CBI Raid: ବଡ ବାବୁଙ୍କ ଘର ଥିଲା ଟଙ୍କା ଗୋଦାମ, ନୋଟ ଗଦିରେ ଶୋଉଥିଲେ...କଳାଧନର କୁବେର

ବସ୍ତା ବସ୍ତା ନୋଟ... ଯେମିତି ନୋଟ୍‌ ର ଗଦି । ଯୁଆଡେ ଅନାଇବେ ଖାଲି ୫୦୦ ଟଙ୍କିଆ । ଆପଣଙ୍କୁ ଲାଗୁଥିବ ଏ କୋଉ ବ୍ୟାଙ୍କ ନହେଲେ କୋଉଠି ଟଙ୍କାର ପ୍ରଦର୍ଶନୀ ଚାଲିଛି । ନାଇଁ ଆଜ୍ଞା !  ଟଙ୍କା ମିଳିଛି ଜଣେ ବରିଷ୍ଠ ଆଇପିଏସ୍ ବାବୁଙ୍କ ଘରୁ । 

ବଡ ବାବୁଙ୍କ ଘର ଥିଲା ଟଙ୍କା ଗୋଦାମ । ନୋଟ ଗଦିରେ ଶୋଇଥିଲେ ସେ । ଆଖି ଖୋସିହେଲା ଭଳି କଳାଧନ ।  ଖାଲି ନୋଟ ନୁହେଁ, ଏ ପୁଳା ପୁଳା ସୁନା, ସଜ୍ଜା ହୋଇଥିଲା ଭଳିକି ଦାମୀ ଘଣ୍ଟା  । ଏଥିରୁ ଜାଣିପାରୁଥିବେ କେମିତି କଳାଧନର କୁବେର ପାଲଟିଥିଲେ ଏ ଆଇପିଏସ୍ ଜଣକ । ଚଢୁଥିଲେ ଦାମୀ ମସର୍ଡିଜ୍ ଆଉ ଅଡି କାର୍ । ବରିଷ୍ଠ ଆଇପିଏସ ଅଫିସରଙ୍କ ଅମାପ ସମ୍ପତ୍ତି ଦେଖି CBI ବି ଟେରା । ଟଙ୍କା ଗଣି ଗଣି ହାଲିଆ ଅଧିକାରୀ । 

୨୦୦୯ ବ୍ୟାଚର ପଞ୍ଜାବର ବରିଷ୍ଠ ଆଇପିଏସ ଅଫିସର ହରଚରଣ ସିଂହ ଭୁଲ୍ଲାରଙ୍କ ଘରେ ଛାପା ମାରି ଏସବୁ ସାମଗ୍ରୀ ଜବତ କରିଛି ସିବିଆଇ । ତାଙ୍କ ଘରୁ ମିଳିଛି ନଗଦ ୫ କୋଟି । ସଂପୃକ୍ତ IPS ଅଧିକାରୀ ଏବେ ପଞ୍ଜାବର ରୋପର୍ ରେଞ୍ଜରେ DIG ଭାବରେ ନିଯୁକ୍ତ ଅଛନ୍ତି । ୮ ଲକ୍ଷ ଟଙ୍କା ଲାଞ୍ଚ ମାମଲାରେ ରେଡ୍ କରିଥିଲା ସିବିଆଇ ।

ଗୋଟିଏ ମାମଲାର ରଫାଦଫା କରିବାକୁ ୮ ଲକ୍ଷ ଟଙ୍କା ଲାଞ୍ଚ ମାଗିଥିଲେ ଆଇପିଏସ ବାବୁ । ଫତେଗଡ଼ର ଜଣେ ସ୍କ୍ରାପ ଡିଲରଙ୍କୁ ମାଗିଥିଲେ ଲାଞ୍ଚ । ଟଙ୍କା ନଦେଲେ ମିଛ କେସ୍‌ର ଫସାଇବାକୁ ଦେଉଥିଲେ ଧମକ । ଏନେଇ ଅଭିଯୋଗ ପରେ ଆଇପିଏସ ହରଚରଣ ସିଂହଙ୍କୁ ଧରିବାକୁ ଜାଲ ବିଛାଇଥିଲା ସିବିଆଇ । ହରଚରଣଙ୍କ ନିର୍ଦ୍ଦେଶ ଅନୁସାରେ ଟଙ୍କା ନେଇ ମୋହାଲିରେ ଥିବା ଅଫିସରେ ପହଞ୍ଚିଥିଲେ ଅଭିଯୋଗକାରୀ । ଆଉ ସେଠି ତାଙ୍କଠୁ ଲାଞ୍ଚ ଟଙ୍କା ନେଉଥିବାବେଳେ ଆଇପିଏସ ବାବୁଙ୍କୁ ରଙ୍ଗେ ହାତ ମାଡି ବସିଥିଲା ସିବିଆଇ

ଏହାପରେ ହରଚରଣଙ୍କ ପଞ୍ଜାବ ଓ ଚଣ୍ଡିଗଡ ସ୍ଥିତ ଠିକଣାରେ ମାରିଥିଲା ଛାପା । ଆଉ ଚଢାଉ ବେଳେ ସାମ୍ନାକୁ ଆସିଥିଲା ବାବୁଙ୍କ କଳାସମ୍ପତ୍ତିର ପାହାଡ । ପୁଳା ପୁଳା ସୁନା, ବସ୍ତା ବସ୍ତା ଟଙ୍କା ଓ ଦାମୀ ଗାଡିଗୁଡିକ ଦେଖି ତାଜୁବ ହୋଇଥିଲେ ସିବିଆଇ ଅଧିକାରୀ । ବାବୁଙ୍କ ଘରୁ ମିଳିଥିଲା ବିପୁଳ ପରିମାଣର କ୍ୟାସ୍ । ଯାହାର ପରିମାଣ ପ୍ରାୟ ୫ କୋଟି ହେବ । ଏହାସହ ଦେଢ କେଜି ସୁନା, ୨୨ଟି ଦାମୀ ଘଣ୍ଟା, ୪୦ ଲିଟର ଇମ୍ପୋଡେଟ ମଦ ବୋତଲ ସହ ଗୁଳି ଓ ଅସ୍ତ୍ରଶସ୍ତ୍ର ଜବତ କରିଥିଲା ସିବିଆଇ ଟିମ୍ । ହରଚରଣଙ୍କ ଗୋଟିଏ ମର୍ସିଡିଜ୍ ଓ ଅଡି କାର୍ ବି ସିଜ୍ ହୋଇଛି । ଏହି ଘଟଣାରେ ଆଇପିଏସ ହରଚରଣ ସିଂ ଭୁଲ୍ଲାରଙ୍କ ସହ ଜଣେ ମିଡିଲ୍‌ମ୍ୟାନଙ୍କୁ ଗିରଫ କରାଯାଇଛି । ମିଡିଲମ୍ୟାନଠାରୁ 21 ଲକ୍ଷ ଟଙ୍କା ନଗଦ ଜବତ ହୋଇଛି । 

ଜଣେ ବରିଷ୍ଠ ଆଇପିଏସଙ୍କୁ ଘରୁ ଏତେ ପରିମାଣର କଳାଧନ ମିଳିବା ଘଟଣା ସାରା ଦେଶରେ ସୃଷ୍ଟି କରିଛି ହଇଚଇ ।