LIVE TV
ପୂର୍ବତନ ମନ୍ତ୍ରୀ ତଥା ଦିବଙ୍ଗତ ସୂର୍ଯ୍ୟନାରାୟଣ ପାତ୍ରଙ୍କ ପୁଅ ବିପ୍ଲବ ପାତ୍ରଙ୍କୁ ତନ୍ତ୍ରମନ୍ତ୍ର କରାଯାଇଥିବା ଏବେ ଚର୍ଚ୍ଚା ଜୋର ଧରିଛି । ଫଟୋ ଚିରା ହୋଇଛି, ମାଛ ବଳି ଦିଆଯାଇଛି । କିଛି ଏଭଳି ଘଟଣାର ଭିଡିଓ ଏବେ ଭାଇରାଲ ହେଉଛି । ଗଞ୍ଜାମ ଜିଲ୍ଲା ଦିଗପହଣ୍ଡିର ଅଁଳାଗୁଡ଼ା ରାସ୍ତା କଡ଼ରେ ଥିବା ଏକ ବରଗଛ ମୂଳରେ ଏମିତି ଗୁଣି ଗାରେଡ଼ି କରାଯାଇଥିବା କୁହାଯାଉଛି ।
ବିଜେଡି ନେତା ବିପ୍ଲବ ପାତ୍ରଙ୍କ ସମେତ ତାଙ୍କ ସହଯୋଗୀ ସିମାଦ୍ରୀ ପାତ୍ର ଏବଂ ଜିଲ୍ଲା ପରିଷଦ ପ୍ରାର୍ଥୀ ନିରଞ୍ଜନ ରେଡ୍ଡୀଙ୍କ ଫଟୋ ବି ଚିରିକି ଫୋପାଡ଼ା ଯାଇଛି । ପାଖରେ ମାଛ ବଳି ଦିଆଯିବା ସହ ହଳଦୀ, ସିନ୍ଦୂର, ଲାଲ୍ କନା ବି ରହିଛି । ପାରିପାର୍ଶ୍ୱିକ ସ୍ଥିତି ଦେଖିଲେ ଲାଗୁଛି ତନ୍ତ୍ର ବିଦ୍ୟା ବେଳେ ଯେପରି ପରିବେଶ ଥାଏ ଏଠି ବି ସେଭଳି ଦେଖିବାକୁ ମିଳିଛି ।
ଏହି ଘଟଣା ପଛରେ କିଏ ଓ କାହିଁକି ଏପରି କରିଛନ୍ତି ସେ ସମ୍ପର୍କରେ କୌଣସି ସୂଚନା ମିଳିପାରିନି । ସୂଚନାଥାଉ କି, ଗତ କିଛି ଦିନ ଧରି ଦିଗପହଣ୍ଡି ବିଜେଡିରେ ଗୋଷ୍ଠୀ କନ୍ଦଳ ଚରମ ସୀମାରେ ପହଞ୍ଚିଛି । ବିପ୍ଲବଙ୍କ ବିରୋଧରେ ବିିପିନ ପ୍ରଧାନଙ୍କ ଗୋଷ୍ଠୀ ବ୍ଲକ ଅଧ୍ୟକ୍ଷା ନିର୍ବାଚନରେ ବାଜି ମାରିଛନ୍ତି । ଆଉ ଏଭଳି ସ୍ଥିତିରେ ବିପ୍ଲବଙ୍କ ବିରୋଧରେ ତନ୍ତ୍ରମନ୍ତ୍ର ଅନେକ ପ୍ରଶ୍ନ ଓ ସନ୍ଦେହ ସୃଷ୍ଟି କରିଛି ।
