ଧର୍ମେନ୍ଦ୍ର ସାହୁ ମୃତ୍ୟୁ ମାମଲା: ସାମ୍ନାକୁ ଆସିଲା ଅଡିଓ କ୍ଲିପ୍‌, ମନ୍ତ୍ରୀଙ୍କ ସମ୍ପୃକ୍ତି ନେଇ ପ୍ରମାଣ !

ନିମାପଡ଼ା ବିଜେପି ନେତ୍ରୀ ପ୍ରଭାତି ପରିଡ଼ଙ୍କ ବଡ଼ ଖୁଲାସା । ବିଜେଡି ନେତା ତଥା ଜିଲ୍ଲା ପରିଷଦ ସଦସ୍ୟ ଧର୍ମେନ୍ଦ୍ର ସାହୁ ମୃତ୍ୟୁ ଘଟଣାରେ ଆଣିଲେ ନୂଆ ଟ୍ୱିଷ୍ଟ । ପ୍ରେସ୍‌ମିଟ୍‌ କରି କଲେ ବଡ଼ ଖୁଲାସା ।

ଧମେନ୍ଦ୍ର ସାହୁ ମୃତ୍ୟୁ ଘଟଣା ରେ ସାମ୍ନାକୁ ଆସିଲା ଏକ ମୋବାଇଲ ଅଡିଓ । ଆଉ ଏହି ଅଡିଓ ସଂପର୍କରେ ପ୍ରେସ୍‌ମିଟ୍‌ରେ ସୂଚନା ଦେଇଛନ୍ତି ପ୍ରଭାତି । ସେ କହିଛନ୍ତି ଆତ୍ମହତ୍ୟା ପୂର୍ବରୁ ଧର୍ମେନ୍ଦ୍ର ସାହୁ ଫୋନ୍‌ରେ ଅକ୍ଷୟ ନାମକ ବ୍ୟକ୍ତିଙ୍କ ସହ କଥା ହୋଇଥିଲେ । ମୋବାଇଲ୍‌ରେ କଥା ହେବା ବେଳେ ଧର୍ମେନ୍ଦ୍ର ଆତ୍ମହତ୍ୟା କରିବେ ବୋଲି କହିଥିଲେ । ଆଉ ମନ୍ତ୍ରୀ ସମୀର ଦାଶଙ୍କ ଯୋଗୁଁ ସେ ଆତ୍ମହତ୍ୟା କରିବାକୁ ଯାଉଛନ୍ତି ବୋଲି ମଧ୍ୟ ବନ୍ଧୁ ଅକ୍ଷୟଙ୍କୁ ଜଣାଇଥିଲେ । ଖାଲି ସେତିକି ନୁହେଁ ଧର୍ମେନ୍ଦ୍ର ନିଜ ସ୍ତ୍ରୀ ଓ ଶ୍ୱଶୁରଙ୍କୁ ମଧ୍ୟ ଏଥିପାଇଁ ଦାୟୀ କରିଛନ୍ତି । ଯାହା କି ଅଡିଓ କ୍ଲିପ୍‌ରୁ ସ୍ପଷ୍ଟ ବାରି ହୋଇପଡ଼ୁଛି ।

ତେଣୁ ମନ୍ତ୍ରୀ ସମୀର ଦାଶ ଇସ୍ତଫା ଦିଅନ୍ତୁ ଏବଂ ତଦନ୍ତର ସାମ୍ନା କରନ୍ତୁ ବୋଲି ବିଜେପି ନେତ୍ରୀ ପ୍ରଭାତି ପରିଡ଼ା ଦାବି କରିଛନ୍ତି । ତେବେ ଏହି ଅଡିଓ କ୍ଲିପ୍‌ ସମ୍ପର୍କରେ ମନ୍ତ୍ରୀ ସମୀର ଦାଶଙ୍କର କୌଣସି ପ୍ରକାର ପ୍ରତିକ୍ରିୟା ମିଳିପାରି ନାହିଁ ।