ଷୁବ୍ଧ ହୋଇ ଏହି ଆକ୍ରମଣ କରିଛି। 
ଆଫଗାନିସ୍ତାନ ପାକିସ୍ତାନ ତାଲିବାନ କିମ୍ବା ତେହେରିକ-ଏ-ତାଲିବାନ ପାକିସ୍ତାନ (TTP)କୁ ପାଣ୍ଠି ଏବଂ ଅସ୍ତ୍ରଶସ୍ତ୍ର ଦେଉଥିବାର ଦୀର୍ଘ ସମୟ ଧରି ଅଭିଯୋଗ କରିଆସୁଛି ପାକିସ୍ତାନ। ଯାହାକୁ ନେଇ ଆକ୍ରମଣ କରିଛି ପାକିସ୍ତାନ। ସହିଦ ଅବଦୁଲ ହକ୍ ସ୍କୋୟାର ନିକଟରେ ଏହି ଆକ୍ରମଣ ହୋଇଛି। ୨୦୧୮ରେ TTP ସଂଗଠନର କମାଣ୍ଡ ଗ୍ରହଣ କରିଥିବା ଟିଟିପି ମୁଖ୍ୟ ନୁର ୱାଲି ମେହସୁଦଙ୍କୁ ନିପାତ କରିବା ଏହି ଆକ୍ରମଣର ମୁଖ୍ୟ ଉଦ୍ଦେଶ୍ୟ ଥିଲା। 
କିନ୍ତୁ ମେହସୁଦ ଏକ ଅଡିଓ ବାର୍ତ୍ତା ଜାରି କରି ସେ ସୁରକ୍ଷିତ ଥିବା କୁହାଯାଇଥିଲା। ତାଙ୍କ ମୃତ୍ୟୁ କିମ୍ବା ନିଖୋଜ ହେବାର ରିପୋର୍ଟକୁ ଅସ୍ୱୀକାର କରାଯାଇଥିଲା। ଅନେକ ପାକିସ୍ତାନୀ ଗଣମାଧ୍ୟମ ଆକ୍ରମଣରେ ତାଙ୍କର ମୃତ୍ୟୁ ହୋଇଥିବା ଦାବି କରିବା ପରେ ଏହି ସ୍ପଷ୍ଟୀକରଣ ଦିଆଯାଇଥିଲା। 
ତେହେରିକ-ଏ-ତାଲିବାନ ପାକିସ୍ତାନ ଗତ କିଛି ବର୍ଷ ମଧ୍ୟରେ ପାକିସ୍ତାନୀ ସାମରିକ କର୍ମଚାରୀଙ୍କୁ ଟାର୍ଗେଟ କରି ଅନେକ ଆକ୍ରମଣ କରିଛି, ଯେଉଁଥିରେ ସଦ୍ୟତମ ଆକ୍ରମଣ ଅକ୍ଟୋବର ୮ ତାରିଖରେ ହୋଇଥିଲା। ବୁଧବାର ଆଫଗାନ ସୀମା ନିକଟରେ ଟିଟିପି ଦ୍ୱାରା ହୋଇଥିବା ଏକ ଘାତକ ଆକ୍ରମଣରେ ଦୁଇ ବରିଷ୍ଠ ଅଧିକାରୀ ସମେତ ୧୧ ଜଣ ପାକିସ୍ତାନୀ ସୈନିକଙ୍କ ମୃତ୍ୟୁ ଘଟିଥିଲା।
ଆଫଗାନିସ୍ତାନରେ ଆମେରିକାର ପୂର୍ବତନ ରାଷ୍ଟ୍ରଦୂତ ଜାଲମୟ ଖଲିଲଜାଦ କହିଛନ୍ତି, ତାଲିବାନ କାର୍ଯ୍ୟକର୍ତ୍ତାମାନେ ପାକିସ୍ତାନରେ ସକ୍ରିୟ ଅଛନ୍ତି, ISIS ଉପରେ ଆକ୍ରମଣ କରୁଛନ୍ତି ଏବଂ ଏହାର ଅନେକ ନେତାଙ୍କୁ ହତ୍ୟା କରୁଛନ୍ତି। ପାକିସ୍ତାନୀମାନେ ଆଫଗାନିସ୍ତାନ ଏବଂ ବାଲୁଚ୍ ଜାତୀୟତାବାଦୀ ବିଦ୍ରୋହ ବିରୁଦ୍ଧରେ ISIS କାର୍ଯ୍ୟକର୍ତ୍ତାମାନଙ୍କୁ ବେପରୁଆ ଭାବରେ ସମର୍ଥନ କରୁଛନ୍ତି ବୋଲି କହିଛନ୍ତି।

ଆଫଗାନ ମନ୍ତ୍ରୀଙ୍କ ପ୍ରଥମ ଭାରତ ଗସ୍ତ

ନୂଆଦିଲ୍ଲୀ ଏପର୍ଯ୍ୟନ୍ତ କାବୁଲର ଶାସନକୁ ଆନୁଷ୍ଠାନିକ ଭାବରେ ସ୍ୱୀକୃତି ଦେଇ ନଥିଲେ ମଧ୍ୟ, ଉଭୟ ପକ୍ଷ ଦ୍ୱିପାକ୍ଷିକ ସମ୍ପର୍କ ଏବଂ କୂଟନୈତିକ ସମ୍ପର୍କକୁ ବୃଦ୍ଧି କରୁଥିବାରୁ ପାକିସ୍ତାନ ତାଲିବାନ ଏବଂ ଭାରତକୁ ଏକ ବାର୍ତ୍ତା ପଠାଇବା ପାଇଁ କାବୁଲରେ ଆକ୍ରମଣ କରିଥିବା ମନେ ହେଉଛି।
ଏହି ଘଟଣା ଏପରି ଏକ ସମୟରେ ଘଟିଛି ଯେତେବେଳେ ତାଲିବାନ ବୈଦେଶିକ ମନ୍ତ୍ରୀ ମୁତାକି ଛଅ ଦିନିଆ ଭାରତ ଗସ୍ତରେ ଅଛନ୍ତି। ଏହି ସମୟରେ ସେ ବୈଦେଶିକ ମନ୍ତ୍ରୀ ଏସ ଜୟଶଙ୍କର ଏବଂ ଜାତୀୟ ସୁରକ୍ଷା ପରାମର୍ଶଦାତା (ଏନଏସଏ) ଅଜିତ ଡୋଭାଲଙ୍କ ସହ ପୃଥକ ଆଲୋଚନା କରିବେ।
ଅଗଷ୍ଟ ୨୦୨୧ରେ ଆଫଗାନିସ୍ତାନର ଶାସନ ଭାର ତାଲିବାନ ଗ୍ରହଣ କରିବା ପରଠାରୁ ନୂଆଦିଲ୍ଲୀ ଏବଂ କାବୁଲ ମଧ୍ୟରେ ଏହା ସର୍ବୋଚ୍ଚ ସ୍ତରୀୟ ଆଲୋଚନା ହେବ।

Afghanistan-Pakistan Tension