Big Anti-Drug Drive: ନିଶା ବେପାରୀଙ୍କ ଘର ଭାଙ୍ଗୁଛି ପୋଲିସ୍, ସବୁ ସାବାଡ୍ ହେବେ

କ୍ରିମିନାଲ୍ ଶାଶୁ-ଜ୍ବାଇଁ ସାବାଡ୍ ! ପୋଲିସ ଭାଙ୍ଗୁଛି ଘର । ୪ ତାରିଖରେ ଶାଶୁ ଘର ଚୁରମାର୍ । ୧୬ରେ ଜ୍ବାଇଁ ଘର ଗୁଣ୍ଡ । ଏଇ ଡିସେମ୍ବର ମାସ ୪ ତାରିଖରେ ବ୍ରାଉନସୁଗାର ବେପାରୀ ସୁକାନ୍ତି ପଣ୍ଡାଙ୍କ ୪ଟି ଘରକୁ ମାଟିରେ ମିଶାଇଥିଲା ପୁରୀ ପୋଲିସ ।

ଆଉ ଏବେ ଶାଶୁ ପରେ ଜ୍ବାଇଁର ପାଳି ପଡ଼ିଛି । ଜ୍ବାଇଁ ଟିକି ଖାନର ୩ଟି ଘରକୁ ପୁରୀ ପୋଲିସ ଜେସିବି ଲଗାଇ ଭାଙ୍ଗିଛି । ‘ଅପରେସନ ଚକ୍ର’ରେ ନିଶା ବେପାରୀଙ୍କୁ ସାବାଡ୍ କରିବାକୁ ଲଗାତାର ପୋଲିସର ଏହି ଉଦ୍ୟମ ଜାରି ରହିଥିବାବେଳେ ଏବେ ଟିକି ଖାନର ପୁରୀ ନୀଳଚକ୍ର ନଗରରେ ଥିବା ଘରକୁ ଖଣ୍ଡ ଖଣ୍ଡ କରିଛି ଜେସିବି ।

ପୂର୍ବରୁ ଶାଶୁ ସୁକାନ୍ତି ପଣ୍ଡା ଚାରି ଚାରିଥର ବ୍ରାଉନସୁଗାର କାରବାରରେ ଗିରଫ ହୋଇଥିଲା । ଗତ ସେପ୍ଟମ୍ବର ମାସରେ ସୁକାନ୍ତି ନିକଟରୁ ୨୦୦ଗ୍ରାମ ବ୍ରାଉନ ସୁଗାର ଜବତ କରିଥିଲା ସଦର ଥାନା ପୋଲିସ । ଯାହାର ଆନୁମାନିକ ମୂଲ୍ୟ ଥିଲା ପ୍ରାୟ ୨୦ଲକ୍ଷ ଟଙ୍କା । ପରେ ପୋଲିସ ନିଶାଡିଙ୍କ ଉପରେ ଜିରୋ ଟଲେରାନ୍ସ ନୀତି ଆପଣାଇଥିଲା ।

ରହିଛି ୧୭ ମାମଲା 

ସୁକାନ୍ତି ପଣ୍ଡା ଓ ତାଙ୍କ ସମ୍ପର୍କୀୟଙ୍କ ଘର ଉପରେ ବୁଲଡୋଜର ଚଲାଇଥିଲା । ଆଉ ଏବେ ଜ୍ବାଇଁ ଟିକି ଖାନର ଘର ଗୁଡ଼ିକୁ ମାଟିରେ ମିଶାଯାଇଛି । ଜ୍ବାଇଁ ଟିକି କେବଳ ବ୍ରାଉନସୁଗାର ବେପାରୀ ନୁହେଁ, ବାଲି ଚୋରାଚାଲାଣ ଠାରୁ ଆରମ୍ଭ କରି ୧୭ଟି ଅପରାଧିକ ମାମଲା ତା’ ନାଁରେ ରହିଥିବା ପୋଲିସ ସୂଚନା ଦେଇଛି । 

ପୁରୀରେ ପ୍ରଥମଥର ପାଇଁ ପୋଲିସ ଏପରି ବଡ଼ ପଦକ୍ଷେପ ନେଇଛି । ଶ୍ରୀକ୍ଷତ୍ରକୁ ନିଶାମୁକ୍ତ କରିବାକୁ ପୋଲିସ ଆରମ୍ଭ କରିଛି ଅପରେସନ ଚକ୍ର । ସରକାରୀ ଜାଗାକୁ ମାଡ଼ିବସି ଘର କରି ସୁକାନ୍ତି ପଣ୍ଡା ନିଶା ବେପାର ଚଲାଉଥିଲା । ଆଉ ଜ୍ବାଇଁ ଟିକି ଖାନ ଧୀରେ ଧୀରେ ହେଉଥିଲା ଅପରାଧର ବାଦଶାହା ।