Social Media: ଫେସବୁକ, ଇନଷ୍ଟାଗ୍ରାମ ଏବଂ ଏକ୍ସ ଉପରେ ପ୍ରତିବନ୍ଧକ, ଜାଣନ୍ତୁ କାରଣ

ନେପାଳରେ ଫେସବୁକ, ଇନଷ୍ଟାଗ୍ରାମ ଏବଂ ଏକ୍ସ ସମେତ ୨୬ଟି ସୋସିଆଲ ମିଡିଆ ପ୍ଲାଟଫର୍ମ ଉପରେ ପ୍ରତିବନ୍ଧକ ଲଗାଯାଇଛି। ଏହି ପ୍ଲାଟଫର୍ମଗୁଡ଼ିକୁ ସାତ ଦିନ ମଧ୍ୟରେ ନେପାଳର ସୂଚନା ଏବଂ ପ୍ରଯୁକ୍ତିବିଦ୍ୟା ମନ୍ତ୍ରଣାଳୟରେ ପଞ୍ଜୀକରଣ କରିବାକୁ କୁହାଯାଇଥିଲା, କିନ୍ତୁ ସେମାନେ ତାହା କରିବାରେ ବିଫଳ ହୋଇଥିଲେ। ମନ୍ତ୍ରଣାଳୟ ଏହି କମ୍ପାନୀଗୁଡ଼ିକ ପାଇଁ ୨୮ ଅଗଷ୍ଟରୁ ୭ ଦିନର ସମୟ ସୀମା ନିର୍ଦ୍ଧାରଣ କରିଥିଲା। ବୁଧବାର ରାତିରେ ଏହି ସମୟ ସୀମା ସମାପ୍ତ ହୋଇଥିଲା।

ସରକାର ପୂର୍ବରୁ ନିୟମ ପାଳନ ନକରୁଥିବା ପ୍ଲାଟଫର୍ମଗୁଡ଼ିକୁ ବନ୍ଦ କରିବା ପାଇଁ ଚେତାବନୀ ଦେଇଥିଲେ। ଏପର୍ଯ୍ୟନ୍ତ ଟିକଟକ, ବିଟକ, ଭାଇବର ଏବଂ ନିବଞ୍ଜ ପରି ପ୍ଲାଟଫର୍ମଗୁଡ଼ିକ ନେପାଳରେ ପଞ୍ଜୀକୃତ ହୋଇସାରିଛନ୍ତି। ସେହିପରି ଟେଲିଗ୍ରାମ ଏବଂ ଗ୍ଲୋବାଲ ଡାଏରୀ ପଞ୍ଜୀକରଣ ପ୍ରକ୍ରିୟାରେ ଅଛନ୍ତି, କିନ୍ତୁ ମେଟା (ଫେସବୁକ, ଇନଷ୍ଟାଗ୍ରାମ, ହ୍ୱାଟସଆପର ପ୍ୟାରେଣ୍ଟ କମ୍ପାନୀ), ଆଲଫାବେଟ (ୟୁଟ୍ୟୁବ), ଏକ୍ସ, ରେଡିଟ କିମ୍ବା ଲିଙ୍କଡ଼ିନ ପରି କୌଣସି ପ୍ରମୁଖ ପ୍ଲାଟଫର୍ମ ଏପର୍ଯ୍ୟନ୍ତ ପଞ୍ଜୀକରଣ ପାଇଁ ଆବେଦନ କରି ନାହାନ୍ତି। ନେପାଳର ଜଣେ ଅଧିକାରୀଙ୍କ କହିବା ଅନୁଯାୟୀ, ପ୍ଲାଟଫର୍ମଗୁଡ଼ିକ ପଞ୍ଜୀକରଣ ପ୍ରକ୍ରିୟା ସମ୍ପୂର୍ଣ୍ଣ କରି ରାଷ୍ଟ୍ରୀୟ ନିୟମାବଳୀ ପାଳନ କଲେ ସେମାନଙ୍କ ସେବା ପୁଣି ଆରମ୍ଭ ହୋଇପାରିବ। ମନ୍ତ୍ରଣାଳୟର ନୋଟିସରେ କୁହାଯାଇଛି ଯେ, “ସର୍ବୋଚ୍ଚ ନ୍ୟାୟାଳୟ ଏକ ଅଦାଲତ ଅବମାନନା ମାମଲାରେ ନେପାଳ ସରକାରଙ୍କ ନାମରେ ଏକ ନିର୍ଦ୍ଦେଶ ଜାରି କରିଛନ୍ତି, ଯେଉଁଥିରେ ଦେଶର କିମ୍ବା ବିଦେଶର ଅନଲାଇନ ଏବଂ ସୋସିଆଲ ମିଡିଆ ପ୍ଲାଟଫର୍ମଗୁଡ଼ିକୁ ସଂଚାଳନ ପୂର୍ବରୁ ସମ୍ବନ୍ଧିତ କର୍ତ୍ତୃପକ୍ଷଙ୍କ ସହିତ ବାଧ୍ୟତାମୂଳକ ଭାବେ ତାଲିକାଭୁକ୍ତ କରିବାକୁ ପଡିବ । ଅବାଞ୍ଛିତ କଣ୍ଟେଣ୍ଟର ମୂଲ୍ୟାଙ୍କନ ଓ ନିରୀକ୍ଷଣ କରିବାକୁ ନିର୍ଦ୍ଦେଶ ଦିଆଯାଇଛି।” 

ପଞ୍ଜୀକରଣ କଲେ ତୁରନ୍ତ ଆରମ୍ଭ ହୋଇପାରିବ ବୋଲି ନୋଟିସରେ କୁହାଯାଇଛି । ଆଦେଶ ଅନୁଯାୟୀ, ସମସ୍ତ ସୋସିଆଲ ମିଡିଆ ପ୍ଲାଟଫର୍ମଗୁଡ଼ିକୁ ତାଲିକାଭୁକ୍ତ କରିବା ପାଇଁ ୭ ଦିନର ସମୟ ସୀମା ଦିଆଯାଇଛି। ନେପାଳ ଦୂରସଞ୍ଚାର ପ୍ରାଧିକରଣକୁ ନେପାଳ ଭିତରେ ସେହି ସୋସିଆଲ ମିଡିଆ ପ୍ଲାଟଫର୍ମଗୁଡ଼ିକୁ ନିଷ୍କ୍ରିୟ କରିବାକୁ ନିର୍ଦ୍ଦେଶ ଦିଆଯାଇଛି, ଯେଉଁମାନେ ନିର୍ଦ୍ଧାରିତ ସମୟ ସୀମା ମଧ୍ୟରେ ମନ୍ତ୍ରଣାଳୟ ସହିତ ସମ୍ପର୍କ କରି ତାଲିକାଭୁକ୍ତ ହୋଇ ନାହାନ୍ତି। ମନ୍ତ୍ରଣାଳୟ ଗୁରୁବାର ମଧ୍ୟରାତ୍ରୀରୁ ପ୍ଲାଟଫର୍ମଗୁଡ଼ିକୁ ବନ୍ଦ କରିବାକୁ ନିର୍ଦ୍ଦେଶ ଦେଇଛି। ମୁଖପାତ୍ର ଗଜେନ୍ଦ୍ର କୁମାର ଠାକୁର କହିଛନ୍ତି ଯେ ପଞ୍ଜୀକରଣ ସମ୍ପୂର୍ଣ୍ଣ କରୁଥିବା ଯେକୌଣସି ପ୍ଲାଟଫର୍ମକୁ ସେହି ଦିନ ହିଁ ପୁନଃ ଆରମ୍ଭ କରାଯିବ।

ଅଧିକ ପଢ଼ନ୍ତୁ: ଟ୍ରମ୍ପଙ୍କ ନୂଆ ପ୍ଲାନ୍; କହିଲେ ‘ହଁ ମୁଁ ପ୍ରସ୍ତୁତ’