Power Play in Mumbai: ମୁମ୍ୱାଇରେ ୮ର ଖେଳ, ପଞ୍ଚତାରକା ହୋଟେଲରେ ଶିନ୍ଦେଙ୍କ କାଉନସିଲର

ମହାରାଷ୍ଟ୍ର ପୌର ନିର୍ବାଚନରେ ବିଜେପି ଏବଂ ଶିବସେନା ଶିନ୍ଦେ ଗୋଷ୍ଠୀ ଏକ ବଡ଼ ବିଜୟ ହାସଲ କରିଛନ୍ତି। ଏଥିମଧ୍ୟରୁ ସବୁଠାରୁ ଗୁରୁତ୍ୱପୂର୍ଣ୍ଣ ଥିଲା ମୁମ୍ବାଇ ବିଏମସି ନିର୍ବାଚନ । ଟିମ୍ ବିଜେପି ୨୫ ବର୍ଷ ପରେ ଠାକରେ ପରିବାରକୁ କ୍ଷମତାରୁ ବାହାର କରି ୨୨୭ ୱାର୍ଡ ବିଶିଷ୍ଟ ବିଏମସିରେ ୧୧୮ ଆସନ ହାସଲ କରିଛି । ଯାହା ସଂଖ୍ୟାଗରିଷ୍ଠତାଠାରୁ ମାତ୍ର ଚାରିଟି ଅଧିକ। ତଥାପି ମେୟର ନିର୍ବାଚନ ପୂର୍ବରୁ କୌଣସି ହେରଫେରକୁ ରୋକିବା ପାଇଁ ୨୯ ଜଣ ଶିବସେନା ଶିନ୍ଦେ କାଉନସିଲରଙ୍କୁ ଏକ ପଞ୍ଚତାରକା ହୋଟେଲରେ ରଖାଯାଇଛି। 

ସାଂସଦ ଏବଂ ବିଧାୟକଙ୍କୁ ନିର୍ବାଚନ ପରେ ହୋଟେଲରେ ରଖାଯିବାର ଅନେକ ନଜିର ରହିଛି ଏଥର ମୁମ୍ୱାଇରେ କାଉନସିଲରମାନଙ୍କୁ ଏକାଠି ରଖିବା ପାଇଁ ହୋଟେଲ-ରିସର୍ଟ ରାଜନୀତି ଆରମ୍ଭ ହୋଇଛି । ମହାୟୁତି ମେଣ୍ଟ ସ୍ପଷ୍ଟ ବହୁମତ ହାସଲ କରିଛି, କିନ୍ତୁ ଯଦି ବିରୋଧୀ ଦଳ ଏକ ହୋଇଯାଆନ୍ତି,  ତେବେ ଏହା ସଂଖ୍ୟାଗରିଷ୍ଠତାରୁ ମାତ୍ର ୮ ସଂଖ୍ୟାରେ ପଛରେ ରହିବ । ଅର୍ଥାତ ଯଦି ୮ ଜଣ କାଉନସିଲର ଏପଟକୁ ଚାଲିଆସିବେ, ତେବେ ଖେଳ ଏପଟସେପଟ ହୋଇଯିବ । 

ମେୟର ନିର୍ବାଚନରେ ବିଜେପି କାଉନସିଲରମାନେ ଏକଜୁଟ ହୋଇ ରହିଛନ୍ତି । ଏହି ଦଳରୁ କ୍ରସଭୋଟିଂ ହେବାର ସମ୍ଭାବନା ମଧ୍ୟ କ୍ଷୀଣ । କିନ୍ତୁ ଯଦି ଶିବସେନା ଏକନାଥ ଶିନ୍ଦେ ଦଳରୁ ୮ ଜଣ ଖସିଯିବେ, ତେବେ ଫଳାଫଳ ବଦଳିଯିବାର ଆଶଙ୍କା ରହିଛି ।  ତେଣୁ ଏକନାଥ ଶିନ୍ଦେ ତାଙ୍କର ସମସ୍ତ ନିର୍ବାଚିତ କାଉନସିଲରଙ୍କୁ ହୋଟେଲକୁ ସ୍ଥାନାନ୍ତର କରିଥିବାର କୁହାଯାଉଛି । 

ସଂଖ୍ୟା ଖେଳ: ପ୍ରକୃତ ଯୁଦ୍ଧ କେଉଁଠି?

ସଂଖ୍ୟାଗରିଷ୍ଠତା ସଂଖ୍ୟା: ୧୧୪
ବିଜେପି + ଶିବସେନା (ଶିନ୍ଦେ): ୧୧୮

ମିଳିତ ବିରୋଧୀ ଦଳ:
ଶିବସେନା (UBT) + କଂଗ୍ରେସ + MNS + NCP (SP) + SP + AIMIM = ୧୦୬
ଏହାର ଅର୍ଥ ସଂଖ୍ୟାଗରିଷ୍ଠତା ଅପେକ୍ଷା ମାତ୍ର ୮ କମ୍।

ଏହି '୮' ଏବେ ମହାରାଷ୍ଟ୍ର ରାଜନୀତିର ସବୁଠାରୁ ବଡ଼ କାହାଣୀ ପାଲଟିଛି। ଏହି ସମ୍ଭାବନାକୁ ନେଇ ରାଜନୈତିକ ମହଲରେ ଜୋରଦାର ଆଲୋଚନା ହେଉଛି। ଯଦି ବିରୋଧୀ ଏକ ମିଳିତ ଦାବି କରନ୍ତି ଏବଂ ଶିନ୍ଦେ ଗୋଷ୍ଠୀ ମଧ୍ୟରେ ବିଭାଜନ ହୁଏ, ତେବେ ପରିସ୍ଥିତି ପରିବର୍ତ୍ତନ ହୋଇପାରେ। ଏହି କାରଣରୁ ଶିନ୍ଦେ ତାଙ୍କ କାଉନସିଲରମାନଙ୍କୁ ଏକ ହୋଟେଲରେ ସୁରକ୍ଷିତ ରଖୁଥିବା ଦେଖାଯାଉଛି। କାରଣ ଉଦ୍ଧବ ଠାକରେ ଚୁପ୍ ହୋଇ ବସି ନପାରନ୍ତି ବୋଲି କୁହାଯାଉଛି । 

୮ ଜଣ AIMIM କାଉନସିଲର 

ଏଥର ୮ ଜଣ AIMIM କାଉନସିଲର BMC କୁ ନିର୍ବାଚିତ ହୋଇଛନ୍ତି। ଏହାକୁ ଦଳ ପାଇଁ ଏକ ବଡ଼ ସଫଳତା ବୋଲି ବିବେଚନା କରାଯାଉଛି। ଦଳ ମୁମ୍ବାଇର ହୋଟେଲ ଟ୍ରାଇଡେଣ୍ଟରେ ଏହାର ପ୍ରଥମ ରଣନୀତି ବୈଠକ ଡାକିଛି, ଯେଉଁଥିରେ ନବନିର୍ବାଚିତ AIMIM କାଉନସିଲର, ହାଇଦ୍ରାବାଦର ବରିଷ୍ଠ ବିଧାୟକ ଅହମ୍ମଦ ବିନ୍ ଅବଦୁଲ୍ଲା ବଲାଲା ଏବଂ ଦଳର ସଭାପତି ଅସଦୁଦ୍ଦିନ ଓୱେସି ଭିଡିଓ କନଫରେନ୍ସିଂ ମାଧ୍ୟମରେ ଯୋଗଦେବେ। ଏହି ବୈଠକରେ ଭବିଷ୍ୟତ ରଣନୀତି ଏବଂ ଗୃହରେ AIMIM ର ଭୂମିକା ନିର୍ଣ୍ଣୟ କରାଯିବ।