Tiger Nitish Kumar Still Roars: 'ଟାଇଗର୍ ଅଭି ଜିନ୍ଦା ହୈ'... ଏବେ ବି ଯୁବକ ପରି ଫିଟ୍ ବିହାରର 'ସୁଶାସନ ବାବୁ'

ପ୍ରାୟ ୨୦ ବର୍ଷର ମୁଖ୍ୟମନ୍ତ୍ରୀ, ରାଜ୍ୟ ସହ କେନ୍ଦ୍ରରେ ବି ଦବ୍‌ଦବା । ସତ୍ତା ବିରୋଧୀ ଲହର ଚର୍ଚ୍ଚା ହେଉଥିଲା ।  ସ୍ୱାସ୍ଥ୍ୟାବସ୍ଥା ସମ୍ପର୍କିତ ଗୁଜବ ସତ୍ତ୍ବେ ଦୁଇଗୁଣା ବଳ ସହ ପୁଣି ବିହାରର ଶାସନ ଡୋରି ସମ୍ଭାଳିବାକୁ ଯାଉଛନ୍ତି ନୀତୀଶ କୁମାର ।

ଆଉ ପ୍ରମାଣ କରିଦେଇଛନ୍ତି, ୭୪ ବର୍ଷ ବୟସରେ ବି ରାଜନୀତିର ଗୋଟି ଚାଳାନା ଭୁଲିନାହାନ୍ତି ସେ । ତେବେ କ'ଣ ନୀତୀଶ କୁମାରଙ୍କ ଏ ଶକ୍ତିର ରହସ୍ୟ ? କାଲି ବିହାର ବିଧାନସଭା ଫଳ ଚମକାଇଦେଇଛି ସାରା ଦେଶକୁ । ଏନଡିଏର ସୁନାମିରେ ବୁଡିଯାଇଛି ମହାମେଣ୍ଟ ।

ମୋଦି-ନୀତୀଶଙ୍କ ମ୍ୟାଜିକ୍ ଏହି ଐତିହାସକ ବିଜୟ ଦେଇଥିବାବେଳେ ନୀତୀଶଙ୍କୁ ପ୍ରଶଂସାରେ ପୋତିଛି ବିଜେପି । ପାର୍ଟି ଅଫିସରୁ ମୁଖ୍ୟମନ୍ତ୍ରୀଙ୍କ ବାସଭବନ, ସାରା ବିହାରରେ ଛାଇଯାଇଛି ନୀତୀଶ କୁମାରଙ୍କ ଫଟୋ ଥିବା ପୋଷ୍ଟର ବ୍ୟାନର୍ । ଯେଉଁଥିରେ ଲେଖାଅଛି- 'ଟାଇଗର ଅଭି ଜିନ୍ଦା ହୈ' । ୭୪ ବର୍ଷ ବୟସରେ ମଧ୍ୟ ନୀତିଶ ଯୁବକଙ୍କ ଫିଟ୍ ଥିବା ଦର୍ଶାଇଛନ୍ତି । 

୧୯ ବର୍ଷରୁ ଅଧିକ ସମୟ କ୍ଷମତାରେ ରହିଥିଲେ ବି  ଫିକା ପଡିନି ନୀତୀଶଙ୍କ ଚମକ। ତାଙ୍କ ବିରୋଧରେ ସେଭଳି କୌଣସି ବଡ ଅସନ୍ତୋଷ ମଧ୍ୟ ନାହିଁ । ବିଗତ ବର୍ଷରେ ଦଳବଦଳ ପାଇଁ ପଲଟୁରାମ୍‌ ନାଁରେ ଜଣାଶୁଣା ଥିବା ଏ କୁଶଳୀ ରାଜନେତା ଏବେ ବିହାରରେ ୧୦ମ ଥର ମୁଖ୍ୟମନ୍ତ୍ରୀ ଭାବେ ରେକର୍ଡ କରିବାକୁ ଯାଉଛନ୍ତି । 

୨୦୨୦ ନିର୍ବାଚନରେ ଜେଡିୟୁ ୧୧୫ ଆସନରେ ଲଢିଥିବାବେଳେ ୧୧୦ ଆସନରେ ଲଢିଥିଲା ବିଜେପି । କିନ୍ତୁ ଜେଡିୟୁ ୨୦୧୫ରେ ଜିତିଥିବା ୭୧ଟି ଆସନରୁ ୪୩କୁ ଖସିଥିଲା । ହେଲେ ବିଜେପି ୭୪ଟି ଆସନରେ ବିଜୟ ହୋଇଥିଲା । ଚଳିତ ନିର୍ବାଚନରେ ଉଭୟ ଦଳ ମଧ୍ୟରେ ସମାନ ଆସନ ବୁଝାମଣା ହୋଇଥିଲା । ଆଉ ଏଥର ୮୫ଟି  ଆସନ ଜିତି ଦ୍ୱିତୀୟ ବୃହତ୍ତମ ଦଳ ହୋଇଛି ନୀତୀଶଙ୍କ ଜେଡିୟୁ । ବିଜେପି ସର୍ବାଧିକ ୮୯ ଆସନ ହାସଲ କରିଛି ।

୨୦୨୫ ନିର୍ବାଚନ ବିହାର ପାଇଁ ଗୋଟିଏ ଯୁଗର ଅନ୍ତ ସାବ୍ୟସ୍ତ ହୋଇପାରେ । କାରଣ  ପ୍ରାୟ ୨୦ ବର୍ଷ ଧରି ମୁଖ୍ୟମନ୍ତ୍ରୀ ଥିବା ନୀତୀଶ କୁମାରଙ୍କ ଏହା ଶେଷ ନିର୍ବାଚନ ବୋଲି କୁହାଯାଉଛି । ୨୦୦୫ରେ ପ୍ରଥମ ଥର ମୁଖ୍ୟମନ୍ତ୍ରୀ ହୋଇଥିଲେ ନୀତୀଶ କୁମାର ।