ବିଜେଡିରେ ନେତାଙ୍କୁ ମ୍ୟାନେଜ୍‌ ପାଇଁ କସରତ, ଟିକେଟ ନଦେଇ ଦେଉଛନ୍ତି କୋଟିଏ !

ବିଜେଡି ମୋତେ ଟିକେଟ୍ ନ ଦେଇ କୋଟିଏ ଟଙ୍କାର ପ୍ରଲୋଭନ ଦେଖାଇଛି । ଲକ୍ଷ୍ମୀପୁରରୁ ଟିକେଟ ଦେବାକୁ ପ୍ରତିଶ୍ରୁତି ଦେଇ ଦଳରେ ମିଶାଇ ଥିଲେ । ମୁଁ ମିଶିବାକୁ ତାଙ୍କ ପାଖକୁ ଯାଇ ନ ଥିଲି, ସେମାନେ ମୋ ପାଖକୁ ଆସିଥିଲେ । ବବି ଦାସ ମୋତେ ଟିକେଟ ପ୍ରତିଶ୍ରୁତି ଦେଇ ବିଜେଡିକୁ ଆଣିଥିଲେ। କାଲି ପର୍ଯ୍ୟନ୍ତ ବି କହିଥିଲେ ଟିକେଟ୍‌ ଦେବେ। କିନ୍ତୁ ଟିକେଟ ନ ଦେଇ ସରକାର ଗଠନ ପରେ SDC ଦେବେ ବୋଲି କହୁଛନ୍ତି । ଆଜି ବିଜେଡି ଛାଡ଼ି ବିଜେପିରେ ଯୋଗ ଦେବା ପରେ ବିଜେଡି ବିରୋଧରେ ବର୍ଷିଛନ୍ତି ଲକ୍ଷ୍ମୀପୁରର ପୂର୍ବତନ ବିଧାୟକ କୈଳାସ ଚନ୍ଦ୍ର କୁଲେସିକା ।

ସେ କହିଛନ୍ତି, ମୋତେ କିଣିବାକୁ ଚେଷ୍ଟା କରିଛନ୍ତି, ଯାହା ମୋର ସ୍ୱାଭିମାନକୁ ଖୁବ୍ ବାଧିଛି । ମୋତେ ଯେଉଁ ଆଘାତ ଦେଇଛନ୍ତି ତା’ର ପ୍ରତିଶୋଧ ଲୋକେ ନେବେ। ମୋ ଅଭିଶାପ ପଡ଼ିବ, ଲକ୍ଷ୍ମୀପୁରରେ ବିଜେଡି ଚୁରମାର ହୋଇଯିବ ବୋଲି କହିଛନ୍ତି କୁଲେସିକା । ବିଜେଡି ପ୍ରତିଶ୍ରୁତି ଦେଇ ବିଶ୍ୱାସଘାତକତା କରିଥିବା କହିଛନ୍ତି କୈଳାସ କୁଲେସିକା ।

ସୂଚନା ଅନୁସାରେ ଗତକାଲି ଲକ୍ଷ୍ମୀପୁର ପାଇଁ ବିଜେଡି ପ୍ରଭୁ ଜାନିଙ୍କ ନାଁ ଘୋଷଣା କରିଥିଲା। ଏହାପରେ ନିରାଶ ହୋଇ ଦଳ ଛାଡିଛନ୍ତି କୈଳାଶ କୁଲେସିକା । ବିଜେଡି ଛାଡ଼ିବା ପରେ ଆଜି ଭାରତୀୟ ଜନତା ପାର୍ଟିରେ ବିଧିବଦ୍ଧ ଭାବେ ଯୋଗ ଦେଇଛନ୍ତି ଲକ୍ଷ୍ମୀପୁରର ପୂର୍ବତନ ବିଧାୟକ କୈଳାଶ କୁଲେସିକା ।