LIVE TV
ଚାଲିଛି କାରଣ ଖୋଜା । କାହିଁକି ଘଟିଲା ବାହାନଗା ଟ୍ରେନ୍ ଟ୍ରାଜେଡି ? କେଉଁଠି ରହିଲା ତ୍ରୁଟି ? କିଏ ଏଥିପାଇଁ ଦାୟୀ ? ଦୁର୍ଘଟଣା ପଛରେ ଅଛି କି ଅପରାଧିକ ଷଡ଼ଯନ୍ତ୍ର ? ଏଭଳି ଅନେକ ଦିଗ ଏବଂ ଅନେକ ଅସମାହିତ ପ୍ରଶ୍ନର ଆରମ୍ଭ ହୋଇଛି ଉତ୍ତର ଖୋଜା । ରେଲୱେ ବୋର୍ଡର ସୁପାରିସ ପରେ ଆଜି କେନ୍ଦ୍ରୀୟ ତଦନ୍ତକାରୀ ସଂସ୍ଥା ସିବିଆଇ ବାଲେଶ୍ୱରରେ ପହଞ୍ଚିଛି । ଏସବୁ ଭିତରେ ବାହାନଗା ରେଳ ଷ୍ଟେସନର ରେଲ ଟ୍ରାକରୁ ତଦନ୍ତ ଆରମ୍ଭ କରିଛନ୍ତି କମିଶନ ଅଫ୍ ରେଲୱେ ସେଫ୍ଟି ସିଆରଏସ ।
Also Read
ସିଆରଏସ ମୁଖ୍ୟ ଶୈଳେଶ ପାଠକ ଦୁର୍ଘଟଣାସ୍ଥଳରେ ସ୍ଥିତି ଅନୁଧ୍ୟାନ କରିଛନ୍ତି । ଏହାପରେ ଷ୍ଟେସନର ସିଗ୍ନାଲ ରୁମ୍ ଓ କଣ୍ଟ୍ରୋଲ ରୁମକୁ ଯାଇ ଯାଞ୍ଚ କରିଛନ୍ତି। ଏହି ତଦନ୍ତରେ ରେଲୱେ ସେଫଟି କମିଶନରଙ୍କ ନିକଟରେ ଯେକୌଣସି ଲୋକ ଚାହିଲେ ଉପସ୍ଥିତ ହୋଇ ତଥ୍ୟ ରଖିପାରିବେ । ଟ୍ରେନରେ ଯାତ୍ରା କରୁଥିବା ଯାତ୍ରୀ, ସାଧାରଣ ଜନତାଙ୍କ ସହ ଯେକୌଣସି ଲୋକ କମିଶନରଙ୍କ ନିକଟରେ ହାଜର ହୋଇ ତଥ୍ୟ ରଖିପାରିବେ ବୋଲି ଟୁଇଟ୍ କରିଛି ରେଲୱେ ।
ଅଧିକ ପଢ଼ନ୍ତୁ: କେମିତି ଦୁର୍ଘଟଣାଗ୍ରସ୍ତ ହେଲା କରମଣ୍ଡଳ ? ଗୋଟି ଗୋଟି କରି କହିଲେ କରମଣ୍ଡଳର ଲୋକୋ ପାଇଲଟ...
କେବଳ ସିବିଆଇ ନୁହେଁ, ବାହାନଗା ରେଳ ଦୁର୍ଘଟଣା ନେଇ ନିଜ ପକ୍ଷରୁ ଥାନାରେ ମାମଲା ରୁଜୁ କରିଛି ବାଲେଶ୍ବର ଜିଆରପି। ରେଲୱେର ଦାୟିତ୍ବହୀନତା ପାଇଁ ଦୁର୍ଘଟଣା ଘଟିଥିବା ଏତଲାରେ ଉଲ୍ଲେଖ କରାଯାଇଛି । ଏତଲା ପରେ ଲାଗିଛି ଆଇପିସି ଦଫା ୩୩୭, ୩୩୮, ୩୦୪-କ, ୩୪ । ତାସହ ଲାଗିଛି ରେଲୱେ ଆକ୍ଟର ଦଫା ୧୫୩, ୧୫୪ ଓ ୧୭୫। ଜିଆରପି ଡିଏସପି ରଞ୍ଜିତ ନାୟକଙ୍କୁ ଦିଆଯାଇଛି ମାମଲାର ତଦନ୍ତ ଦାୟିତ୍ବ। ସେପଟେ ରେଳ ବିଶେଷଜ୍ଞଙ୍କ ମତରେ, ରେଳ ଉପକରଣରେ ଟାମ୍ପରିଂ କରାଯାଇଥିବା ଆଶଙ୍କା ରହିଛି। ତେଣୁ ଏଭଳି ଅପରାଧିକ ଦିଗ ଉପରେ ସିବିଆଇ ତଦନ୍ତକୁ ତ୍ୱରାନ୍ୱିତ କରିପାରେ ।
ଲୋମଟାଙ୍କୁରା ଦୁର୍ଘଟଣା ପରେ ଗ୍ରାଉଣ୍ଡ ଜିରୋ ଅନୁଧ୍ୟାନ କରି ଏଭଳି ଢଙ୍ଗରେ ଚରମବାଣୀ ଶୁଣାଇଥିଲେ ପ୍ରଧାନମନ୍ତ୍ରୀ। ଆଉ ତା ର ୪୮ ଘଣ୍ଟା ଭିତରେ ବାଲେଶ୍ବରରେ ପହଞ୍ଚି ଦୁର୍ଘଟଣା ପଛର ସତ ଖୋଜୁଛି ସିବିଆଇ ।
- Reported by:
- KAPILENDRA PRADHAN , SOUMYA RANJAN SAHOO
