Odisha MLAs Get: ଥରେ ଜିତିଲେ ମାଲାମାଲ୍ , ବିଧାୟକଙ୍କ ଦରମା ୩ ଶହ ୮ କୋଟି ...

ଗରିବ ଓଡ଼ିଶାର କୋଟିପତି ବିଧାୟକ । ମାସକୁ ଦରମା ନେବେ ସାଢ଼େ ୩ ଲକ୍ଷ । ବର୍ଷକୁ ୪୨ ଲକ୍ଷ, ୫ ବର୍ଷରେ ୨ କୋଟି ୧୦ ଲକ୍ଷ । ଏକା ଥରେ ବିଧାୟକଙ୍କ ଦରମା ବଢ଼ିଲା ସାଢ଼େ ତିନି ଗୁଣା । ୧ ଲକ୍ଷରୁ ହୋଇଗଲା ସାଢ଼େ ୩ ଲକ୍ଷ ଟଙ୍କା । ସାରା ଭାରତ ଭିତରେ ଓଡ଼ିଶାର ବିଧାୟକମାନେ ସର୍ବାଧିକ ଦରମା ପାଇବାକୁ ଯାଉଛନ୍ତି । ଲୋକ ପ୍ରତିନିଧି ହୋଇ ଲୋକଙ୍କ ନାଁ ନେଇ ମାସକୁ ହାତେଇବେ ସାଢ଼େ ତିନି ଲକ୍ଷ ଟଙ୍କା । ପୂର୍ବରୁ ରାଜ୍ୟ ଗୁଡ଼ିକ ତୁଳନାରେ ଓଡ଼ିଶା ବିଧାୟକଙ୍କ ଦରମା ଥିଲା ୨୭ ନମ୍ବର, ହେଲେ ବର୍ତ୍ତମାନ ନମ୍ବର ୱାନ୍ ହୋଇଛି । ସବୁଠାରୁ ବଡ଼ କଥା ହେଉଛି, ବିଧାୟକଙ୍କ ବୃଦ୍ଧି ପାଇଥିବା ଏହି ଦରମା ପିଛିଲା ଭାବେ ଲାଗୁ ହେଉ ଥିବାରୁ ଏକା ବେଳକେ ଜଣେ ବିଧାୟକ ୩୦ରୁ ୪୦ ଲକ୍ଷ ଟଙ୍କା ପାଇବେ । 

ପାଚିକାଟିଏ ହେଉ କି ଶିକ୍ଷକ କି ଅନ୍ୟ କୌଣସି ସରକାରୀ କର୍ମଚାରୀ, ଏମାନେ ବର୍ଷ ବର୍ଷ ଧରି ଧରି ମାଗଣାରେ ରାଜ୍ୟ ପାଇଁ ଖଟି ଆସିଛନ୍ତି । ବର୍ତ୍ତମାନ ପାଚିକା ୩ ହଜାର ଟଙ୍କା ପାଉଥିବା ବେଳେ ଶିକ୍ଷକଟିଏ ୧୫ ହଜାରୁ ୪୫ ହଜାର ଟଙ୍କା ମଧ୍ୟରେ ପାଉଛି । ଆଉ ରାଜ୍ୟରେ ବେକାରୀଙ୍କ ସଂଖ୍ୟା ନକହିବା ଭଲ । ଜଣେ ବିଧାୟକ ଯଦି ୫ ବର୍ଷରେ ୨ କୋଟି ୧୦ ଲକ୍ଷ ଟଙ୍କା ଦରମା ନିଅନ୍ତି ତେବେ ବିଧାନସଭାର ୧୪୭ ବିଧାୟକ ୩୦୮କୋଟି ୭୦ ଲକ୍ଷ ଟଙ୍କା  ଦରମା ନେବେ । ଏହା କ’ଣ ରାଜ୍ୟ ପାଇଁ ଅତିରିକ୍ତ ବୋଝ ହେବ ନାହିଁକି ବୋଲି ସାଧାରଣରେ କୁହାଗଲାଣି । 

୨୦୦୭ରେ ବିଜେଡି ସରକାର ଅମଳରୁ ଏହି ଦାବି ହୋଇଆସୁଥିଲା । ଯାହା ଉପରେ ମୋହର ମାରିଛନ୍ତି ବର୍ତ୍ତମାନର ମୋହନ ସରକାର । ହେଲେ ଏହି ବିଲ୍ ଉପସ୍ଥାପନ ବେଳେ ଉଭୟ ଶାସକ ଓ ବିରୋଧୀଙ୍କ ସ୍ବର ଏକ ହୋଇଥିବା ଦେଖିବାକୁ ମିଳିଥିଲା । ତଥ୍ୟ ଅନୁସାରେ, ବିଧାୟକଙ୍କ ମୂଳ ଦରମା ୩୫ ହଜାରରୁ ବଢ଼ି ୯୦ ହଜାରକୁ ବୃଦ୍ଧି ପାଇଛି । ସେହିଭଳି ଗସ୍ତ ଖର୍ଚ୍ଚ ବାବଦକୁ ୨୦ ହଜାର ବଦଳରେ ୭୫ ହଜାରକୁ ବଢ଼ିଛି । କମିଟି ବୈଠକ ଭତ୍ତା ୧୫୦୦ ବଦଳରେ ମିଳିବ ୩ ହଜାର ଏବଂ ମାସିକ ଯାତାୟାତ ଭତ୍ତା ୧୫ ହଜାର ବଦଳରେ ମିଳିବ ୫୦ ହଜାର ।