Migrant Workers Tragic End: କି ଦୁଃଖ ! ମିଳିଲାନି ସ୍ବାମୀର ଶବ ...ପାଳ ପୋଡ଼ି ବିଧବା ହେଲେ

ଦାଦନ ଶ୍ରମିକର ଯନ୍ତ୍ରଣାକୁ ନେଇ ଅନେକ ଘଟଣା ତ ଆପଣ ଶୁଣିଥିବେ । କେତେବେଳେ ଦାଦନଟିଏ ରୋଜଗାର ଆଶାରେ ଯାଇ ନିର୍ଯାତିତ ହୁଏ ତ ଆଉ କେତେବେଳେ ଶବ ହୋଇ ଫରେ । ହେଲେ ଏ ଘଟଣା ଟିକେ ଭିନ୍ନ । ସ୍ୱାମୀକୁ ଖୋଜି ଖୋଜି ସ୍ତ୍ରୀ ପହଞ୍ଚିଛି ପୋଲିସ ପୋତିଥିବା ଶବ ପାଖରେ । ଶବ ଉପରୁ ଧୂଳି ମାଟି ନେଇ ଫେରିଛି ଗାଁକୁ । ଅତି ଦୁଃଖଦ, ହୃଦୟ ବିଦାରକ ଏ ଘଟଣା...

କାନ୍ଦବୋବାଳିରେ ଫାଟିପଡୁଛି ଘର । ଛାତି ଫଟାଇ କାନ୍ଦୁଛି ସ୍ତ୍ରୀ । ଦି' ପଇସା ରୋଜଗାର ଆଶାରେ ଦାଦନ ଖଟି ଯାଇଥିଲେ ସ୍ୱାମୀ । ସ୍ୱାମୀ ତ ଆଉ ଆସିଲେନି, ଆସିଲା ତାଙ୍କର ମୃତ୍ୟୁ ଖବର । ହେଲେ ଅଭାଗିନୀ ଏ ସ୍ତ୍ରୀକୁ ସ୍ୱାମୀର ଶବ ବି ମିଳିଲା ନାହିଁ । ଶେଷରେ ପାଳ ନଡାରେ ସ୍ୱାମୀର ପ୍ରତିକାତ୍ମକ ଛବି କରି କରାଗଲା ଅନ୍ତିମ ସତ୍କାର ।

ଗଞ୍ଜାମ ଜିଲ୍ଲା ଦିଗପହଣ୍ଡି ବ୍ଲକ ବି.ତୁରୁବୁଡି ଗାଁର ବଳରାମ ଗଉଡ଼ । ଦାଦନ ଖଟିବାକୁ ଯାଇଥିଲେ ମୁମ୍ବାଇ । ସେଠି କୋଠାବାଡି ନିର୍ମାଣରେ ମଜୁରିଆ ଭାବେ କାମ କରୁଥିଲେ । ହଠାତ୍ ବଳରାମଙ୍କ ଦେହ ଖରାପ ହେଲା । ତାଙ୍କର ଚିକିତ୍ସା ପାଇଁ କେହି ସହଯୋଗ କଲେନି । ଶେଷରେ ଅସୁସ୍ଥ ଅବସ୍ଥାରେ ସେ ନଭେମ୍ବର ୮ ତାରିଖ ଦିନ ଟ୍ରେନ ଯୋଗେ ଗାଁକୁ ଫେରୁଥିଲେ । ହେଲେ କୌଣସି କାରଣରୁ ତେଲେଙ୍ଗାନା ତନ୍ଦୁର ଷ୍ଟେସନରେ ଓହ୍ଲାଇ ପଡ଼ିଥିଲେ ବଳରାମ । ସେବେଠୁ ତାଙ୍କର ଆଉ ଖୋଜଖବର ପାଇନଥିଲେ ପରିବାର ଲୋକେ ।
ସେପଟେ ତନ୍ଦୁର ଷ୍ଟେସନଠାରୁ କିଛି ଦୂରରୁ ରେଲୱେ ପୋଲିସ ବଳରାମଙ୍କ ମୃତଦେହ ପାଇଥିଲା । ଦୁଇ ତିନି ଦିନ ଅପେକ୍ଷା କରିବା ପରେ ଅଜଣା ଶବ ଭାବେ ପୋତି ଦେଇଥିଲା । 
ମାସେ ଧରି ଖୋଜାଖୋଜି କରିବା ପରେ ବଳରାମଙ୍କ ସ୍ତ୍ରୀ ଓ ସାନଭାଇ ପହଞ୍ଚିଥିଲେ ତେଲେଙ୍ଗାନା ତନ୍ଦୁର ରେଲୱେ ପୋଲିସ ଷ୍ଟେସନ । ସେଠି ବଳରାମଙ୍କ ମୃତଦେହ ଠାବ ଦିନର ଫଟୋ ଦେଖି ହତବାକ୍ ହୋଇଯାଇଥିଲେ । ପୋଲିସଠାରୁ ଜାଣିବାକୁ ପାଇଲେ ଯେ ଅଚିହ୍ନା ମୃତଦେହ ଭାବି ବ୍ୟବଚ୍ଛେଦ କରାଯିବା ପରେ ପୋତିଦେଇଛି । ଏହାପରେ ଅସହାୟ ସ୍ତ୍ରୀ, ସ୍ୱାମୀ ପୋତା ହୋଇଥିବା ସ୍ଥାନରୁ ଧୂଳି ମାଟି ନେଇ ଗାଁକୁ ଫେରିଥିଲେ ଓ ଗାଁରେ ପାଳ ନଡାରେ ପ୍ରତିକାତ୍ମକ ଛବି କରି ଶେଷକୃତ୍ୟ କରିଥିଲେ । 

ଏ ଘଟଣା ସମଗ୍ର ଅଞ୍ଚଳରେ ଶୋକର ଛାୟା ଖେଳାଇଛି । ବଳରାମଙ୍କ ପରିବାର ଅତ୍ୟନ୍ତ ଗରିବ ହୋଇଥିବାରୁ ତାଙ୍କୁ ସରକାରୀ ସହାୟତା ଯୋଗାଇ ଦେବାକୁ ଦାବି କରିଛନ୍ତି ସ୍ଥାନୀୟ ସରପଞ୍ଚ ।