Minor Girl’s Body Recovered: ବସ୍ତା ଭିତରେ ନାବାଳିକା ଡେଡ୍‌ବଡି, ବାଲେଶ୍ୱରରେ ଚାଞ୍ଚଲ୍ୟ

ବାଲେଶ୍ୱର ଜିଲ୍ଲା ଶିଳ୍ପାଞ୍ଚଳ ଥାନା ସମଲପୁର ଅଞ୍ଚଳରେ ଘଟିଛି ଏହି ଚାଞ୍ଚଲ୍ୟକର ଘଟଣା । ଅଳିଆ ଗୋଟେଇ ପେଟ ପୋଷୁଥିବା ଜଣେ ନାବାଳିକାଙ୍କ ଡେଡବଡି ମିଳିଛି ବସ୍ତା ଭିତରୁ । ହେଲେ କିଏ ଓ କାହିଁକି ମାରିଲା ତାଙ୍କୁ ? ସନ୍ଦେହଘେରରେ ନାବାଳିକାଙ୍କ ରୁମମେଟ୍ସ ।

ପୋତିଦେବାକୁ ପ୍ଲାନ 

ମୃତ ନାବାଳିକାଙ୍କ ଘର ବାହାନଗା ଅଂଚଳରେ ବୋଲି ଜଣାପଡିଛି । ସମଲପୁର ନିକଟରେ ଏକ ଛପର ଘରେ ୨ ଜଣ ଝିଅ ଓ ୨ ପୁଅଙ୍କ ସହ ରହୁଥିଲେ ନାବାଳିକା । ସମସ୍ତେ ଅଳିଆ ଆବର୍ଜନା ଗୋଟାଇ ଭିକ ମାଗି ପେଟ ପୋଷୁଥିଲେ । ହେଲେ ଆଜି ସେହି ଘରୁ ଏକ ବସ୍ତା ଭିତରୁ ମିଳିଥିଲା ନାବାଳିକାଙ୍କ ମୃତଦେହ । ବସ୍ତାରେ ମୃତଦେହକୁ ବାନ୍ଧି ଘର ପଛପଟେ ପୋତିଦେବାକୁ ପ୍ଲାନ କରୁଥିଲେ ରୁମମେଟମାନେ । 

ଗାତ ଖୋଳା ସରିଥିଲା, ଆଖପାଖର ଲୋକେ କେହି କିଛି ଜାଣିବା ଆଗରୁ ମୃତଦେହ ପୋତିଦେବାକୁ ଯୋଜନା ଚାଲିଥିଲା । କିନ୍ତୁ ସ୍ଥାନୀୟ ଲୋକେ ଜାଣିବା ପରେ ତୁରନ୍ତ ଜଣାଇଥିଲେ ପୋଲିସକୁ । ପୋଲିସ ଘଟଣାସ୍ଥଳରେ ବସ୍ତା ଭିତରୁ ଉଦ୍ଧାର କରିଥିଲା ମୃତଦେହ । ନାବାଳିକାଙ୍କ ମୃତ୍ୟୁର କାରଣ ସ୍ପଷ୍ଟ ହୋଇନି କିନ୍ତୁ ପାରିପାର୍ଶ୍ୱିକ ସ୍ଥିତିରୁ ଏହା ଏକ ହତ୍ୟାକାଣ୍ଡ ବୋଲି କରାଯାଉଛି ସନ୍ଦେହ ।

ସେପଟେ ତାଙ୍କ ସାଥିରେ ରହୁଥିବା ଝିଅମାନଙ୍କ ବୟାନରେ ବି ରହୁନି ତାଳମେଳ । ସନ୍ଦେହରେ ପୋଲିସ ୨ ଝିଅଙ୍କ ସହ ସାଥିରେ ରହୁଥିବା ଦୁଇ ପୁଅଙ୍କୁ ଉଠାଇ ନେଇଛି ଥାନାକୁ । କେମିତି ନାବାଳିକାଙ୍କ ମୃତ୍ୟୁ ହେଲା, କିଏ ମାରିଲା ନା ମୃତ୍ୟୁ ପଛରେ ଅନ୍ୟ କିଛି କାରଣ ରହିଛି, ସେନେଇ ଚାଲିଛି ପଚରାଉଚରା ।