Jagannath Mahaprasad Online: କାର୍ତ୍ତିକରେ ସ୍ପେଶାଲ୍ ଅଫର୍... ଅନଲାଇନରେ ମହାପ୍ରସାଦ ! ଆକ୍ସନ ନେଲା ଶ୍ରୀମନ୍ଦିର ପ୍ରଶାସନ

ମହାପ୍ରଭୁଙ୍କୁ ଅପମାନ... କୋଟି କୋଟି ଜଗନ୍ନାଥ ପ୍ରେମୀଙ୍କ ଭାବାବେଗକୁ କୁଠାରଘାତ । କାର୍ତ୍ତିକ ମାସରେ ଅନଲାଇନରେ ମିଳିବ ଶ୍ରୀମନ୍ଦିର ଅନ୍ନପ୍ରସାଦ ! ମହାପ୍ରଭୁଙ୍କ ମହାପ୍ରସାଦକୁ ଅନଲାଇନ ଡେଲିଭରି କରିବ ଫୁଡ୍ ଡେଲିଭରି କମ୍ପାନି । ଏଭଳି କିଛି ବିଜ୍ଞାପନ ସାମ୍ନାକୁ ଆସିବା ପରେ ଆକ୍ସନ ନେଇଛି ଶ୍ରୀମନ୍ଦିର ପ୍ରଶାସନ । 

ଦେଶର ଏକ ବଡ ଅନଲାଇନ ଖାଦ୍ୟ ଡେଲିଭରୀ କଂପାନୀ ଅନଲାଇନରେ ଅନ୍ନପ୍ରସାଦ ମିଳିବା ନେଇ ବିଜ୍ଞାପନ ଦେଇଥିଲା । ମହାପ୍ରଭୁଙ୍କ ଶ୍ରୀମନ୍ଦିରର ଅନ୍ନପ୍ରସାଦ ବା ଅବଢା ଅନଲାଇନରେ ଯୋଗାଇ ଦେବାକୁ ବିଜ୍ଞାପନ ଦେଇଥିଲା ଏହି ସଂସ୍ଥା । କେବଳ ଅବଢ଼ା ନୁହେଁ ମାଆ ତାରିଣୀଙ୍କ ଅନ୍ନପ୍ରସାଦ, ବାବା ଆଖଣ୍ଡଳମଣିଙ୍କ ଅନ୍ନପ୍ରସାଦ ଓ ପ୍ରସାଦମ୍ ଟେମ୍ପୁଲ୍ ଅନ୍ନପ୍ରସାଦ ମାତ୍ର ୪୯ ଟଙ୍କାରେ ମିଳିବ ବୋଲି ବିଜ୍ଞାପନରେ ଦର୍ଶାଯାଇଥିଲା।  

କାର୍ତ୍ତିକ ମାସ ପାଇଁ ଏହି ଅଫର ରଖିଛି ଅନଲାଇନ ଖାଦ୍ୟ ଡେଲିଭରୀ ଆପ୍ । ସୋସିଆଲ ମିଡିଆରେ ଏଭଳି ଏକ ପୋଷ୍ଟ ଭାଇରାଲ୍ ହେବା ପରେ ସବୁଠି ଦେଖିବାକୁ ମିଳିଥିଲା ଅସନ୍ତୋଷ । ଯାହା ଉପରେ ଆକ୍ସନ ନେଇଛି ଶ୍ରୀମନ୍ଦିର ପ୍ରଶାସନ  । କମ୍ପାନୀ ବିରୋଧରେ ରୁଜୁ ହୋଇଥିଲା ଏତଲା । ଉକ୍ତ ଫୁଡ୍ ଡେଲିଭରି ସଂସ୍ଥା ବିରୋଧରେ ପୁରୀ ସାଇବର ଥାନାରେ ଏତଲା ଦେବାକୁ ନିର୍ଦ୍ଦେଶ ଦେଇଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ । 

ଅନଲାଇନରେ ପ୍ରସାଦ ବିକ୍ରି କରି ଜଗନ୍ନାଥଙ୍କୁ ଅପମାନ କରାଯାଉଛି । ଏଭଳି ବିକ୍ରି ପାଇଁ କୌଣସି ଅନୁମତି ଦିଆଯାଇନି। ଲୋକଙ୍କୁ ବିଭ୍ରାନ୍ତ କରିବାକୁ ସଂସ୍ଥା ଶ୍ରୀମନ୍ଦିରର ଫଟୋ ଲଗାଇ ଏମିତି ବିଜ୍ଞାପନ ଦେଇଛି । ତୁରନ୍ତ ଏ ବିଜ୍ଞାପନକୁ ଅପସାରଣ ପାଇଁ ଗୁରୁତ୍ବ ଦିଆଯାଉଥିବା କହିଛନ୍ତି ଶ୍ରୀମନ୍ଦିର ସୁରକ୍ଷା ପ୍ରଶାସକ ହେମନ୍ତ କୁମାର ପାଢୀ । ତେବେ ଏନେଇ ସଂପୃକ୍ତ ଖାଦ୍ୟ ଡେଲିଭରୀ ସଂସ୍ଥା ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନି ।

ମହାପ୍ରସାଦକୁ ଅସମ୍ମାନ କରାଯିବାର ଏହା ପ୍ରଥମ ଘଟଣା ନୁହେଁ । କେତେବେଳେ ହୋଟେଲ୍‌ରେ ଅବଢା ପହଞ୍ଚିଲାଣି ତ କିଏ ଚପଲ ପିନ୍ଧି ଖାଇବାର ଚିତ୍ର ପୂର୍ବରୁ ଆସିଛି ସାମ୍ନାକୁ । ବର୍ତ୍ତମାନ ସମ୍ପୃକ୍ତ ଫୁଡ୍ ଡେଲିଭରି କମ୍ପାନୀ ଉପରେ କି କାର୍ଯ୍ୟାନୁଷ୍ଠାନ ହେଉଛି, ଦେଖିବା ବାକି ରହିଲା...