Bid to Reclaim BJD's Lost Glory: ବିଜେଡିର ପଦଯାତ୍ରା: ହଜିଯାଇଥିବା ଗୌରବ ଫେରିପାଇବାକୁ ପ୍ରାଣମୂର୍ଚ୍ଛା ପ୍ରୟାସ

୨୦୦୦ ରୁ ୨୦୨୪ — ଏହି ଲମ୍ବା ସମୟ ଶାସନରେ ରହିବା ପରେ ଓଡ଼ିଶାର ଆଞ୍ଚଳିକ ରାଜନୈତିକ ଦଳ ବିଜୁ ଜନତା ଦଳ (ବିଜେଡି) ଏବେ କ୍ଷମତାର ଅନ୍ୟ ପାର୍ଶ୍ୱରେ ଅଛି । ଅର୍ଥାତ ଏବେ ଏହା ବିରୋଧି ଆସନରେ ବସିଛି । କ୍ଷମତାରେ ଥିବାବେଳେ ବହୁ ଲୋକ ଆସି ଯୋଡ଼ି ହେଉଥିଲେ, ତାଲିକା ପ୍ରତିଦିନ ଲମ୍ବି ଲମ୍ବି ଯାଉଥିଲା । ହେଲେ ଏବେ ପରିସ୍ଥିତି ଭିନ୍ନ । ସେମିତି କେହି ବଡ଼ ନେତା ଅନ୍ୟଦଳରୁ ଆସି ଯୋଡ଼ି ହେଉନାହାଁନ୍ତି କି ଅମର ପଟ୍ଟନାୟକ ବା ଅରୂପ ପଟ୍ଟନାୟକଙ୍କ ଭଳି ଅବସରପ୍ରାପ୍ତ ଅଧିକାରୀ ଆସି ଦଳରେ ଯୋଗଦେଉନାହାଁନ୍ତି।

ଦଳରୁ ବର୍ତ୍ତମାନ ବହୁ ନେତା ମୁଁହ ମୋଡ଼ୁଛନ୍ତି । ଦଳର କାୟା ବଢ଼ିବା ବଦଳରେ ଏବେ ହ୍ରାସ ପାଇବାରେ ଲାଗିଛି । ନୂଆପଡାର ଦିବଂଗତ ବିଧାୟକ ରାଜେନ୍ଦ୍ର ଢୋଲକିଆଙ୍କ ପୁଅ ଜୟ ଢୋଲକିଆ ବିଜେଡି ଛାଡି ବିଜେପିରେ ଯୋଗ ଦେଇଛନ୍ତି । ବିଜେଡିକୁ ଶକ୍ତ ଧକ୍କା ଲାଗିଛି । 

ବିଜୁ ଜନତା ଦଳର କ୍ରମକ୍ଷୟୀଷ୍ଣୁ ଜନପ୍ରିୟତା ଏବେ ଦଳର ସଭାପତିଙ୍କୁ ଏକ ପ୍ରକାର ବ୍ୟସ୍ତ ଓ ବିବ୍ରତ କରୁଥିବା ଅନୁମାନ କରାଯାଉଛି । ସେଥିପାଇଁ ୨୦୨୭ ପଂଚାୟତ ଓ ପୌର ନିର୍ବାଚନ ତଥା ୨୦୨୯ ବିଧାନସଭା ନିର୍ବାଚନର ବହୁ ପୂର୍ବରୁ ଦଳ ଅକ୍ଟୋବର ୯ ତାରିଖରୁ ରାଜ୍ୟବ୍ୟାପୀ ପଦଯାତ୍ରା ଆରମ୍ଭ କରିଛି । ଏହି ପଦଯାତ୍ରା ମଧ୍ୟରେ ଦଳ ନିଜର ସଙ୍ଗଠନକୁ ପୁନର୍ଜୀବିତ କରିବା ସହିତ ଜନସାଧାରଣଙ୍କ ସହିତ ଏହାର ସମ୍ପର୍କ ପୁନଃସ୍ଥାପିତ କରିବା ପାଇଁ ପ୍ରୟାସ କରୁଥିବା ବିଶେଷଜ୍ଞମାନେ ମନେକରୁଛନ୍ତି ।

ନବୀନ ପଟ୍ଟନାୟକଙ୍କ ଦୀର୍ଘ ଶାସନ ସମୟରେ ସେ ଗୋଟିଏ କଥା ସୁନିଶ୍ଚିତ କରିଥିଲେ । ତାହା ହେଲା ବିରୋଧୀ ଶିବିରରେ ଥିବା ନେତାମାନଙ୍କର ଶକ୍ତିକୁ ରାଜନୈତିକ କଳାକୌଶଳ ପ୍ରୟୋଗ କରି ଅବଦମିତ କରିବା ବା ସେମାନଙ୍କୁ ନେଇ ନିଜ ଦଳରେ ମିଶାଇବା । ଏହାଦ୍ୱାରା ସେ ନିଷ୍କଣ୍ଟକ ଭାବରେ ନିଜର ନିରଙ୍କୁଶ ଶାସନକୁ ସୁନିଶ୍ଚିତ କରିବା ସହିତ ଏକ ସ୍ଥିର ଶାସନ ଦେଇପାରିଥିଲେ । ଅବଶ୍ୟ ଏହି ଶାସନ କାଳଖଣ୍ଡ ସମୟରେ ସେ ପ୍ୟାରୀମୋହନ ମହାପାତ୍ର ଓ ଭୈରବ କାର୍ତ୍ତିକେୟନ ପାଣ୍ଡିଆନଙ୍କ ଭଳି ବିଭିନ୍ନ ଲୋକଙ୍କୁ ନିଜର କ୍ଷମତା ବଳୟରେ ରଖି ସେ ନିଜକୁ ସମସ୍ତ ଆଲୋଚନା ଓ ସମାଲୋଚନା ଠାରୁ ଦୂରେଇ ରଖିପାରିଥିଲେ ।

ଏବେ ପରିସ୍ଥିତି ବଦଳିଛି । ନବୀନ ଭଲଭାବରେ ଜାଣିଛନ୍ତି ଯେ ଦଳକୁ ଏବେ ପୁଣିଥରେ ତାଳ ଓ ଲୟକୁ ଫେରାଇ ଆଣିବାକୁ ହେଲେ କଠୋର ସାଧନା କରିବାକୁ ପଡ଼ିବ । ଜନସାଧାରଣଙ୍କ ସମ୍ନାରେ ନୂଆ ଭାବରେ ଉପସ୍ଥାପିତ କରିବାକୁ ପଡ଼ିବ । ସିଧାସଳଖ ଭାବରେ କହିବାକୁ ଗଲେ ଏବେ ବିଜେଡ଼ି ଏକ ସଶକ୍ତ ସ୍ଥିତିରୁ ଆସି ସ୍ଥିତି ପୁନରୁଦ୍ଧାର ପରିସ୍ଥିତିରେ ପହଞ୍ଚିଛି । ଅତଏବ୍ ରାଜନୈତିକ ପ୍ରଭାବରୁ ବିରୋଧୀ ଆସନ ପର୍ଯ୍ୟନ୍ତ ବିଜେଡିର ଯାତ୍ରା ଓଡ଼ିଶାର ରାଜନୈତିକ ବର୍ଣ୍ଣନାରେ ଏକ ନାଟକୀୟ ପରିବର୍ତ୍ତନକୁ ସୂଚୀତ କରେ।

ଦୁଇ ଦଶନ୍ଧିରୁ ଅଧିକ ସମୟ ଧରି ନବୀନ ପଟ୍ଟନାୟକଙ୍କ ଜଣେ ସ୍ୱଚ୍ଛ, ବିକାଶ-କେନ୍ଦ୍ରିକ ନେତା ଭାବରେ ପ୍ରତିଛବି ଦଳକୁ ଶାସନ ବିରୋଧୀ ଏବଂ ଜାତୀୟ ରାଜନୈତିକ ଲହର ଉଭୟକୁ ସହ୍ୟ କରିବାରେ ସାହାଯ୍ୟ କରିଥିଲା। ତଥାପି, ୨୦୨୪ ସୁଦ୍ଧା ଦୀର୍ଘ ଶାସନର କ୍ଳାନ୍ତି, ଜାତୀୟତାବାଦ, କଲ୍ୟାଣକାରୀ ଆଭିମୁଖ୍ୟ ଏବଂ ନେତୃତ୍ୱ ପରିବର୍ତ୍ତନ ଉପରେ କେନ୍ଦ୍ରିତ ଏକ ଆକ୍ରମଣାତ୍ମକ ଅଭିଯାନ ବିଜେପି ସପକ୍ଷରେ ଯାଇଥିଲା । ଢଳି ଯାଇଥିଲା ବିଜେଡିର ସନ୍ତୁଳନ । ବିଜୁ ଜନତା ଦଳ ନେତାମାନଙ୍କର ଯୁକ୍ତି ଯେ ଏହି ଜନସମ୍ପର୍କ ପଦଯାତ୍ରା ନେତୃତ୍ୱ ଏବଂ ତୃଣମୂଳ ସ୍ତରର କର୍ମୀଙ୍କ ମଧ୍ୟରେ ବଢ଼ୁଥିବା ବ୍ୟବଧାନକୁ ଦୂର କରିବା ପାଇଁ ଡିଜାଇନ୍ କରାଯାଇଛି ।

ଦୀର୍ଘ ସମୟ ଧରି କ୍ଷମତାରେ ରହିବା ସମୟରେ ନେତା ଓ ଜନତାଙ୍କ ମଧ୍ୟରେ ଯେଉଁ ଦୂରତ୍ୱ ବୃଦ୍ଧି ପାଇଥିଲା, ଏହି ପଦଯାତ୍ରା ଦ୍ୱାରା ତାହା ଅନେକ ପରିମାଣରେ ହ୍ରାସ କରାଯାଇପାରିବ । ଅବଶ୍ୟ ବିଜେଡ଼ି ନେତାମାନଙ୍କର ଯୁକ୍ତି ଅମୂଳକ ନୁହେଁ । ନବୀନ ଓ ତାଙ୍କ କୋଟେରୀ କିଛି ପ୍ରଶାସନିକ ଅଧିକାରୀଙ୍କ ଦ୍ୱାରା ଶାସନ ଚଳାଇବା ଦ୍ୱାରା ଲୋକମାନେ କେବଳ ନୀରବ ଦେଖାଣାହାରୀ ହୋଇ ରହିଯାଇଥିଲେ । ଏବେ କୁହଯାଉଛି ଯେ ନୀରବ ଦେଖାଣାହାରୀମାନଙ୍କ ସହିତ ପଦଯାତ୍ରା କରୁଥିବା ନେତାମାନେ ବିଭିନ୍ନ ପ୍ରସଙ୍ଗରେ ସିଧାସଳଖ ଆଲୋଚନା କରିବା ସହିତ ଗ୍ରାମସ୍ତରୀୟ ବୈଠକ କରିବେ । କେବଳ ସେତିକି ନୁହେଁ, ଜିଲ୍ଲା ମତାମତ ଅଧିବେଶନ ଅନ୍ତର୍ଭୁକ୍ତ ବୋଲି ସୂଚନା ଦେଇଛନ୍ତି।

ବିଳମ୍ବରେ ହେଉ ପଛେ, ବିଜେଡ଼ିର ଚୈତନ୍ୟ ଉଦୟ ହୋଇଛି ବୋଲି କୁହାଯାଇପାରେ । କିନ୍ତୁ ଏହି ବିଳମ୍ବର ପ୍ରଭାବରେ ସୃଷ୍ଟି ହୋଇଥିବା କ୍ଷତ ଓ କ୍ଷତି ଭରଣା କରାଯାଇପାରିବ ତ? ମୁଁହମୋଡ଼ି ଦଳ ଛାଡ଼ି ଚାଲିଯାଉଥିବା ନେତାମାନଙ୍କୁ ଅଟକାଇ ରଖାଯାଇପାରିବ ତ?ଏହିସବୁ ପ୍ରଶ୍ନ ଏବେ ବିଜେଡ଼ିର ବହୁ ତୁଙ୍ଗ ନେତାମାନଙ୍କ ପାଇଁ ଅସମାହିତ ହୋଇରହିଛି ।

ଅତୀତରେ ଦେଖାଯାଇଛି ଜନସମ୍ପର୍କ ଅଭିଯାନ ବହୁ ଆଞ୍ଚଳିକ ଦଳଗୁଡ଼ିକୁ ବିପର୍ଯ୍ୟୟରୁ ରକ୍ଷା କରିବାରେ ସାହାଯ୍ୟ କରିଛି । ଆନ୍ଧ୍ରପ୍ରଦେଶରେ ଓାଇଏସ୍ଆର୍ କଂଗ୍ରେସର ପଦଯାତ୍ରା କିମ୍ବା ନିର୍ବାଚନ ପରାଜୟ ପରେ ତାମିଲନାଡୁରେ ଡିଏମ୍କେ ପୁନରୁଦ୍ଧାର ପ୍ରୟାସ ପୁଣିଥରେ କ୍ଷମତାକୁ ଆସିବାରେ ସଫଳ ହୋଇଥିଲେ । କିନ୍ତୁ ସେମାନଙ୍କୁ ଜନତାଙ୍କ ନିକଟରେ ଭରସାଯୋଗ୍ୟ ପ୍ରତିଶ୍ରୁତି ଦେବା ସହିତ ସେବାର ନିର୍ଭର ପ୍ରତିବଦ୍ଧତା ରଖିବା ପାଇଁ ପଡ଼ିଥିଲା ।

କିନ୍ତୁ ଓଡ଼ିଶାରେ ବିଜେଡ଼ି ପାଇଁ ଚ୍ୟାଲେଞ୍ଜ ଅଧିକ ତୀବ୍ର ହୋଇପାରେ। ଏହାର କାରଣ ହେଲା ଯଦିଓ ନବୀନ ପଟ୍ଟନାୟକ ବିଜେଡିର ନୈତିକ ଏବଂ ପ୍ରତୀକାତ୍ମକ କେନ୍ଦ୍ର ହୋଇ ରହିଛନ୍ତି, ଦଳର ସଙ୍ଗଠନରେ ତାଙ୍କର ସକ୍ରିୟ ଓ ସିଧାସଳଖ ସମ୍ପୃକ୍ତି ନରହିବା ଦଳକୁ ବେଶ୍ ମହଙ୍ଗା ସାବ୍ୟସ୍ତ ହେଉଛି । ବିଜେଡ଼ିରୁ ନେତାମାନଙ୍କର ବର୍ତ୍ତମାନ ବିଜେପିକୁ ଧାଡ଼ି ଲାଗିଛି ।

ରାଜନୈତିକ ପର୍ଯ୍ୟବେକ୍ଷକମାନେ କହିଛନ୍ତି ଯେ ଯଦି ବିଜେଡି ପିଢ଼ିଗତ ପରିବର୍ତ୍ତନକୁ ତୃଣମୂଳ ସ୍ତରର ଆତ୍ମବିଶ୍ୱାସ ସହିତ ସନ୍ତୁଳିତ ଭାବରେ ପ୍ରୟୋଗ କରିବାରେ ସଫଳ ନହୁଏ, ତେବେ ପଦଯାତ୍ରା ଏକ ରଣନୈତିକ ପୁନଃନିର୍ମାଣ ବଦଳରେ ଏକ ପ୍ରତୀକାତ୍ମକ ଇଙ୍ଗିତ ଭାବରେ ଶେଷ ହୋଇପାରେ।