Free Treatment Hurdles to End Soon: ଆକ୍ଟିଭ୍ ହେଉନି କାର୍ଡ କି ମିଳୁନି ମାଗଣା ଚିକିତ୍ସା, ୩ ଦିନରେ ସମାଧାନ ହୋଇଯିବ କହିଲେ ସ୍ବାସ୍ଥ୍ୟମନ୍ତ୍ରୀ

ଆୟୁଷ୍ମାନ କାର୍ଡକୁ ଧରି ହନ୍ତସନ୍ତ ରୋଗୀ । ବୁଲୁଛନ୍ତି ଏ ହସ୍ପିଟାଲରୁ ସେ ହସ୍ପିଟାଲ । ନବରଙ୍ଗପୁର ଜିଲ୍ଲା ଝରିଗାଁର ଡି. ଶୁଭୁରାଜଙ୍କ ସ୍ତ୍ରୀ ପଦ୍ମିନୀ । ଗଲା ୮ମାସ ହେଲା ସ୍ୱାସ୍ଥ୍ୟ ଭଲ ନାହିଁ, ଅନବରତ ଭାବେ ଋତୁସ୍ରାବ ହେଉଛି ।  ଚିକିତ୍ସା ପାଇଁ ପଡୋଶୀ ଛତିଶଗଡର ଜଗଦଲପୁର ଏବଂ ଆନ୍ଧ୍ରପ୍ରଦେଶର ବିଶାଖାପାଟଣାରେ ଚିକିତ୍ସା ହୋଇ ଖର୍ଚ୍ଚାନ୍ତ ହୋଇଛନ୍ତି ।

ଆୟୁଷ୍ମାନ କାର୍ଡ ଆକ୍ଟିଭ ନଥିବା ଯୋଗୁଁ ଅସ୍ତ୍ରୋପଚାର କରିପାରୁନାହାନ୍ତି। ପୂର୍ବରୁ ପଦ୍ମିନୀ ଶୁଭୁରାଜଙ୍କ BSKY କାର୍ଡ ଥିଲା । ହେଲେ ବର୍ତ୍ତମାନ ଆୟୁଷ୍ମାନ କାର୍ଡରେ ବଦଳି ହୋଇପାରୁନାହିଁ ।  ଯାହା ଫଳରେ ସମସ୍ୟା ହେଉଛି ।

ଆୟୁଷ୍ମାନ କାର୍ଡକୁ ନେଇ ହନ୍ତସନ୍ତ ରୋଗୀ

ସମାନ ଅଭିଯୋଗ ରାୟଗଡ଼ା ଜିଲ୍ଲା ମୁନିଗୁଡା ବ୍ଲକ ଦୋରାଗାଁର ଡ଼ମ୍ବୁରଧର ପୂଜାରୀଙ୍କର ।  କର୍କଟ ରୋଗରେ ପୀଡିତ ଡମ୍ବୁରୁଧର ଚିକିତ୍ସା ପାଇଁ ଆନ୍ଧ୍ରପ୍ରଦେଶର ଏକ ଘରୋଇ ହସ୍ପିଟାଲରେ ଭର୍ତ୍ତି ହୋଇଥିଲେ । ଆୟୁଷ୍ମାନ କାର୍ଡ କାମ ନଦେବାରୁ  ୭୦ ହଜାର ଟଙ୍କାରୁ ଉର୍ଦ୍ଧ୍ବ ଖର୍ଚ୍ଚ କରିବା ସତ୍ତ୍ବେ କୌଣସି ଉପାୟ ନପାଇ ଘରକୁ ଫେରିଲେ । କିଛି ଦିନ ପରେ ଡ଼ମ୍ବୁରଙ୍କ ଦେହାନ୍ତ ହୋଇଥିବା ଅଭିଯୋଗ କରିଛନ୍ତି ତାଙ୍କ ସାନ ପୁଅ ।  

ସେହିପରି ଛତିଶଗଡ଼ରେ ଆୟୁଷ୍ମାନ କାର୍ଡ କାମ କରୁନଥିବାରୁ ମେଡିକାଲ ଫେରାଇ ଦେଇଥିବା ଅଭିଯୋଗ ଆଣିଛନ୍ତି ଉମରକୋଟର ବରିଷ୍ଠ ନାଗରିକ ଦ୍ରୌପଦୀ ତ୍ରିପାଠୀ । ପାରାଲିସସ ରୋଗରେ ଆକ୍ରାନ୍ତ ଦ୍ରୌପଦୀ  ଚିକିତ୍ସା ଅବହେଳାରୁ ଏବେ ଶଯ୍ୟା ଶାୟୀ ।  

ଏପଟେ ସାସ୍ଥ୍ୟ ମନ୍ତ୍ରୀ  କହିଛନ୍ତି ଆୟୁଷ୍ମାନ ଯୋଜନାକୁ ନେଇ ସମସ୍ତ ସମସ୍ୟାର ସମାଧାନ ଆସନ୍ତା ୩ ଦିନରେ ହେବ । ଆଜି ଆୟୁଷ୍ମାନ ଭାରତ ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା (AB-PMJAY) ଓ ଆୟୁଷ୍ମାନ ଭାରତ ଡିଜିଟାଲ ମିଶନ (ABDM) ସମ୍ପର୍କରେ ଦୁଇ ଦିନିଆ ଚିନ୍ତନ ଶିବିର ଆୟୋଜିତ ହୋଇଥିଲା । ଏହି ଶିବିରରେ ଯୋଜନାର କାର୍ଯ୍ୟାନ୍ୱୟନ, କାର୍ଡ ତିଆରି ପ୍ରକ୍ରିୟା ଓ ଡିଜିଟାଲ ସୁବିଧା ନେଇ ଆଲୋଚନା କରାଯାଇଛି ।

ଶିବିରରେ ଯୋଗ ଦେଇ ମନ୍ତ୍ରୀ କହିଛନ୍ତି ଯେ, ଆୟୁଷ୍ମାନ ଭାରତ କାର୍ଡ ସମ୍ପର୍କିତ ସମସ୍ତ ସମସ୍ୟା ଖୁବଶୀଘ୍ର ସମାଧାନ ହେବ । ଯେଉଁ ଯୋଗ୍ୟ ଲାଭାର୍ଥୀ ମାନଙ୍କର ଏ ପର୍ଯ୍ୟନ୍ତ କାର୍ଡ ହୋଇନାହିଁ, ସେମାନେ ଡିଜିଟାଲ ମାଧ୍ୟମରେ ନିଜ ତଥ୍ୟ ଦେଖିପାରିବେ ଓ ଆବେଦନର ସ୍ଥିତି ଜାଣିପାରିବେ । ଆଗାମୀ ଦିନରେ ଆୟୁଷ୍ମାନ ଭାରତ ସଂପର୍କିତ ସମସ୍ତ ଡାଟା ଓଡ଼ିଆ ଭାଷାରେ ଉପଲବ୍ଧ ହେବ, ଯାହା ଫଳରେ ସାଧାରଣ ଲୋକଙ୍କୁ ଯୋଜନା ବୁଝିବା ଓ ସୁବିଧା ନେବା ଅଧିକ ସହଜ ହେବ ।