Pakistani Students Study: ଗୀତା ଭାଗବତ ପଢୁଛନ୍ତି ପାକିସ୍ତାନୀ ! କଲେଜରେ ପଢାହେଉଛି ସଂସ୍କୃତ ପାଠ

ହିନ୍ଦୁ ଓ ସନାତନ ଧର୍ମ ପ୍ରତି ସବୁବେଳେ ବିଷ ଓଗାଳୁଥିବା ପାକିସ୍ତାନରେ ଆରମ୍ଭ ହୋଇଛି ସଂସ୍କୃତ ପାଠଶାଳା। ଲାହୋର ୟୁନିଭରସିଟି ଅଫ୍ ମ୍ୟାନେଜମେଣ୍ଟ ସାଇନ୍ସ ବା LUMS ସଂସ୍କୃତ କୋର୍ସ ଆରମ୍ଭ କରିଛି । ଏଠାରେ ଛାତ୍ରଛାତ୍ରୀ ସଂସ୍କୃତରେ ଡିପ୍ଲୋମା କରିପାରିବେ । ଯଦିଓ ଏବେ ଛାତ୍ରଙ୍କ ସଂଖ୍ୟା କମ୍ ଅଛି, ହେଲେ ଆଗାମୀ କିଛି ବର୍ଷରେ ଏହି ସଂଖ୍ୟା ବୃଦ୍ଧି ପାଇବ । ଆଉ ୧୦-୧୫ ବର୍ଷରେ ପାକିସ୍ତାନରୁ ସଂସ୍କୃତ ବିଦ୍ୱାନ ବାହାରିବେ ଏବଂ ଗୀତ, ମହାଭାରତ ଉପରେ ରିସର୍ଚ୍ଚ କରୁଥିବାର ଦେଖାଯିବେ ବୋଲି କହିଛନ୍ତି ଗୁରମାନି ସେଣ୍ଟର ଡାଇରେକ୍ଟର ଡ. ଉସମାନ କାସିମ୍ ।

ତାଙ୍କର କହିବା କଥା, ପଞ୍ଜାବ ୟୁନିଭରସିଟି ଲାଇବ୍ରେରୀରେ ଅନେକ ସମୃଦ୍ଧ ସଂସ୍କୃତ ଦସ୍ତାବିଜ ରହିଛି । କିନ୍ତୁ ୧୯୪୭ ମସିହା ପରଠୁ କୌଣସି ପାକିସ୍ତାନୀ ଏହାକୁ ଛୁଇଁନାହାନ୍ତି । କେବଳ ବିଦେଶୀ ରିସର୍ଚ୍ଚରମାନଙ୍କ କାମରେ ଲାଗିଛି । ୨୦୨୭ ବେଳକୁ ପାକିସ୍ତାନର ଛାତ୍ରଛାତ୍ରୀ ବର୍ଷିକିଆ କୋର୍ସ ଭାବେ ସଂସ୍କୃତ ପଢିବେ । ମହାଭାରତ, ଭଗବତ ଗୀତା ଉପରେ ସ୍ୱତନ୍ତ୍ର କୋର୍ସ ଆସିବ । LUMSରେ ଏକ ୩ ମାସିଆ ସଂସ୍କୃତ ୱାର୍କସପ୍‌ ଚାଲିଥିଲା । ଏଥିରେ ଛାତ୍ରୀଛାତ୍ରୀଙ୍କ ପ୍ରବଳ ଉତ୍ସାହ ଦେଖି ବିଶ୍ୱବିଦ୍ୟାଳୟ ସଂସ୍କୃତ ପାଠ୍ୟକ୍ରମ ଆରମ୍ଭ କରିବାକୁ ନିଷ୍ପତ୍ତି ନେଇଛି ।

ପ୍ରଥମେ ପ୍ରଥମେ ପିଲାମାନଙ୍କୁ ସଂସ୍କୃତ ଭାଷା କଷ୍ଟକର ଲାଗୁଥିଲା । ହେଲେ ଥରେ ବୁଝିଗଲା ପରେ ଖୁବ୍ ଆନନ୍ଦ ଲାଗିଲା ବୋଲି ସେ କହିଛନ୍ତି । ସୋସିଓଲୋଜି ପ୍ରଫେସର ସାହିଦ୍ ରସିଦ୍ କହିଛନ୍ତି, ସଂସ୍କୃତ ଗୋଟିଏ ପାହାଡ ଭଳି । ଏହାକୁ ଗ୍ରହଣ କରିବାକୁ ହେବ । ସଂସ୍କୃତ କୌଣସି ନିର୍ଦ୍ଧିଷ୍ଟ ଧର୍ମର ନୁହେଁ । ଏହା ଆମର ମଧ୍ୟ । ଉର୍ଦ୍ଧୁର ଅନେକ ଶବ୍ଦ ସଂସ୍କୃତରୁ ଆସୁଛି ।  ସଂସ୍କୃତ ବ୍ୟାକରଣର ଜନକ ପାଣିନିଙ୍କ ଗାଁ ପାକିସ୍ତାନରେ ଥିଲା । ସିନ୍ଧୁ ଘାଟୀ ସଭ୍ୟତା ସମୟରେ ପାକିସ୍ତାନର ସିନ୍ଧ ଅଞ୍ଚଳରେ ବହୁ ଗ୍ରନ୍ଥର ରଚନା ହୋଇଥିଲା ।