Afghanistan: ପାକିସ୍ତାନ ଉପରେ ଘନଘନ ଆକ୍ରମଣ; ଗଲାଣି ୫୮ ପାକ୍ ସୈନିକଙ୍କ ଜୀବନ

ରବିବାର ତାଲିବାନ ଇସଲାମାବାଦକୁ ISIS ଆତଙ୍କବାଦୀଙ୍କୁ ଆଶ୍ରୟ ଦେବା ବିରୁଦ୍ଧରେ ଚେତାବନୀ ଦେଇଛି। ଏଥି ସହ କାବୁଲରେ ପାକିସ୍ତାନ ବିମାନ ଆକ୍ରମଣ କରିବା ପରେ ଆଫଗାନିସ୍ତାନର ପ୍ରତି ଆକ୍ରମଣରେ ୫୮ ଜଣ ପାକିସ୍ତାନୀ ସୈନିକଙ୍କ ଜୀବନ ଯାଇଥିବା ସହ 30 ଜଣ ଆହତ ହୋଇଥିବା ଦାବି କରିଛି ତାଲିବାନ।
"ପାକିସ୍ତାନ ନିଜ ମାଟିରୁ ଲୁଚି ରହିଥିବା ISIS ସଦସ୍ୟମାନଙ୍କୁ ବାହାର କରିବା ଉଚିତ କିମ୍ବା ସେମାନଙ୍କୁ ଇସଲାମିକ୍ ଏମିରେଟ୍ସକୁ ହସ୍ତାନ୍ତର କରିବା ଉଚିତ। ISIS ଗୋଷ୍ଠୀ ଆଫଗାନିସ୍ତାନ (Afghanistan) ସମେତ ବିଶ୍ୱର ଅନେକ ଦେଶ ପାଇଁ ବିପଦ ସୃଷ୍ଟି କରୁଛି," ତାଲିବାନ ମୁଖପାତ୍ର ଜାବିହୁଲ୍ଲା ମୁଜାହିଦ କହିଛନ୍ତି। 
ନିଜର ବାୟୁ ଏବଂ ସ୍ଥଳ ସୀମାକୁ ରକ୍ଷା କରିବାର ଅଧିକାର ଆଫଗାନିସ୍ତାନ ପାଖରେ ଅଛି ବୋଲି କହିଛନ୍ତି ମୁଜାହିଦ। ସେମାନେ କତାର ଏବଂ ସାଉଦି ଆରବର ଅନୁରୋଧରେ ଆଫଗାନିସ୍ତାନ-ପାକିସ୍ତାନ ସୀମା - ଡୁରାଣ୍ଡ ରେଖାରେ ରାତ୍ରୀକାଳୀନ ଅପରେସନକୁ ବନ୍ଦ କରିଦେଇଛନ୍ତି ବୋଲି କହିଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ସଂଘର୍ଷରେ ଅତି କମରେ 20 ଜଣ ତାଲିବାନ ସୈନିକଙ୍କ ମୃତ୍ୟୁ ଘଟିଛି।

ତାଲିବାନ ଆହୁରି ଦାବି କରିଛି ଯେ ଏହାର ପ୍ରତିଷ୍ଠା ପରେ ISIS କୁ ତା'ର ଅଞ୍ଚଳରୁ ସଫା କରିବା ପାଇଁ ତୁରନ୍ତ ପଦକ୍ଷେପ ନେବା ପରେ, ପାକିସ୍ତାନ ଖାଇବର ପଖତୁନଖ୍ୱା ଅଞ୍ଚଳରେ ସେମାନଙ୍କ ପାଇଁ ନୂତନ ତାଲିମ କେନ୍ଦ୍ର ସ୍ଥାପନ କରିଥିଲା। କରାଚି ଏବଂ ଇସଲାମାବାଦ ବିମାନବନ୍ଦର ଦେଇ ତାଲିମ ପାଇଁ ଲୋକଙ୍କୁ ଅଣାଯାଇଥିଲା," ମୁଜାହିଦ କହିଛନ୍ତି।
କାବୁଲ ଏବଂ ପାକଟିକାରେ ଇସଲାମାବାଦର ବିମାନ ଆକ୍ରମଣ ପରେ, ଆଫଗାନିସ୍ତାନ ସୀମାନ୍ତବର୍ତ୍ତୀ ଅନେକ ପାକିସ୍ତାନୀ ପ୍ରଦେଶ ଉପରେ ଆକ୍ରମଣ କରିଥିଲା। ତାଲିବାନ ସରକାରଙ୍କ ପ୍ରତିରକ୍ଷା ମନ୍ତ୍ରଣାଳୟ ରବିବାର ସକାଳେ ଆକ୍ରମଣକୁ ନିଶ୍ଚିତ କରି କହିଛି ଯେ ଏହାର ସୈନ୍ୟମାନେ "ପ୍ରତିଶୋଧମୂଳକ ଏବଂ ସଫଳ ଅପରେସନ୍" କରିଛନ୍ତି।
"ଯଦି ଅପର ପକ୍ଷ ପୁଣି ଥରେ ଆଫଗାନିସ୍ତାନ ଉପରେ ଆକ୍ରମଣ କରେ, ତେବେ ଆମର ସଶସ୍ତ୍ର ବାହିନୀ ଦେଶର ସୀମା ରକ୍ଷା କରିବାକୁ ସମ୍ପୂର୍ଣ୍ଣ ପ୍ରସ୍ତୁତ ଏବଂ ଏହାର କଡ଼ା ଜବାବ ଦେବେ," ଆଫଗାନ ପ୍ରତିରକ୍ଷା ମନ୍ତ୍ରଣାଳୟ କହିଛି।