Panchayat Bans Smartphones: ଝିଅ, ବୋହୂଙ୍କ ପାଇଁ ସ୍ମାର୍ଟଫୋନ୍ ବ୍ୟାନ୍, ପୁରୁଷ ୟୁଜ୍ କରିବେ...

ଗାଁର କୌଣସି ଝିଅ ବୋହୂ ଏଣିକି ସ୍ମାର୍ଟଫୋନ୍ ବା କ୍ୟାମେରା ବାଲା ଫୋନ୍ ଧରିବେ ନାହିଁ । ନା ସୋସିଆଲ ମିଡିଆ ଚଲାଇପାରିବେ ନା ଫଟୋ ଉଠାଇପାରିବେ । ରାଜସ୍ଥାନର ଜାଲୋର ଜିଲ୍ଲାରୁ ଆସିଛି ଏଭଳି ଆଶ୍ଚର୍ଯ୍ୟ କଲାଭଳି ଘଟଣା । ଏଠାରେ ଏକ ପଞ୍ଚାୟତ ୧୫ଟି ଗାଁରେ ମହିଳାଙ୍କ ପାଇଁ ସ୍ମାର୍ଟଫୋନ୍ ବ୍ୟବହାର ଉପରେ କଟକଣା ଲଗାଇଛି । ଜାଲୋର ଚୌଧୁରୀ ସମୁଦାୟର, ସୁନ୍ଧାମାତା ପଟ୍ଟି ପଞ୍ଚାୟତ ବୈଠକରେ ସର୍ବସମ୍ମତିକ୍ରମେ ନିଆଯାଇଛି ଏହି ନିଷ୍ପତ୍ତି ।

ପଞ୍ଚାୟତର ଫରମାନ୍ ଅନୁସାରେ, ଘରେ ଝିଅ ବୋହୂଙ୍କ ସ୍ମାର୍ଟଫୋନ୍ ଧରିବା ବନ୍ଦ । ଗାଁର ଝିଅ ବୋହୂ ଆଉ କ୍ୟାମେରା ବାଲା ଫୋନ୍ ଚଲାଇପାରିବେନି । ପୁରୁଣା କି-ପ୍ୟାଡ୍ ଫୋନ ରଖିପାରିବେ, ଯେଉଁଥିରେ କେବଳ କଲ୍, ମେସେଜ ଆସିଥାଏ । ବିବାହ ବ୍ରତ ଭଳି ସାମାଜିକ କାର୍ଯ୍ୟକ୍ରମ କିମ୍ବା ପଡୋଶୀ ଘରକୁ ଗଲେ, ଫୋନ୍ ନେଇ ଯାଇପାରିବେ ନାହିଁ । ପାଠ ପଢୁଥିବା ଝିଅମାନେ ଆବଶ୍ୟକସ୍ଥଳେ ଘରେ ସ୍ମାର୍ଟଫୋନ୍ ବ୍ୟବହାର କରିପାରିବେ । କିନ୍ତୁ ବାହାରକୁ ନେଇପାରିବେ ନାହିଁ ।  ଆସନ୍ତା ଜାନୁଆରୀ ୨୬ ଜାନୁଆରୀରୁ ଲାଗୁ ହେବ ଏହି ନିୟମ ।

ଏନେଇ ପଞ୍ଚାୟତର ଯୁକ୍ତି ଯେ, ମହିଳାମାନେ ସ୍ମାର୍ଟଫୋନ୍ ଧରିବା ଯୋଗୁଁ ପିଲାମାନେ ଏହାର ବ୍ୟବହାର କରୁଛନ୍ତି । ଏଥିରେ ସେମାନଙ୍କ ଆଖି ଉପରେ ଖରାପ ପ୍ରଭାବ ପଡୁଛି । ତେଣୁ ମୋବାଇଲ ଅଭ୍ୟାସରୁ ଦୂରେଇ ରହିବାକୁ ଏହି ନିଷ୍ପତ୍ତି ନିଆଯାଇଛି । 

ଯାହାର ଅର୍ଥ- ମହିଳା ସ୍ମାର୍ଟଫୋନ୍ ୟୁଜ୍ କରିବେନି, କିନ୍ତୁ ପୁରୁଷ କରିପାରିବେ । ପଞ୍ଚାୟତର ଏହି ନିଷ୍ପତ୍ତିକୁ କଡା ବିରୋଧ କରିଛନ୍ତି ବିଭିନ୍ନ ସମାଜିକ ସଂଗଠନ । କେବଳ ମହିଳାଙ୍କ ପାଇଁ କାହିଁକି ଏହି କଟକଣା, ପୁରୁଷଙ୍କ ପାଇଁ କାହିଁକି ନୁହେଁ ବୋଲି ପ୍ରଶ୍ନ ଉଠିଛି ।