ନିର୍ବାଚନ ବେଳେ ହିଂସା, ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ଫେରାଦ ହେଲା ଦଳ

ଦ୍ୱିତୀୟ ପର୍ଯ୍ୟାୟ ନିର୍ବାଚନ ବେଳେ ଅନେକ ସ୍ଥାନରେ ସଂଘଟିତ ହିଂସା ଏବଂ ବିଶୃଙ୍ଖଳାକୁ ନେଇ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ ଦ୍ୱାରସ୍ଥ ହୋଇଛି ବିଜେପି । ଦଳ ଅଭିଯୋଗ କରିଛି ଯେ, ଲୋଇସିଂହା ୧୦୮ ନମ୍ବର ବୁଥରେ ସବୁ ସୀମା ଟପିଯାଇଥିଲା ବିଶୃଙ୍ଖଳା । ଏଠିକାର ପ୍ରିଜାଇଡିଂ ଅଫିସର ଏକାଧିକ ବୟସ୍କ ଭୋଟରଙ୍କୁ ଧରି ବିଜେଡିରେ ଭୋଟ୍ ଦେବାକୁ ବାଧ୍ୟ କରିଥିବା ଦଳ ଅଭିଯୋଗ ଆଣିଛି ।

ତାହାର ଏକ ଭାଇରାଲ ଭିଡ଼ିଓକୁ ମଧ୍ୟ ସିଇଓଙ୍କୁ ଦେଇଛି ବିଜେପି । ବୌଦ୍ଧ ଜିଲ୍ଲା କଣ୍ଟାମାଳ ବୁଥ ନମ୍ବର ୨୮, ୨୬ ଏବଂ ୨୯ରେ ଦିନ ୨ଟାରୁ ଭୋଟ ବନ୍ଦ କରାଯାଇଥିଲା । କହ୍ନେଇ ଡାଙ୍ଗ ନାମକ ଜଣେ ସରକାରୀ ଅଧିକାରୀ ଭୋଟରଙ୍କୁ ଭିତରକୁ ଯିବା ସମୟରେ ତାଙ୍କୁ ଅପମାନିତ କରିଥିବା ଅଭିଯୋଗ କରିଥିଲା ବିଜେପି ।

ଅଧିକ ପଢ଼ନ୍ତୁ: ବୁଥରେ ପୋଲିଂ ଟିମକୁ ତାଲା ପକାଇଦେଲେ ଗ୍ରାମବାସୀ

ସେପଟେ ଖୋର୍ଦ୍ଧା ବିଜେପି ବିଧାୟକ ପ୍ରାର୍ଥୀ ପ୍ରଶାନ୍ତ ଜଗଦ୍ଦେବଙ୍କ ବିରୋଧରେ ନିର୍ବାଚନ ଅଧିକାରୀଙ୍କୁ ଫେରାଦ ହୋଇଛି ବିଜେଡି । ତେଣୁ ତଥ୍ୟ ପ୍ରମାଣ ଧରି CEOଙ୍କୁ ଅଭିଯୋଗ କରିବା ସହ ୨୫ ତାରିଖରେ ଶୃଙ୍ଖଳିତ ନିର୍ବାଚନ ପାଇଁ ବିଜେଡି ନିବେଦନ କରିଥିବା କହିଛି । ଏନେଇ ପ୍ରଶାନ୍ତ ଜଗଦ୍ଦେବଙ୍କ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ । ଅପରପକ୍ଷେ ହାଟଡ଼ିହି BDO ସୋମ୍ୟଶ୍ରୀ ପାଣିଗ୍ରାହୀଙ୍କ ବିରୋଧରେ ରାଜ୍ୟ ନିର୍ବାଚନ ଅଧିକାରୀଙ୍କ ଦ୍ୱାରସ୍ଥ ହୋଇଛି କଂଗ୍ରେସ ।

ନିର୍ବାଚନୀ ସଭାରେ ବିଜେଡି ବିଧାୟକ ପ୍ରାର୍ଥୀଙ୍କ ସହ ହାଟଡ଼ିହି BDO ପ୍ରଚାର କରୁଥିବା ଦଳ ଅଭିଯୋଗ କରିଛି । ତେଣୁ ତାଙ୍କ ବିରୁଦ୍ଧରେ କଡ଼ା କାର୍ଯ୍ୟାନୁଷ୍ଠାନ ପାଇଁ CEOଙ୍କୁ ଭେଟି କଂଗ୍ରେସ ଦାବି କରିଛି । ତେବେ ଏନେଇ ହାଟଡ଼ିହି BDO ସୌମ୍ୟଶ୍ରୀ କିମ୍ବା ବିଜେଡି ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ ।

ସେପଟେ ଗତ କିଛିଦିନ ତଳେ ଭୋଟକୁ ନେଇ କଣ୍ଟାମାଳ ମହେଶ୍ୱରପିଣ୍ଡାରେ ପୋଲିସ-ଜନତା ଖଣ୍ଡଯୁଦ୍ଧ ହୋଇଥିଲା । ମତଦାନ ବେଳେ ଖୋଦ୍ ପ୍ରିଜାଇଡିଂ ଅଫିସର ପକ୍ଷପାତିତା କରିଥିବା ଅଭିଯୋଗ ହୋଇଥିଲା । ପ୍ରତିବାଦରେ ବୁଥ୍ ଆଗରେ ବିଜେପି ବିଧାୟକ ପ୍ରାର୍ଥୀଙ୍କ ସହ ଜନତା ଧାରଣା ଦେଇଥିଲେ । ତେବେ ଏହାକୁ ନେଇ ଉତ୍ତେଜନା ଦେଖାଦେଇଛି ।

ପୋଲିସ ଉପରକୁ ପଥର ମାଡ଼ ହୋଇଛି । ସ୍ଥିତି ନିୟନ୍ତ୍ରଣ ପାଇଁ ପୋଲିସ ଲାଠିମାଡ଼ କରିବା ସହ ଫାଙ୍କା ଗୁଳିଚାଳନା ବି କରିଛି । ପୋଲିସ ଲାଠି ମାଡରେ ୩୦ ଜଣ ଆହତ ହୋଇଥିବା ବେଳେ ୫ ଜଣଙ୍କ ଅବସ୍ଥା ଗୁରୁତର ରହିଛି । ଗୁରୁତରଙ୍କୁ ପ୍ରଥମେ ମନମୁଣ୍ଡା ଏବଂ ପରେ ସୋନପୁର ମେଡିକାଲକୁ ସ୍ଥାନାନ୍ତର କରାଯାଇଛି ।

ଅଧିକ ପଢ଼ନ୍ତୁ: ବାହାରିବା ପରେ ପ୍ରଦୀପ ଦେଲେ ବିସ୍ଫୋରକ ବୟାନ; କାହିଁକି ହୋଇଥିଲା ଆକ୍ରମଣ ?

ଅଭିଯୋଗ ଅନୁସାରେ, ବୌଦ୍ଧ କଣ୍ଟାମାଳ ନିର୍ବାଚନମଣ୍ଡଳୀ ମହେଶ୍ୱରପିଣ୍ଡା ବୁଥ୍ ନମ୍ବର- ୨୮ରେ ପ୍ରିଜାଇଡିଂ ଅଫିସର ଭୋଟରଙ୍କୁ ଶଙ୍ଖ ଚିହ୍ନରେ ଭୋଟ ଦେବାକୁ କହିଥିଲେ । ଏହାକୁ ନେଇ ଭୋଟରଙ୍କ ମଧ୍ୟରେ ଉତ୍ତେଜନା ଦେଖାଦେଇଥିଲା । ତଦନ୍ତ ପରେ ଯାହା ଜଣାପଡିବ ବୋଲି କହିଛନ୍ତି ବୌଦ୍ଧ ତହସିଲଦାର ।

ସେହିଭଳି ଗଞ୍ଜାମ ଆସିକା ନିର୍ବାଚନ ମଣ୍ଡଳୀ କବିସୂର୍ଯ୍ୟନଗର ଥାନା ଅନ୍ତର୍ଗତ ଗୁଣ୍ଠୁପଡା ଗ୍ରାମରେ ଭୋଟ୍ ପରେ ପରେ ଦୁଇ ଗୋଷ୍ଠୀମଧ୍ୟରେ ମାରପିଟ ହୋଇ ତିନି ଜଣ ଆହତ ହୋଇଛନ୍ତି l ଆହତମାନେ ହେଲେ ବାବୁଲା ସ୍ୱାଇଁ,ମନୋଜ ସ୍ୱାଇଁ, କାହ୍ନୁଚରଣ ସାହୁ l ଉଭୟ ଗୋଷ୍ଠୀ ମଧ୍ୟରେ ପ୍ରଥମେ ବଚସା ଓ ପରେ ଖଣ୍ଡା ସାହାଯ୍ୟରେ ଆକ୍ରମଣ ହୋଇଥିଲା l