LIVE TV
ଅଭୁତପୂର୍ବ ସୁରକ୍ଷା ବ୍ୟବସ୍ଥା । ସାରା ସମ୍ବଲପୁର ପୋଲିସ ଛାଉଣୀରେ ଭର୍ତ୍ତି । ହନୁମାନ ଜୟନ୍ତୀ ଅବସରରେ ସମ୍ବଲପୁରରେ ଆରମ୍ଭ ହୋଇଛି ଶୋଭାଯାତ୍ରା । ବୁଧବାର ରାତିର ହିଂସା ପରଠୁ ପୋଲିସ ସୁରକ୍ଷା ମଧ୍ୟରେ ଶୋଭାଯାତ୍ରାରେ ବାହାରୁଛନ୍ତି ହନୁମାନ ଜୟନ୍ତୀ ସମନ୍ୱୟ ସମିତିର ସଦସ୍ୟ । ଏଥିପାଇଁ ସାରା ସହର ପୋଲିସ ଛାଉଣୀରେ ପରିଣତ ହୋଇଛି । ବ୍ୟାନ୍ ରହିଛି ଇଣ୍ଟରନେଟ୍ ସେବା । ଶୋଭାଯାତ୍ରା ପଥରେ କୋହଳ ରହିଛି ୧୪୪ ଧାରା।
Also Read
ଆଜି ହନୁମାନ ଜୟନ୍ତୀ ଅବସରରେ ବିଶାଳ ଶୋଭାଯାତ୍ରା ଦେଖିବାକୁ ମିଳିଛି । ଜୟ ଶ୍ରୀରାମ ନାରାରେ କମ୍ପିଥିଲା ପରିବେଶ । ଜୟ ହନୁମାନ ଧ୍ୱନୀରେ ଦୁଲୁକୁଥିଲା ସାରା ସହର । ପାରମ୍ପରିକ ଲୋକନୃତ୍ୟ, ଲୋକବାଦ୍ୟ ସହ ଆଖଡ଼ା ଖେଳର ଆକର୍ଷଣୀୟ ଦୃଶ୍ୟ ଦେଖିବାକୁ ମିଳିଛି । ବ୍ରୁକ୍ସ ହିଲ ସ୍ଥିତ ହନୁମାନ ମନ୍ଦିରରୁ ଗୋଟିଏ ପରେ ଗୋଟିଏ ସଂଗଠନ ଶୋଭାଯାତ୍ରାରେ ବାହାରିଥିଲେ । ଜିଲ୍ଲା ସ୍କୁଲ ଛକରେ ମହା ଆଳତୀ କରାଯାଇଥିଲା । ସେଠାରୁ ଲକ୍ଷ୍ମୀ ଟକିଜ୍, ଗୋଲବଜାର ଛକ ଦେଇ ଶକ୍ତିଛକରେ ଶୋଭାଯାତ୍ରା ପହଞ୍ଚିଥିଲା ।
ବୁଧବାର ସଂଗଠିତ ହିଂସାକାଣ୍ଡ ସ୍ଥଳ ତଥା ମୋତିଝରଣ ରାସ୍ତାରେ ଗେଙ୍ଗୁଟିପାଲିରୁ ଆଉ ଏକ ଶୋଭାଯାତ୍ରା ବାହାରିଥିଲା । ଶୋଭାଯାତ୍ରା ପୂର୍ବରୁ ଆୟୋଜିତ ହୋଇଥିବା ଆଳତୀରେ ବିଜେପି ନେତୃବୃନ୍ଦ ସାମିଲ ହୋଇଥିଲେ । ଏଭଳି ବିସ୍ତୃତ କାର୍ଯ୍ୟକ୍ରମକୁ ଦେଖି ସୁରକ୍ଷା ବ୍ୟବସ୍ଥା ବଢ଼ାଇ ଦିଆଯାଇଛି । ୪୨ ପ୍ଲାଟୁନ ଫୋର୍ସ ମୁତୟନ କରାଯାଇଛି । ଦାୟିତ୍ୱରେ ଅଛନ୍ତି ଶହେରୁ ଅଧିକ ଅଫିସର । ଏପରିକି ଉତ୍ତର କେନ୍ଦ୍ରାଞ୍ଚଳ DIGଙ୍କ ସହ ଏସପି, ଜିଲ୍ଲାପାଳ ମଧ୍ୟ ସ୍ଥିତି ଉପରେ ତୀକ୍ଷଣ ନଜର ରଖିଛନ୍ତି । ସହର ବ୍ୟାପି ଜାରି ରହିଛି ପାଟ୍ରୋଲିଂ। ସୋସିଆଲ ମିଡିଆରେ ହିଂସା ସୃଷ୍ଟିକାରୀ ବାର୍ତ୍ତା ଉପରେ ରୋକ ଲଗାଇବା ଉଦେଶ୍ୟରେ ବନ୍ଦ ରହିଛି ଇଣ୍ଟରନେଟ୍ ସେବା । ଶୋଭାଯାତ୍ରା ଯିବାକୁ ଥିବା ରୁଟରେ 144 ଧାରାକୁ କୋହଳ ରଖାଯାଇଛି ।
ବୁଧବାର ରାତିର ହିଂସା ପରଠୁ ସମ୍ବଲପୁରରେ ଲାଗିରହିଛି ଚାପା ଉତ୍ତେଜନା। ପୋଲିସର କଡ଼ା ପହରା ସତ୍ତ୍ୱେ ଗତରାତିରେ, କିଛି ସ୍ଥାନରେ ନିଆଁରେ ଜଳିଯାଇଛି ଦୋକାନ ଘର । ବୁଢ଼ାରଜା ଅଞ୍ଚଳ ରାସ୍ତା କଡ଼ରେ ୪/୫ଟି କ୍ୟାବିନରେ ନିଆଁ ଲାଗିଯାଇଥିଲା। ପରେ ଦମକଳ ବାହିନୀ ନିଆଁକୁ ନିୟନ୍ତ୍ରଣ କରିଥିଲା । ଘଟଣାସ୍ଥଳକୁ ଉତ୍ତର କେନ୍ଦ୍ରାଞ୍ଚଳ DIG ଏବଂ SP ମଧ୍ୟ ଯାଇଥିଲେ । ତେବେ ନିଆଁ ଲାଗିବାର କାରଣ ଅନୁଧ୍ୟାନ କରାଯାଉଥିବା କହିଛନ୍ତି ଡିଆଇଜି। ଅପରପକ୍ଷେ ହିଂସାକାଣ୍ଡ ପରଠୁ ୩୨ ଜଣଙ୍କୁ ପୋଲିସ ଗିରଫ କରିଛି । ଆଗକୁ ବି ଗିରଫଦାରୀ ସଂଖ୍ୟା ବଢ଼ିବ ବୋଲି କହିଛନ୍ତି ଏସ.ପି।
ହନୁମାନ ଜୟନ୍ତୀ ପୂର୍ବରୁ ସମ୍ବଲପୁରରେ କାହିଁକି ଘଟିଲା ହିଂସା ? କାହିଁକି ସ୍ଥିତିକୁ ରୋକିପାରିଲାନି ପୋଲିସ ? କେଉଁଠି ରହିଲା ତ୍ରୁଟି ? ଗ୍ରାଉଣ୍ଡ ଜିରୋକୁ ଯାଇ ସ୍ଥିତି ସମୀକ୍ଷା କରିଛି ରାଜ୍ୟ ବିଜେପିର ସ୍ୱତନ୍ତ୍ର ଟିମ୍ । ରାଜ୍ୟ ସଭାପତି ମନମୋହନ ସାମଲଙ୍କ ନିର୍ଦ୍ଦେଶକ୍ରମେ ବିଧାୟକ ଲଳିତେନ୍ଦୁ ବିଦ୍ୟାଧର ମହାପାତ୍ର, ମୁକେଶ ମହାଲିଙ୍ଗ, ସୁବାସ ପାଣିଗ୍ରାହୀ, ନାଉରୀ ନାଏକ ଓ ମୁଖପାତ୍ର ବିରଞ୍ଚି ତ୍ରିପାଠୀ ମେଡ଼ିକାଲ ଯାଇ ହନୁମାନ ଜୟନ୍ତୀ ସମନ୍ୱୟ ସମିତିର଼ କାର୍ଯ୍ୟକାରୀ ସଭାପତି ଦାମୋଦର କରଙ୍କ ସହ ଅନ୍ୟ ଆହତଙ୍କୁ ଭେଟିଛନ୍ତି । ତାସହ ଜିଲ୍ଲାପାଳ ଓ ପୋଲିସ ପ୍ରଶାସନ ସହ ଘଟଣା ସମ୍ପର୍କରେ ଆଲୋଚନା କରିଛନ୍ତି। ଓଡ଼ିଶା ଆସିଥିବା କେନ୍ଦ୍ରମନ୍ତ୍ରୀ ଗିରିରାଜ ସିଂହ କହିଛନ୍ତି, ଓଡ଼ିଶା ପରି ଶାନ୍ତିପ୍ରିୟ ରାଜ୍ୟରେ ଏପରି ଗଣ୍ଡଗୋଳ ଗ୍ରହଣୀୟ ନୁହେଁ।
(ସମ୍ବଲପୁରରୁ ପୱନ ତିୱାରୀ ଏବଂ ସଞ୍ଜୟ କୁମାର ଜେନାଙ୍କ ରିପୋର୍ଟ, ଓଟିଭି)
