ପଦ୍ମପୁରରେ ଚାଷୀ ଭୋଟ୍‌କୁ ନେଇ ମୁହାଁମୁହିଁ ବିଜେଡି-ବିଜେପି । କେନ୍ଦ୍ରର ଫସଲ ବୀମା ରାଶି ବନାମ୍ ରାଜ୍ୟର ଇନପୁଟ୍ ସବ୍‌ସିଡି । ପ୍ରଧାନମନ୍ତ୍ରୀ ଫସଲ ବୀମା ଯୋଜନାରେ ଚାଷୀଙ୍କୁ ସହାୟତା ରାଶି ମିଳୁନଥିବାରୁ ବିଜେଡି କେନ୍ଦ୍ରକୁ ଟାର୍ଗେଟ କରୁଥିବା ବେଳେ ରାଜ୍ୟ ସରକାରଙ୍କ ମୁଣ୍ଡରେ ଅଠା ବୋଳୁଛି ବିଜେପି । ଆଉ ଏହାର ପ୍ରଭାବ ଦେଖିବାକୁ ମିଳିଥିଲା ପଦ୍ମପୁରରେ । ଗୋଟେ ପଟେ ବରଗଡ ଗାନ୍ଧିଛକ ଠାରେ ଚାଷୀଙ୍କୁ ବୀମା ରାଶି ପ୍ରଦାନ ଦାବିରେ ଧାରଣାରେ ବସିଥିଲା ବିଜେଡି ।

ଅନ୍ୟପଟେ ପଦ୍ମପୁର ଠାରେ ସାମ୍ବାଦିକ ସମ୍ମିଳନୀ କରି ଚାଷୀଙ୍କୁ ଇନପୁଟ ସବସିଡି ଦାବି କରି ରାଜ୍ୟ ସରକାରଙ୍କୁ ଟାର୍ଗେଟ କରିଥିଲେ ବିଜେପି ରାଜ୍ୟ ସଭାପତି ସମୀର ମହାନ୍ତି । ଆଉ ତାର କିଛି ଘଣ୍ଟା ପରେ ପ୍ରଥମେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହ ଆଲୋଚନା ପରେ ବୀମା ରାଶି କ୍ଲେମ୍ କରିବା ପାଇଁ ରାଜ୍ୟକୁ ନିର୍ଦ୍ଦେଶ ଦେଲେ କେନ୍ଦ୍ର କୃଷି ମନ୍ତ୍ରୀ ନରେନ୍ଦ୍ର ସିଂ ତୋମାର । କେନ୍ଦ୍ରମନ୍ତ୍ରୀଙ୍କ ଘୋଷଣାକୁ  ଘଣ୍ଟାଏ ନପୂରୁଣୁ ରାଜ୍ୟ ସରକାର ଦେଖାଇଲେ ଚାଷୀ ଦରଦ । ମରୁଡି ବାବଦକୁ ୨ ଶହ କୋଟି ଟଙ୍କାର ଇନପୁଟ୍ ସହୟତା ଘୋଷଣା କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।

ଅଧିକ ପଢ଼ନ୍ତୁ: ପଦ୍ମପୁର ଉପନିର୍ବାଚନ: ସନ୍ଧ୍ୟା ୬ ନୁହେଁ ୪ଟା ସୁଦ୍ଧା ଭୋଟ ସାରିବାକୁ ନିର୍ଦ୍ଦେଶ

ରାଜ୍ୟ ସରକାରଙ୍କ ରିପୋର୍ଟ ଅନୁଯାୟୀ, ୨୦୨୧ ଖରିଫରେ ରାଜ୍ୟର ୧୨ ଜିଲ୍ଲାର ୬୪ ବ୍ଲକ ଓ ୧୫ଟି ପୌରଞ୍ଚଳର ଫସଲ ହାନି ହୋଇଥିଲା । ଏ ବାବଦକୁ କେନ୍ଦ୍ର ସରକାରଙ୍କ ଫସଲ ବୀମା ରାଶି ଓ ରାଜ୍ୟ ସରକାରଙ୍କ ଇନପୁଟ ସବସିଡିକୁ ନେଇ ଉଭୟ ଦଳ ମଧ୍ୟରେ ଆରୋପ ପ୍ରତ୍ୟାରୋପ ଦେଖିବାକୁ ମିଳିଛି ।

ସେପଟେ ୧୧ ଅକ୍ଟୋବର ୨୦୨୧ରେ ଏସଏରଆସିଙ୍କ ପକ୍ଷରୁ ମରୁଡି ଜନିତ ରିପୋର୍ଟ ମଗାଯାଇଥିଲା । କିନ୍ତୁ ବର୍ଷେ ପର୍ଯ୍ୟନ୍ତ ଇନ୍‌ପୁଟ ସବସିଡି ଦେଇନଥିଲେ ରାଜ୍ୟ ସରକାର । ଏହାରି ଭିତରେ ଅନେକ ଥର ଚାଷୀ ଆନ୍ଦୋଳନ ହୋଇଛି । ଏମିତି କି ବିଧାନସଭାରେ ରାଜସ୍ୱ ମନ୍ତ୍ରୀ ପ୍ରମିଳା ମଲ୍ଲିକ ମଧ୍ୟ ଗତ ଜୁଲାଇ ମାସରେ ଖରିଫ ପାଇଁ ରାଜ୍ୟରେ ମରୁଡି ଘୋଷଣା କରାଯାଇ ନାହିଁ ବୋଲି ଲିଖିତ ଭାବେ ଉତ୍ତର ରଖିଥିଲେ । ତେଣୁ ହଠାତ୍ ରାଜ୍ୟ ସରକାର ମରୁଡ଼ି ସହାୟତା ଘୋଷଣା କରିବା ଉଦ୍ଦେଶ୍ୟ ନିର୍ବାଚନକୁ ପ୍ରଭାବିତ କରିବା ନୁହେଁ ତ ? ଯାହାକୁ ନେଇ ରାଜ୍ୟ ସରକାରଙ୍କ ନିୟତ ଉପରେ ପ୍ରଶ୍ନ ଉଠାଇଛନ୍ତି ଚାଷୀ । ଚାଷୀଙ୍କ ସମସ୍ୟାକୁ ନେଇ ଉଭୟ ଦଳଙ୍କ କ୍ରେଡିଟ ପ୍ରତିଯୋଗିତା ଭିତରେ ଚାଷୀଙ୍କ ଭୋଟ କାହାକୁ ଯାଉଛି ତାହା ଦେଖିବାର କଥା ।