Odisha’s Gajapati: ଗଜପତିରେ ହାହାକାର, ସବୁ ଛାରଖାର...ପ୍ରକୃତିର କରାଳ ରୂପ

ଭୟଙ୍କର… ଅତି ଭୟଙ୍କର । ପ୍ରକୃତିର ଇଏ କରାଳ ରୂପ । ମାତ୍ର କିଛି ସମୟରେ ସବୁ ଛିନଛତ୍ର ସବୁ ଛାରଖାର ।ଉତ୍ତରାଖଣ୍ଡକୁ ଯେମତି ବଳିଯାଇଛି ଓଡ଼ିଶାରେ ବର୍ଷାର ତାଣ୍ଡବ ! ପ୍ରକୃତିର ଏ କରାଳ ରୂପ ଆଗରେ କଲବଲ ହେଉଛନ୍ତି ସମସ୍ତେ । ଗଜପତି ଜିଲ୍ଲା ଆର.ଉଦୟଗିରୀ ଅଞ୍ଚଳରେ ପ୍ରବଳରୁ ଅତି ପ୍ରବଳ ବର୍ଷା ହେବା ଯୋଗୁଁ ସବୁ କିଛି ଏବେ ଜଳମଗ୍ନ । ପଟ୍ଟନାୟକ କଲୋନୀ ଶଙ୍ଖ ନଦିର ବନ୍ୟା ପାଣି ପଶିବା ଫଳରେ ଉପୁଜିଛି ଏଭଳି ଅବସ୍ଥା । 

ଦାଣ୍ଡରେ ଥିବା କାର୍ ଗୁଡ଼ିକ ବୁଡି ଯାଇଛି l ପୋଲ ଉପରେ ଚାଲୁଛି ଫୁଟେ ଉଚ୍ଚର ପାଣି l ଘରେ ଘରେ ପାଣି ପଶିବା ପରେ ପ୍ରାୟ ୩୬ କଲୋନୀ ବାସିନ୍ଦା ଘର ଛାଡ଼ି ସ୍ଥାନୀୟ କଲ୍ୟାଣ ମଣ୍ଡପରେ ଆଶ୍ରୟ ନେଉଛନ୍ତି  l ହେଲେ ପ୍ରଶାସନ ପକ୍ଷରୁ ପ୍ରଭାବିତ ଲୋକଙ୍କ ପ୍ରତି କୌଣସି ବ୍ୟବସ୍ଥା ଗ୍ରହଣ କରାଯାଇ ନଥିବା ଅଭିଯୋଗ ହୋଇଛି l ସେପଟେ ଘୋଡ଼ାଶାଳ ନଦୀର ଜଳ ବୃଦ୍ଧି ପାଇବା ପରେ ଗାଁର ନିତ୍ୟାନନ୍ଦ ପ୍ରଧାନଙ୍କ ଦୁଇଟି ବଳଦ ବନ୍ୟା ପାଣିରେ ଭାସିଯାଇଛି l 

କେବଳ ଏତିକି ଯେ ତା’ ନୁହେଁ, ଲଗାଣ ବର୍ଷାରେ ଆର୍. ଉଦୟଗିରୀ ଠାରୁ ପରିମଳ ଓ ସମ୍ବଲପୁରକୁ  ଯୋଗାଯୋଗ ବିଚ୍ଛିନ୍ନ ହୋଇଛି l ଘୋଡ଼ାଶାଳ ପୋଲ ନିକଟରେ ଲଗାଣ ବର୍ଷାରେ ମୁଖ୍ୟ ରାସ୍ତାଟି ଧୋଇ ଯିବା ଫଳରେ ନୂଆଗଡ ବ୍ଲକର ୫ ଖଣ୍ଡ ପଂଚାୟତକୁ ଯୋଗାଯୋଗ ବିଚ୍ଛିନ୍ନ ହୋଇଛି l ଆର.ଉଦୟଗିରୀରେ ଏତିକିରେ ସରିନି ପ୍ରକୃତିର କରୋଳ ରୂପ । ପ୍ରବଳ ବର୍ଷା କାରଣରୁ ପାହାଡ଼ରୁ ମାଟି ଅତଡ଼ା ଖସିଛି । ଘାଟିରେ ଗଛ ପଡି ରାସ୍ତା ଅବରୋଧ ହୋଇ ଯାତାୟାତ ବାଧାପ୍ରାପ୍ତ ହୋଇଛି l ଏବେ ବି ଗଜପତି ଜିଲ୍ଲା ମୋହନା ଅଞ୍ଚଳରେ ବର୍ଷା ଲାଗିରହିଛି l ୨୪ ଘଣ୍ଟାରୁ ଅଧିକ ସମୟ ହେବ ଲୋକେ ଦେଖୁଛନ୍ତି ଅବିଶ୍ରନ୍ତ ବର୍ଷାର ସେ ଭୟଙ୍କର ରୂପ । 

 ବର୍ଷା ଯୋଗୁଁ ଗରଦମା ପଂଚାୟତ  ଦୂର୍ଦୁମା ଘାଟିରେ ପାହାଡ଼ରୁ ମାଟି ଅତଡ଼ା ଖସିବା ସହ ଘାଟିରେ ଗଛ ପଡି ପାଣିଗଣ୍ଡା ଠାରୁ ରାୟଗଡ଼ା ଜିଲ୍ଲା ଚନ୍ଦ୍ରପୁରକୁ ସଂଲଗ୍ନ କରୁଥିବା ରାସ୍ତାରେ ଗାଡି ଚଳାଚଳ ବାଧାପ୍ରାପ୍ତ ହୋଇଛି l ସେପଟ ବିଭିନ୍ନ ଅଞ୍ଚଳରେ ବର୍ଷା ଲାଗିରହିଛି l