BJD Internal Conflict: ଗୋଷ୍ଠୀ କନ୍ଦଳ ଓ ତାଳିପକାରେ ବିଜେଡିକୁ ପୂରିଲା ବର୍ଷେ, କୋମାରେ ନବୀନଙ୍କ ଛାୟା କ୍ୟାବିନେଟ୍

ଗୋଷ୍ଠୀ କନ୍ଦଳ ଆଉ ତାଳି ପକାରେ ପୂରିଲା ବର୍ଷେ । ପ୍ରମୁଖ ବିରୋଧୀ ଭୂମିକା ଗଲା ଚୁଲିକୁ। ବିପର୍ଯ୍ୟୟ ପରେ ବିଜେଡି ସୁପ୍ରିମୋ ଦମ୍ଭ ଦେଖାଇ କହିଥିଲେ ସରକାର ଲାଗି ଅଳ୍ପ ସିଟ୍ ବ୍ୟବଧାନ ରହିଛି । ଏଭଳି ସମୀକରଣ ପଛରେ ଉଦ୍ଦେଶ୍ୟ ଥିଲା ଦଳକୁ ଏକାଠି ରଖିବା। ମାତ୍ର ଦଳ ଏକାଠି ରହିବା ଦୂରର କଥା ନିଜ ନିଜ ଭିତରେ କନ୍ଦଳ ପାଇଁ ଦଳ ବିଭାଜିତ ହୋଇଯାଇଛି। ଏଭଳି ସ୍ଥଳରେ ମୁଖ୍ୟ ବିରୋଧୀ ଭୂମିକାରୁ ବହୁ ଦୂରରେ ।

ଅଧିକ ପଢ଼ନ୍ତୁ: କେନ୍ଦ୍ରମନ୍ତ୍ରୀ ପଦ ଛାଡିବେ ଚିରାଗ ପାଶ୍ୱାନ; ଯିବେ କୁଆଡ଼େ...

ବର୍ଷେ ପୁରିଲା, ହେଲେ ଏବେବି ବିଜେଡି ସ୍ଥିତି ଟଳମଳ। ନା ଅଛି ଆଭିମୁଖ୍ୟରେ ସ୍ପଷ୍ଟତା ନା ସଜାଡ଼ି ହେଉଛି ସଂଗଠନ। ୨୦୨୪ ବିପର୍ଯ୍ୟୟ ପରେ ବିଜେଡିରେ କେହି କାହାରିକୁ ମାନିବାକୁ ନାରାଜ । ୫୧ ବିଧାୟକଙ୍କୁ ଧରି ଛାୟା କ୍ୟାବିନେଟ୍ ଗଠନ କଲେ ନବୀନ । ହେଲେ ଛାୟା କ୍ୟାବିନେଟ ଏବେ କୋମାରେ । ବରିଷ୍ଠଙ୍କଠୁ କନିଷ୍ଠ ଯାଏ ନେତୃତ୍ୱକୁ ଚାଲେଞ୍ଜ ଦେଉଛନ୍ତି । ୩୩ରୁ ୯ ସାଙ୍ଗଠନିକ ଜିଲ୍ଲାରେ ସଭାପତି ଚୟନ ହୋଇ ପାରୁନାହାନ୍ତି । ପ୍ରଥମ ଥର ପାଇଁ ଶୃଙ୍ଖଳା କମିଟି ଗଠନ କରି ଅମାନିଆଙ୍କ ମୁହଁରେ ତୁଣ୍ଡି ବାନ୍ଧିବାକୁ ଚେଷ୍ଟା କରିଛନ୍ତି ନବୀନ। କିନ୍ତୁ ଏ ମନ୍ତ୍ର ବି କାଟୁ କରୁନି।

ବିଧାନସଭାରେ କଂଗ୍ରେସ ସହିତ ଅଘୋଷିତ ମେଣ୍ଟ କରି ଆଗକୁ ବଢିବାକୁ ଦଳ ପ୍ରୟାସ ଜାରି ରଖିଛି। କିନ୍ତୁ ୱାକ୍ଫକୁ ନେଇ ଦୋ ମୁହାଁ ନିଷ୍ପତ୍ତି ଦଳପତିଙ୍କୁ କାଠଗଡ଼ାରେ ଛିଡା କରିଛି। ସେହିପରି ବିପର୍ଯ୍ୟୟ ପରେ କର୍ମୀ ଓ ନେତା ଆଶା କରୁଥିଲେ ଢାଞ୍ଚାଗତ ପରିବର୍ତ୍ତନ ହେବ ବୋଲି କିନ୍ତୁ ଯାହା ପୂର୍ବରୁ ଥିଲା ସେୟା ହେଲା । ଦେବୀ, ବବି, ଅତନୁ, ସଞ୍ଜୟଙ୍କୁ ବଡ଼ ଦାୟିତ୍ବ ମିଳିଥିବାରୁ ଦଳ ଭିତରେ ପ୍ରବଳ ଅସନ୍ତୋଷ। ସଶକ୍ତ ବିରୋଧୀ କଥା ବିଜେଡି କହୁଥିବା ବେଳେ ପ୍ରଥମ ବର୍ଷରେ କିନ୍ତୁ ଏହାର ପ୍ରତିଫଳନ ଦେଖିବାକୁ ମିଳିନାହିଁ।

ଏକାଧିକ ପ୍ରସଙ୍ଗରେ ବିଜେଡି ସେଭଳି ଆଖିଦୃଶିଆ ଭୂମିକା ନେଇପାରିନାହିଁ । ଦରଦାମ୍ ବୃଦ୍ଧି ଓ ପଛୁଆ ବର୍ଗ ପାଇଁ ବିଜେଡି ପ୍ରଥମ ବର୍ଷରେ ଆନ୍ଦୋଳନକୁ ଓହ୍ଲାଇଥିବା ବେଳେ ଅନ୍ୟ ପ୍ରସଙ୍ଗରେ ଜୋରଦାର ଆନ୍ଦୋଳନ କରିବାକୁ ସକ୍ଷମ ହୋଇନାହିଁ । ବିଜେପି କହିଛି ଆଜି ବି ବିଜେଡି ସ୍ବପ୍ନ ଦେଖୁଛି। ନିଜ ପରାଜୟର ସମୀକ୍ଷା ନକରି ସରକାରଙ୍କ ଦୋଷ ତ୍ରୁଟି ଖୋଜୁଛନ୍ତି । ରାଜନୈତିକ ସମୀକ୍ଷକଙ୍କ ମତରେ ବିଜେଡିରେ ଏବେ ପରିଚୟ ସଙ୍କଟ ଥିବାରୁ ଦଳ ଦିଶା ହୀନ। ଯେଉଁଥିପାଇଁ ଦଳ ଏବେ ବିରୋଧୀ ଭୂମିକା ଠିକ୍ ଭାବେ ନିଭାଇ ପାରୁନାହିଁ । ଦିନଥିଲା ନବୀନଙ୍କ ନିଷ୍ପତ୍ତି ଥିଲା ସର୍ବମାନ୍ୟ। ମାତ୍ର ଏବେ ଦଳ, ଫାଳ ଫାଳ ହୋଇଯାଇଥିବାରୁ ସଭାପତିଙ୍କ ପାଇଁ ଚିନ୍ତା ବଢୁଛି। ଯାହାକୁ ଆଗକୁ ମ୍ୟାନେଜ୍ କରିବା କାଠିକର ପାଠ ।

ଅଧିକ ପଢ଼ନ୍ତୁ: ବିଜେଡିରୁ ବିଦା ହେଲେ ଆଉ ଜଣେ ନେତା, ଦଳ ବିରୋଧୀ କାର୍ଯ୍ୟ ପାଇଁ ଆକ୍ସନ