LIVE TV
ଭାରତୀୟ ଦଳର ପୂର୍ବତନ ବ୍ୟାଟିଂ କୋଚ୍ ତଥା ଟିମ୍ ଇଣ୍ଡିଆର ପୂର୍ବତନ ଷ୍ଟାର ବ୍ୟାଟ୍ସମ୍ୟାନ୍ ସଞ୍ଜୟ ବାଙ୍ଗରଙ୍କ ପୁଅ ଲିଙ୍ଗ ପରିବର୍ତ୍ତନ କରିଛନ୍ତି । ସଞ୍ଜୟ ବଙ୍ଗରଙ୍କ ପୁଅ ଆର୍ଯ୍ୟନରୁ ଅନାୟା ହେବା ପାଇଁ ଲିଙ୍ଗ ପରିବର୍ତ୍ତନ କରିଛନ୍ତି । ଏନେଇ ସେ ଖୋଲାଖୋଲି ଭାବେ ନିଜ ଅନୁଭବ ସାର୍ବଜନୀନ କରିଛନ୍ତି । ସେ ଇନଷ୍ଟାଗ୍ରାମରେ ଏକ ରିଲ୍ସ୍ ଭିଡିଓ ମଧ୍ୟ ସେୟାର କରିଥିଲେ ଯେଉଁଥିରେ ତାଙ୍କୁ ପୂର୍ବତନ ଭାରତୀୟ ଅଧିନାୟକ ବିରାଟ କୋହଲି ଏବଂ ଏମଏସ ଧୋନିଙ୍କ ସହ ଦେଖିବାକୁ ମିଳିଥିଲା । ତେବେ ଏହି ଭିଡିଓ ଭାଇରାଲ ହେବା ପରେ ସେ ଏହାକୁ ଡିଲିଟ୍ କରିଦେଇଥିଲେ । ଏହା ସହିତ ଏକ ଲମ୍ବା ପୋଷ୍ଟ ମଧ୍ୟ ଲେଖିଛନ୍ତି, ଯେଉଁଥିରେ ସେ ଦେଶ ପାଇଁ କ୍ରିକେଟ୍ ଖେଳି ନ ପାରିବାର ଯନ୍ତ୍ରଣା ମଧ୍ୟ ପ୍ରକାଶ କରିଛନ୍ତି ।
Also Read
କ୍ରିକେଟର ସଞ୍ଜୟ ବଙ୍ଗରଙ୍କ ପୁଅ ଆର୍ଯ୍ୟନ୍ ପ୍ରାୟ ୧୧ ମାସ ପୂର୍ବେ ତାଙ୍କର ଲିଙ୍ଗ ପରିବର୍ତ୍ତନ ଯାତ୍ରା ଆରମ୍ଭ କରିଥିଲେ । ଯାହାକୁ 'ହରମୋନ୍ ରିପ୍ଲେସମେଣ୍ଟ ଥେରାପି' ବା HRT କୁହାଯାଏ । ଏହି ଥେରାପି ଧୀରେ ଧୀରେ ତାଙ୍କ ଶରୀରରେ ପରିବର୍ତ୍ତନ ଆଣିଲା ଏବଂ ଏହି ପରିବର୍ତ୍ତନ ସହିତ ତାଙ୍କ ନାମ ଆର୍ଯ୍ୟନରୁ ଅନାୟାରେ ମଧ୍ୟ ପରିବର୍ତ୍ତିତ ହେଲା । ଅନାୟା ତାଙ୍କ ସୋସିଆଲ ମିଡିଆରେ ଅନେକ ପୋଷ୍ଟ ମାଧ୍ୟମରେ ଲୋକଙ୍କ ସହ ଏହି ଯାତ୍ରାକୁ ନେଇ ସୂଚନା ଦେଇଥିଲେ । ସୋସିଆଲ ମିଡିଆରେ ଏକ ପୋଷ୍ଟ କରି ସେ କହିଛନ୍ତି - 'ଯଦିଓ ଶାରୀରିକ ଶକ୍ତି ହ୍ରାସ ପାଉଛି, କିନ୍ତୁ ସୁଖ ମିଳୁଛି’।
ଅଧିକ ପଢ଼ନ୍ତୁ: ଖୁବଶୀଘ୍ର ଫେରୁଛି ନବେ ଦଶକର ସୁପରହିରୋ 'ଶକ୍ତିମାନ', ସାମନାକୁ ଆସିଲା ଟିଜର
କ୍ରିକେଟ୍ ପ୍ରତି ଅନାୟାଙ୍କ ଆଗ୍ରହ ତାଙ୍କ ପିତାଙ୍କଠାରୁ ପ୍ରାପ୍ତ ହୋଇଛି । ପିଲାଦିନରୁ ସଞ୍ଜୟ ବାଙ୍ଗର ଖେଳୁଥିବା ଦେଖି ଅନାୟାଙ୍କର ମଧ୍ୟ ଏକ ସ୍ୱପ୍ନ ଥିଲା ଯେ ସେ ମଧ୍ୟ କ୍ରିକେଟ୍ ପଡ଼ିଆରେ ଭାରତ ପାଇଁ ପ୍ରତିନିଧିତ୍ୱ କରିବେ । କିନ୍ତୁ HRT ହେତୁ ତାଙ୍କର ମାଂସପେଶୀ ଏବଂ ଶକ୍ତି ଯଥେଷ୍ଟ ହ୍ରାସ ପାଇଛି । ସେ କହିଛନ୍ତି, 'କ୍ରିକେଟ୍ ପ୍ରତି ମୋର ପୁରୁଣା ଉତ୍ସାହ ଜାରି ରଖିବା ମୋ ପାଇଁ କଷ୍ଟସାଧ୍ୟ ହୋଇପଡିଛି, କାରଣ ମୋ ଶରୀରରେ ଅନେକ ପରିବର୍ତ୍ତନ ଘଟୁଛି ।' ତଥାପି ଅନାୟା ହାର ମାନିନାହାଁନ୍ତି । ସେ ଏବେ ଇଂଲଣ୍ଡର ମଞ୍ଚେଷ୍ଟରରେ ଏକ ସ୍ଥାନୀୟ କ୍ରିକେଟ୍ କ୍ଲବ ପାଇଁ ଖେଳୁଛନ୍ତି ଏବଂ ନିକଟରେ ୧୪୫ ରନ୍ର ଏକ ଦମଦାର ଇନିଂସ ମଧ୍ୟ ଖେଳିଥିଲେ ।
କିନ୍ତୁ ଇଂଲଣ୍ଡ ଏବଂ ୱେଲ୍ସ କ୍ରିକେଟ୍ ବୋର୍ଡ (ଇସିବି) ନିକଟରେ ଏକ ନୂଆ ନିୟମ ଲାଗୁ କରିଛି । ଯାହା ଅନାୟାଙ୍କ ସମ୍ଭାବ୍ୟ ମହିଳା କ୍ରିକେଟ କ୍ୟାରିୟରକୁ ମଧ୍ୟ ଶେଷ କରିଦେଇଛି । ଏହି ନିୟମ ଅନୁଯାୟୀ ଟ୍ରାନ୍ସଜେଣ୍ଡର ମହିଳାମାନଙ୍କୁ ୨୦୨୫ରୁ ମହିଳା କ୍ରିକେଟ୍ ଖେଳିବାକୁ ବାରଣ କରାଯିବ। ଏହି ନିୟମ ଅନାୟାଙ୍କ ପାଇଁ ହୃଦୟ ବିଦାରକ ଅଟେ । ଯଦିଓ ସେମାନଙ୍କର ହରମୋନ୍ ସ୍ତର ମହିଳାଙ୍କ ତୁଳନାରେ ସମାନ, କିନ୍ତୁ ଏହି ନିୟମ ହେତୁ ଅନାୟାଙ୍କ ପାଇଁ ବୃତ୍ତିଗତ କ୍ରିକେଟ୍ ଖେଳିବା ଅସମ୍ଭବ ହୋଇପଡ଼ିଛି ।
ଅନାୟା କହିଛନ୍ତି ଯେ କ୍ରୀଡ଼ା କ୍ଷେତ୍ରରେ ଟ୍ରାନ୍ସଜେଣ୍ଡର ଆଥଲେଟମାନଙ୍କ ପାଇଁ ଏକ ସ୍ଥାନ ରହିବା ଉଚିତ୍ । ଟ୍ରାନ୍ସଜେଣ୍ଡର ଆଥଲେଟଙ୍କୁ ସେମାନଙ୍କର ସ୍ୱପ୍ନ ପୂରଣ କରିବାର ଅଧିକାର କାହିଁକି ଦିଆଯାଉ ନାହିଁ ବୋଲି ପ୍ରଶ୍ନ କରିଛନ୍ତି ସଞ୍ଜୟ ବାଙ୍ଗରଙ୍କ ଝିଅ ?
