Imran Khan 'Mysteriously' Killed? ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ହତ୍ୟା! ଆଫଗାନିସ୍ତାନ ଗଣମାଧ୍ୟମର ଦାବି

ବୁଧବାର ଦିନ ଆଫଗାନିସ୍ତାନ ଗଣମାଧ୍ୟମ ଦାବି କରିଛି ଯେ ପୂର୍ବତନ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ (Imran Khan) ରାୱଲପିଣ୍ଡିର ଆଦିଆଲା ଜେଲରେ ହତ୍ୟା କରାଯାଇଛି। ଏକ ପୋଷ୍ଟରେ ଆଫଗାନିସ୍ତାନର ସୋସିଆଲ ମିଡିଆରେ ଲେଖାଯାଇଛି ଯେ, "ପାକିସ୍ତାନର ଏକ ବିଶ୍ୱସ୍ତ ସୂତ୍ର ଆଫଗାନିସ୍ତାନ ଟାଇମ୍ସକୁ ନିଶ୍ଚିତ କରିଛି ଯେ ପିଟିଆଇ ଅଧ୍ୟକ୍ଷ ଇମ୍ରାନ ଖାନଙ୍କୁ ରହସ୍ୟମୟ ଭାବରେ ହତ୍ୟା କରାଯାଇଛି ଏବଂ ତାଙ୍କ ମୃତଦେହକୁ ଜେଲରୁ ବାହାରକୁ ସ୍ଥାନାନ୍ତର କରାଯାଇଛି।"

କିନ୍ତୁ, ପାକିସ୍ତାନ ଏହି ଦାବିକୁ ଅସ୍ୱୀକାର କରିଛି। ପାକିସ୍ତାନୀ କର୍ତ୍ତୃପକ୍ଷ ଏହି ଦାବିକୁ ଅସ୍ୱୀକାର କରି କହିଛନ୍ତି ଯେ ଇମ୍ରାନ ଜୀବିତ ଅଛନ୍ତି। ଇମ୍ରାନଙ୍କ ଏହି ମୃତ୍ୟୁ ଗୁଜବ ସୋସିଆଲ ମିଡିଆରେ ଭାଇରାଲ ହେଉଛି।

ଇମ୍ରାନ ଖାନଙ୍କ ମୃତ୍ୟୁ ସମ୍ପର୍କିତ ଏପରି ଗୁଜବ ସୋସିଆଲ ମିଡିଆରେ ପ୍ରସାରିତ ହେବା ଏହା ପ୍ରଥମ ଥର ନୁହେଁ। ମେ ୨୦୨୫ରେ ସମାନ ମିଥ୍ୟା ଦାବି ସୋସିଆଲ ମିଡିଆରେ ସେୟାର କରାଯାଇଥିଲା। ଯେଉଁଥିରେ ପୂର୍ବତନ ପାକିସ୍ତାନ ପ୍ରଧାନମନ୍ତ୍ରୀଙ୍କୁ ତାଙ୍କ ଘରେ ଗୁଳି କରି ହତ୍ୟା କରାଯାଇଛି କିମ୍ବା ଆକ୍ରମଣ କରାଯାଇଛି ବୋଲି ଅଭିଯୋଗ କରାଯାଇଥିବା ପୋଷ୍ଟରେ ଲେଖା ଥିଲା।

ତାଙ୍କ ମୃତ୍ୟୁର ଗୁଜବ ସତ୍ତ୍ୱେ, ପୂର୍ବତନ ପାକିସ୍ତାନ ରାଷ୍ଟ୍ରପତି ଇମ୍ରାନ ଖାନଙ୍କୁ ଜେଲରେ ହତ୍ୟା କରାଯାଇଛି ବୋଲି ଦାବି କରିବା ସହ ତାଙ୍କ ସମର୍ଥକ ଏବଂ ପାକିସ୍ତାନ ତେହେରିକ୍-ଏ-ଇନସାଫ (ପିଟିଆଇ) ଦଳର ହଜାର ହଜାର ସଦସ୍ୟ ତାଙ୍କ ସ୍ବାସ୍ଥ୍ୟାବସ୍ଥା ବିଷୟରେ ଜାଣିବା ପାଇଁ ଆଦିଆଲା ଜେଲରେ ପଶିବାକୁ ଚେଷ୍ଟା କରୁଛନ୍ତି। ଇମ୍ରାନ ଖାନଙ୍କୁ ଜେଲରେ ହତ୍ୟା କରାଯାଇଥିବା ଗୁଜବକୁ ବିଶ୍ବାସ କରି ଓ ଇମ୍ରାନଙ୍କୁ ଭେଟିବାକୁ ତାଙ୍କ ଭଉଣୀଙ୍କୁ ଅନୁମତି ଦିଆ ନ ଯିବାରୁ ପିଟିଆଇ ସମର୍ଥକମାନେ ଜେଲ ବାହାରେ ପ୍ରତିବାଦ କରିଛନ୍ତି।

ମଙ୍ଗଳବାର ଇମ୍ରାନ ଖାନଙ୍କ ରାଜନୈତିକ ଦଳ, ପାକିସ୍ତାନ ତେହେରିକ୍-ଏ-ଇନସାଫ (ପିଟିଆଇ)ର ହଜାର ହଜାର ସମର୍ଥକ ଜେଲ ବାହାରେ ଏକତ୍ରିତ ହୋଇ କର୍ତ୍ତୃପକ୍ଷଙ୍କୁ ସେମାନଙ୍କ ନେତାଙ୍କ ସ୍ୱାସ୍ଥ୍ୟାବସ୍ଥା ବିଷୟରେ ସୂଚନା ପ୍ରକାଶ କରିବାକୁ ଦାବି କରିଥିଲେ।କୌଣସି ଅପ୍ରୀତିକର ଘଟଣା ଏଡାଇବା ପାଇଁ ଜେଲ ବାହାରେ ଶହ ଶହ ସୁରକ୍ଷା କର୍ମୀଙ୍କୁ ମୁତୟନ କରାଯାଇଥିଲା।

ରିପୋର୍ଟ ଅନୁଯାୟୀ, ବିକ୍ଷୋଭ ବେଳେ ଇମ୍ରାନ ଖାନଙ୍କ ଭଉଣୀ ଅଲିମା ଖାନ, ଡାକ୍ତର ଉଜମା ଏବଂ ନୋରିନ ନିଆଜି ଏବଂ ଅନ୍ୟାନ୍ୟ ଦଳୀୟ ନେତାମାନଙ୍କୁ ଆଉ ଆଗକୁ ଯିବାକୁ ଅନୁମତି ନ ମିଳିବାରୁ ସେମାନେ ଜେଲ ନିକଟ ଫ୍ୟାକ୍ଟ୍ରି ନାକାରେ ବିକ୍ଷୋଭ ପ୍ରଦର୍ଶନ କରିଥିଲେ। ପାକିସ୍ତାନ ଦୈନିକ ଡନ୍‌ର ଏକ ରିପୋର୍ଟ ଅନୁଯାୟୀ, ମଜଲିସ୍ ୱାହଦତ୍-ଇ-ମୁସଲିମିନ୍ (MWM) ନେତା ଆଲ୍ଲାମା ରାଜା ନାସିରଙ୍କ ଅନୁରୋଧରେ ପ୍ରତିବାଦ ପ୍ରତ୍ୟାହାର କରାଯାଇଥିଲା।