Axiom-4: ଆଜି ମହାକାଶରୁ ଶୁଭାଂଶୁଙ୍କ ପୃଥିବୀ ବାହୁଡ଼ା, ଫେରିବେ ୪ ସହଯାତ୍ରୀ

ଆଜି ମହାକାଶରୁ ଶୁଭାଂଶୁଙ୍କ ପୃଥିବୀ ବାହୁଡ଼ା । ୧୮ ଦିନର ରହଣି ଭିତରେ ପ୍ରାୟ ୩ ଶହଟି ସୂର୍ଯ୍ୟୋଦୟ ଦେଖି ଏବଂ କୋଟିଏ କିଲୋମିଟରରୁ ଅଧିକ ଯାତ୍ରା କରି ମହାକାଶରୁ ପୃଥିବୀକୁ ଫେରିବେ ଗଗନଯାତ୍ରୀ ଶୁଭାଂଶୁ ଶୁକ୍ଳା । ଆଉ କିଛି ଘଣ୍ଟା ପରେ ମହାକାଶରୁ ପୃଥିବୀ ଅଭିମୁଖେ ବାହୁଡ଼ିବେ ଶୁଭାଂଶୁ ଶୁକ୍ଳାଙ୍କ ସମେତ ଆକ୍ସିଅମ୍-4 ମିଶନର ସମସ୍ତ ୪ ଜଣ ମହାକାଶଚାରୀ ।

ଅଧିକ ପଢନ୍ତୁ: ସତ ହେଲା ଶୁଭାଂଶୁଙ୍କ ସ୍ବପ୍ନର ଉଡ଼ାଣ, ୧୪ ଦିନ ରହି କରିବେ ୬୦ ଏକ୍ସପେରିମେଣ୍ଟ

ଭାରତୀୟ ସମୟ ଅନୁସାରେ, ଆଜି ଅପରାହ୍ଣ ୪ଟା ୩୦ ବେଳେ ଇଣ୍ଟରନ୍ୟାସନାଲ ସ୍ପେଶ୍ ଷ୍ଟେସନରୁ ଯାତ୍ରା ଆରମ୍ଭ କରିବେ ଗ୍ରୁପ୍ କ୍ୟାପଟେନ୍ ଶୁଭାଂଶୁ । ISSର ହାରମନି ମଡ୍ୟୁଲରୁ ଅନ୍-ଡକିଂ କରିବ କ୍ରୁ ଡ୍ରାଗନ୍ ସ୍ପେଶ୍ କ୍ୟାପସୁଲ୍ । ଆସନ୍ତାକାଲି ଅପରାହ୍ଣ ପ୍ରାୟ ୩ଟା ବେଳେ କାଲିଫର୍ଣ୍ଣିଆ ତଟରେ ଏହା ପ୍ରଶାନ୍ତ ମହାସାଗରରେ ଖସିବ ।

କେବଳ ୪ ଜଣ ମହାକାଶଚାରୀ ନୁହଁନ୍ତି, ସେମାନେ ସ୍ପେଶ ଷ୍ଟେସନରେ ୧୮ ଦିନ ରହିବା ଭିତରେ ସଂପୂର୍ଣ୍ଣ କରିଥିବା ୬୦ଟି ବୈଜ୍ଞାନିକ ପରୀକ୍ଷାନିରୀକ୍ଷାର ତଥ୍ୟ ଓ ନାସାର ହାର୍ଡୱେର ସମେତ ମୋଟ ୫୮୦ ପାଉଣ୍ଡ୍ ଓଜନର ସାମଗ୍ରୀ ଧରି ଫେରିବ ଡ୍ରାଗନ୍ ସ୍ପେଶ୍ କ୍ୟାପସୁଲ୍ । ପୃଥିବୀରେ ପହଞ୍ଚିବା ପରେ ମହାକାଶଚାରୀଙ୍କ ସ୍ବାସ୍ଥ୍ୟପରୀକ୍ଷା କରାଯିବ । ମାଧ୍ୟାକର୍ଷଣ ଶକ୍ତି ସହ ଖାପ ଖୁଆଇବା ପାଇଁ ସେମାନଙ୍କୁ ୭ ଦିନ ରିହାବିଲିଟେସନ୍ ପିରିୟଡରେ ରଖାଯିବ।

ଭୂପୃଷ୍ଠରୁ ୪ ଶହ କିଲୋମିଟର ଉପରେ ଘଣ୍ଟାପ୍ରତି ୨୮ ହଜାର କିଲୋମିଟର ବେଗରେ ଦିନକୁ ୧୬ ଥର ପୃଥିବୀକୁ ପରିକ୍ରମା କରୁଛି ଇଣ୍ଟରନ୍ୟାସନାଲ ସ୍ପେଶ ଷ୍ଟେସନ୍ । ସେଠାରେ ୧୮ ଦିନ ବିତାଇବା ଭିତରେ ପ୍ରାୟ ୩ ଶହଟି ସୂର୍ଯ୍ୟୋଦୟ, ୩ ଶହଟି ସୂର୍ଯ୍ୟାସ୍ତ ଅନୁଭବ କରିବା ସହ ପ୍ରାୟ ୧ କୋଟି ୨୩ ଲକ୍ଷ କିଲୋମିଟର ଯାତ୍ରା କରିଥିବେ ଶୁଭାଂଶୁ ।

ଅଧିକ ପଢନ୍ତୁ: ଘୁଞ୍ଚିଲା ଶୁଭାଂଶୁ ଶୁକ୍ଳାଙ୍କ ସ୍ପେଶ୍ ମିଶନ୍; ସାଥିରେ ନେବେ ଭାରତୀୟ ଖାଦ୍ୟ ଓ ହଂସ