ବିଜେପି ଯୁବମୋର୍ଚ୍ଚା କର୍ମୀଙ୍କୁ ପୋଲିସର ଆକ୍ରମଣ, ଧର୍ମେନ୍ଦ୍ର କହିଲେ ଏହା ଅଶୋଭନୀୟ

ରାଜଧାନୀର ଲୋୟର ପିଏମଜିରେ ଗତକାଲି ଯୁବ ମୋର୍ଚ୍ଚା ପକ୍ଷରୁ ପ୍ରତିବାଦ ବିକ୍ଷୋଭ ବେଳେ ପୋଲିସ ମାତ୍ରାଧିକ କାର୍ଯ୍ୟାନୁଷ୍ଠାନକୁ ନେଇ କଠୋର ଭାଷାରେ ନିନ୍ଦା କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଟ୍ୱିଟ୍ କରି ଏଭଳି ଅସନ୍ତୋଷ ଝାଡ଼ିଛନ୍ତି ଧର୍ମେନ୍ଦ୍ର । ଗଣତନ୍ତ୍ରରେ ପ୍ରତିବାଦ କରିବାର ଅଧିକାର ସମସ୍ତଙ୍କର ରହିଛି । ଯୁବ ମୋର୍ଚ୍ଚାର କାର୍ଯ୍ୟକର୍ତ୍ତାମାନେ ହେଉଛନ୍ତି ଏକ ରାଜନୈତିକ ଦଳର କାର୍ଯ୍ୟକର୍ତ୍ତା । ମାତ୍ର ପୋଲିସ ସେମାନଙ୍କୁ ରାଜନୈତିକ କାର୍ଯ୍ୟକର୍ତ୍ତା ଭାବେ ନୁହେଁ ବରଂ ଅପରାଧୀ ଭାବେ ଅମାନୁଷିକ ଭାବେ ଆକ୍ରମଣ କରିଛି, ତାହା ଚିନ୍ତାଜନକ ବୋଲି ଉଲ୍ଲେଖ କରିଛନ୍ତି ଧର୍ମେନ୍ଦ୍ର ।

ଯେଉଁଭଳି ଭାବେ କିଛି ପୋଲିସ ଅଧିକାରୀ ଏକ ପାଖିଆ ନିଷ୍ପତ୍ତି ନେଇ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି, ଏହା ଗଣତନ୍ତ୍ର ପାଇଁ ଅଶୋଭନୀୟ ବୋଲି ଧର୍ମେନ୍ଦ୍ର ଟ୍ୱିଟ୍ କରିଛନ୍ତି । ତେବେ ଧର୍ମେନ୍ଦ୍ରଙ୍କ ଟ୍ୱିଟ୍ ଉପରେ ପୋଲିସ ପ୍ରଶାସନ କିମ୍ବା ରାଜ୍ୟ ସରକାରଙ୍କର ପ୍ରତିକ୍ରିୟା ମିଳିପାରିନାହିଁ ।

ସେପଟେ ବିଜେପି ଯୁବ ମୋର୍ଚ୍ଚା ପକ୍ଷରୁ ଗତକାଲି ବିଧାନସଭା ଘେରାଉ ଉଦ୍ୟମ ବେଳେ ଭିଡ଼ ଭିତରେ ଆକ୍ରମଣ କରୁଥିବା ଧଳା ସାର୍ଟ ପିନ୍ଧା ଯୁବକମାନେ କିଏ । ପ୍ରେସମିଟରେ ଏଭଳି ପ୍ରଶ୍ନ କରିବା ସହ ସରକାର ଓ ପୋଲିସକୁ ସମାଲୋଚନା କରିଛନ୍ତି ବିଜେପି ସଭାପତି ସମୀର ମହାନ୍ତି । ଧଳା ସାର୍ଟପିନ୍ଧା ଯୁବକମାନେ ବିଜେଡିର ଗୁଣ୍ଡା ନୁହଁନ୍ତି ତ ବୋଲି ସେ ପ୍ରଶ୍ନ ଉଠାଇଛନ୍ତି । ଏହାର ତଦନ୍ତ ଦାବିରେ ଆମେ କ୍ୟାପିଟାଲ ଥାନାରେ ଏତଲା ଦେଇଛୁ ହେଲେ ପୋଲିସ ଏତଲାକୁ ପଂଜିକରଣ କରିବା ପାଇଁ ରାଜି ହେଲାନି । ରାତି ସାରା ବସିଥିଲେ ବି ପୋଲିସ ବିଜେପି ଯୁବମୋର୍ଚ୍ଚାର ଏତଲା ରଖିଲାନି ।

ପୋଲିସ ରାତି ଅଧିଆ ଯୁବମୋର୍ଚ୍ଚା କର୍ମୀଙ୍କୁ ଜେଲ୍ ପଠାଇ ଦେଲା । ସରକାରଙ୍କ ପ୍ରତି ଆନୁଗତ୍ୟ ଦେଖାଇ କିଛି ପୋଲିସ ଅଧିକାରୀ ପିଟିଲେ । ଆଇନ କଣ ସମସ୍ତଙ୍କ ପାଇଁ ସମାନ ନୁହେଁ କି ବୋଲି ପ୍ରଶ୍ନ କରିଛନ୍ତି ସମୀର ମହାନ୍ତି ।

ଲୋୟର ପିଏମଜିରେ ବିଜେପି କର୍ମୀ-ପୋଲିସ ଖଣ୍ଡଯୁଦ୍ଧ ନେଇ ବିଜେପି ପକ୍ଷରୁ ବିଜେଡିକୁ ଟାର୍ଗେଟ କରାଯାଇଥିବା ବେଳେ ବିଜେଡି ମଧ୍ୟ ବିଜେପି ଉପରେ ଦୋଷ ଲଦିଛି । ପ୍ରେସମିଟ କରି ବିଜେଡି ଘଟଣାକୁ ଦୃଢ ନିନ୍ଦା କରିଛି । ଆଇନ ଶୃଙ୍ଖଳା ବିପର୍ଯ୍ୟସ୍ତ ନାଁରେ ବିଜେପି ଯୁବ ମୋର୍ଚ୍ଚାର କାର୍ଯ୍ୟକଳାପ ନେଇ କେନ୍ଦ୍ରମନ୍ତ୍ରୀ କାହିଁକି ନୀରବ ବୋଲି ପ୍ରଶ୍ନ କରିଛି ଦଳ । ପୋଲିସ କାର୍ଯ୍ୟାନୁଷ୍ଠାନ ପ୍ରସଙ୍ଗରେ ଦଳ କହିଛି, ଆକ୍ରମଣର ଶିକାର ହେବାରୁ ଆତ୍ମସୁରକ୍ଷା ଲାଗି କାର୍ଯ୍ୟାନୁଷ୍ଠାନ ନେଇଛି ।

ସେପଟେ ବିଜେଡି ଅଭିଯୋଗର ଜବାବ ରଖିଛନ୍ତି ବିଜେପି ବିଧାୟକ ସୂର୍ଯ୍ୟବଂଶୀ ସୂରଜ । କହିଛନ୍ତି ବିଜେଡି କେନ୍ଦ୍ରମନ୍ତ୍ରୀଙ୍କ ନାଁ କହୁନି କାହିଁକି । ତାଙ୍କ ନାଁ ଧରିବାକୁ ଏତେ ଡର କାହିଁକି । ଗୃହବିଭାଗ ଅଧୀନରେ ଏ ଘଟଣା ଘଟିଛି । ଏଣୁ ଏଥିରେ ଗୃହମନ୍ତ୍ରୀ କିମ୍ବା ମୁଖ୍ୟମନ୍ତ୍ରୀ ଚୁପ୍ କାହିଁକି ବୋଲି ସେ ଓଲଟି ପ୍ରଶ୍ନ କରିଛନ୍ତି ।