Bangladesh Election: ବାଂଲାଦେଶରେ ଚାଲିଛି ଭୋଟିଂ, ରେଜଲ୍ଟ ଉପରେ ବିଶ୍ବର ନଜର୍

ଭୋଟ୍ ଦେଉଛି ବାଂଲାଦେଶ। ୩୦୦ ଆସନ ପାଇଁ ପ୍ରାୟ ୧୩ କୋଟି ଭୋଟର କରୁଛନ୍ତି ​​ମତଦାନ। ବାଂଲାଦେଶରେ ୩୫୦ ସଦସ୍ୟ ବିଶିଷ୍ଟ ସଦନ ରହିଥିବାବେଳେ ୩୦୦ ଜଣ ଜାତୀୟ ନିର୍ବାଚନ ମାଧ୍ୟମରେ ଏକକ ଆସନ ବିଶିଷ୍ଟ ନିର୍ବାଚନମଣ୍ଡଳୀରୁ ସିଧାସଳଖ ନିର୍ବାଚିତ ହୁଅନ୍ତି।

ଏଥର ମଇଦାନରେ  BNP ଏବଂ ଜମାତ ସମେତ ୫୧ଟି ଦଳର ମୋଟ ଏକ ହଜାର ୯୮୧ ଜଣ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଛନ୍ତି।  ଅପରାହ୍ନ ସାଢେ ୪ଟା ପର୍ଯ୍ୟନ୍ତ ଭୋଟିଂ ହେବା ପରେ ଗଣତି ଆରମ୍ଭ ହେବ। ଏଥର ଭିନ୍ନ ନିର୍ବାଚନ ଦେଖୁଛି ବାଂଲାଦେଶ। କାରଣ ଦଶନ୍ଧି ପରେ ପ୍ରଥମ ଥର ପାଇଁ ଦେଶର ଦୁଇ ପ୍ରମୁଖ ରାଜନୈତିକ ବ୍ୟକ୍ତି, ଶେଖ୍ ହସିନା ଏବଂ ଖାଲିଦା ଜିଆ ନିର୍ବାଚନରେ ​​ପ୍ରତିଦ୍ୱନ୍ଦ୍ୱିତା କରୁନାହାନ୍ତି।

ଗତବର୍ଷ ବାଂଲାଦେଶ ବିଦ୍ରୋହ ଶେଖ୍ ହସିନାଙ୍କ ଆୱାମୀ ଲିଗ୍ ସରକାରକୁ ପରାଜିତ କରିଥିଲା। ସେବେଠାରୁ ହସିନା ଭାରତରେ ଆଶ୍ରୟ ନେଇଛନ୍ତି। ହସିନାଙ୍କ ଆୱାମୀ ଲିଗକୁ ନିଷିଦ୍ଧ କରାଯାଇଛି। ତାରିକ ରହମାନଙ୍କ ନେତୃତ୍ୱରେ ବାଂଲାଦେଶ ନ୍ୟାସନାଲିଷ୍ଟ ପାର୍ଟି BNP ଏବଂ ଜମାତ-ଏ-ଇସଲାମିକ ନେତୃତ୍ୱରେ ୧୧-ଦଳୀୟ ମେଣ୍ଟ କରିଛି।

ଏହି ନିର୍ବାଚନ କେବଳ ବାଂଲାଦେଶ ପାଇଁ ନୁହେଁ ବରଂ ଦକ୍ଷିଣ ଏସୀୟ ଦେଶଗୁଡ଼ିକ ପାଇଁ ମଧ୍ୟ ଗୁରୁତ୍ୱପୂର୍ଣ୍ଣ। ଏଣୁ ରେଜଲ୍ଟ ଉପରେ ସାରା ବିଶ୍ବର ନଜର ରହିଛି। ଶେଖ୍ ହସିନା ଭାରତରେ ଆଶ୍ରୟ ନେବାପରେ ବାଂଲାଦେଶ ସହିତ ଭାରତର ସମ୍ପର୍କକୁ ତିକ୍ତ କରିଛି।  ଭାରତ ଏବଂ ବାଂଲାଦେଶ ମଧ୍ୟରେ କ୍ରିକେଟକୁ ନେଇ ମଧ୍ୟ ବିବାଦ ହୋଇଥିଲା।

T20 କ୍ରିକେଟ୍ ବିଶ୍ୱକପ୍ ସମୟରେ ବାଂଲାଦେଶ ଭାରତରେ ମ୍ୟାଚ୍ ଖେଳିବାକୁ ମନା କରିଥିଲା, ଯାହା ଫଳରେ ବାଂଲାଦେଶ ଟୁର୍ଣ୍ଣାମେଣ୍ଟରୁ ଓହରି ଯିବାକୁ ବାଧ୍ୟ ହୋଇଥିଲା। ସେପଟେ ପାକିସ୍ତାନ ସହିତ ବାଂଲାଦେଶର ସମ୍ପର୍କରେ ଉନ୍ନତି ହୋଇଛି। ମହମ୍ମଦ ୟୁନୁସଙ୍କ ମଧ୍ୟବର୍ତ୍ତୀକାଳୀନ ସରକାର ଅଧୀନରେ, ବାଂଲାଦେଶର ଚୀନ୍ ସହିତ ରଣନୈତିକ ସମ୍ପର୍କ ମଧ୍ୟ ମଜବୁତ ହୋଇଛି।

ଫଳସ୍ୱରୂପ ଭାରତ, ପାକିସ୍ତାନ ଏବଂ ଚୀନ୍ ବାଂଲାଦେଶରେ ଆଗାମୀ ନିର୍ବାଚନ ଉପରେ କଡ଼ା ନଜର ରଖିଛନ୍ତି। ଭାରତ ଚାହୁଁଛି ନିର୍ବାଚନ ପରେ ବାଂଲାଦେଶରେ ଏପରି ଏକ ସରକାର ଗଠନ ହେଉ ଯାହା ଦୁଇ ଦେଶ ମଧ୍ୟରେ ସମ୍ପର୍କକୁ ଉନ୍ନତ କରିପାରିବ। ନିର୍ବାଚନରେ ହିନ୍ଦୁ ଭୋଟ୍ ନିର୍ଣ୍ଣାୟକ ହୋଇପାରେ।