ବଡ଼ ଦୁର୍ଘଟଣା ! ପୋଲ ତଳୁ ତିନି ଗୁରୁତର ଉଦ୍ଧାର, ଅନେକ ଚାପି ହୋଇ ରହିଥିବା ଆଶଙ୍କା

କଟକ ଛତ୍ରବଜାର ପରିବା ମାର୍କେଟ ନିକଟ ପୋଲ ଭୁଶୁଡ଼ିଲା । ଛତ୍ରବଜାରରୁ ମାଲଗୋଦାମ ସଂଯୋଗ କରୁଥିବା ପୋଲ ଭୁଶୁଡ଼ିଲା । ପୋଲ କାମ ଚାଲିଥିବା ବେଳେ ଗାର୍ଡ ୱାଲ୍ ଭୁଶୁଡ଼ିଲା । ପୋଲ ତଳେ କିଛି ଲୋକ ଚାପି ହୋଇ ରହିଯାଇଥିବା ସୂଚନା । ଓଡ୍‌ରାଫ୍‌ ଟିମ୍‌ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି । ଓଡ୍‌ରାଫ୍‌ ଟିମ୍‌ ସହ ଆଗ୍ନିଶମ ବାହିନୀ ମଧ୍ୟ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟରେ ସାମିଲ ଅଛନ୍ତି । କିଛି ଆହତଙ୍କୁ ଉଦ୍ଧାର କରାଯାଇ ମେଡିକାଲରେ ଭର୍ତ୍ତି କରାଯାଇଛି । ଘଟଣା ସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟକୁ ତଦାରଖ କରୁଛନ୍ତି କଟକ ଡିସିପି ।

ପ୍ରତ୍ୟେକ ଦିନ ଏହି ସମୟରେ ୫୦ ରୁ ୬୦ ବ୍ୟବସାୟୀ ଏହି ପୋଲ ତଳେ ବସି ବ୍ୟବସାୟ କରିଥାନ୍ତି । ତେଣୁ ଏବେ ସୁଦ୍ଧା କେତେ ଜଣ ପୋଲ ତଳେ ଚାପି ହୋଇ ରହିଛନ୍ତି ତାହାର ସ୍ପଷ୍ଟ ସୂଚନା ଆସି ନାହିଁ । ପୋଲ ଭୁଶୁଡ଼ିବା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଛି । 

ପୋଲ ଭୁଶୁଡ଼ିଥିବା ସ୍ଥାନରେ ପହଞ୍ଚିଲେ କଟକ ଜିଲ୍ଲାପାଳ । କହିଲେ ଏହା ଏକ ଦୁଃଖଦ ଘଟଣା । ଏହି ଘଟଣା କାହିଁକି ଘଟିଲା, କେମିତି ଘଟିଲା ? ସେନେଇ ତଦନ୍ତ କରାଯିବ କହିଲେ ଜିଲ୍ଲାପାଳ । ତଦନ୍ତ କିଏ କରିବ, ସରକାର ନିଷ୍ପତ୍ତି ନେବେ କହିଲେ ଜିଲ୍ଲାପାଳ । ଯେଉଁମାନେ ଦାୟୀ, ସେମାନଙ୍କ ଉପରେ କାର୍ଯ୍ୟାନୁଷ୍ଠାନ ହେବ ।

ଅନ୍ୟପଟେ କଟକ ସିଏମ୍‌ସି କମିଶନର ବି ସମାନ କଥା କହିଲେ । ସେ ମଧ୍ୟ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ନେଇ ତଦନ୍ତ କରିଛନ୍ତି । ତାଙ୍କ କହିବାନୁଯାୟୀ ଦୁର୍ଘଟଣାରେ ଆହତ ହୋଇଥିବା ଲୋକ ଶ୍ରମିକ ବୋଲି ସୂଚନା ରହିଛି । କୌଣସି ବବସାୟୀ ଏହି ଦୁର୍ଘଟଣାରେ ଫଶି ନାହାନ୍ତି ।