ମଉଳିଗଲା ପରିବାରର ଆଶା ନିଜ ପରିବାରର ରୋଜଗାରିଆ ପୁଅର ମୃତ ଦେହକୁ ଦେଖି ପରିବାର ଆଖିରୁ ଶୁଖୁନି ଲୁହ । ରାଜଗାଙ୍ଗପୁର ସ୍ଥିତ ଡାଲମିଆ ସିମେଣ୍ଟ କାରଖାନାରେ କୋଇଲା ହପର୍ ଭୁଶୁଡିବା ଘଟଣାକୁ ନେଇ ଗତ ତିନି ଦିନ ଧରି ସାରା ରାଜ୍ୟରେ ଚର୍ଚ୍ଚାରେ ରହିଥିଲା ସୁନ୍ଦରଗଡ଼ ଜିଲ୍ଲା ।
ଅଧିକ ପଢ଼ନ୍ତୁ :କିଏ ହେବ ରାଜ୍ୟ ବିଜେପି ସଭାପତି ?
Also Read
ଡାଲମିଆ ସିମେଣ୍ଟ ଲିମିଟେଡ଼୍ ରେ ଘଟିଥିବା ଅଘଟଣ ସମସ୍ତ ରାଜ୍ୟ ବାସୀଙ୍କୁ ମର୍ମାହତ କରିଥିଲା । ଡାଲମିଆ ସିମେଣ୍ଟ କମ୍ପାନୀର ଅବହେଳା କାରଣରୁ ଚାଲିଗଲା ତିନି ଜଣଙ୍କର ବହୁମୂଲ୍ୟ ଜୀବନ। ଅନ୍ୟପଟେ ଏହି ଘଟଣାରେ ରାଉରକେଲା ଫ୍ୟାକ୍ଟ୍ରି ଆଣ୍ଡ ବୋଏଲର ବିଭାଗ କମ୍ପାନୀ ଉପରେ ଆକ୍ସନ ନେଇଛି l କମ୍ପାନୀ କର୍ତ୍ତୃପକ୍ଷ ସୁରକ୍ଷା ସମ୍ବନ୍ଧିତ ସମସ୍ତ ବ୍ୟବସ୍ଥା ନ କରିବା ପର୍ଯ୍ୟନ୍ତ କେଭ୍ ଟିଭ୍ ପାୱାର ପ୍ଲାଣ୍ଟ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଛି l ଅନ୍ୟପଟେ ଦୀର୍ଘ ୪୦ ଘଣ୍ଟା ଅପେକ୍ଷା ପରେ କୋଇଲା ପାହାଡ ତଳୁ ଉଦ୍ଧାର ହୋଇଛି ୩ ଶ୍ରମିକଙ୍କ ମୃତଦେହ । ଘରର ରୋଜଗାରିଆ ପୁଅ ଜୀବିତ ନା ମୃତ ଜାଣିବା ପାଇଁ ଚାହିଁ ବସିଥିଲେ ପରିବାର ।
ଶେଷରେ ତିନି ଦିନ ଧରି ଲାଗିରହିଥିବା ସସପେନ୍ସର ଆଜି ଅବସାନ ଘଟିଛି । କିନ୍ତୁ, ଉଦ୍ଧାର ପରେ କେହି ମଧ୍ୟ ଜୀବିତ ନଥିବାରୁ ମଉଳି ଯାଇଛି ପରିବାରର ଆଶା l କମ୍ପାନୀ ମୁଖ୍ୟ ଗେଟ୍ ସମ୍ମୁଖରେ ପରିବାର ଲୋକେ ଦୀର୍ଘ ସମୟ ଧରି ଅପେକ୍ଷା କରିବା ସହ କାନ୍ଦ ବୋବାଳିରେ ଫାଟି ପଡୁଥିଲା ପୁରା ପରିବେଶ l
ଶେଷରେ ମୃତ ଶରୀରକୁ ରାଉରକେଲା ସରକାରୀ ଡାକ୍ତରଖାନାକୁ ପୋଷ୍ଟମର୍ଟମ ପାଇଁ ନିଆ ଯାଇଥିଲା l ତେବେ କିଛି ସମୟ ପାଇଁ ସ୍ଥାନୀୟ ଲୋକ ଓ ପୋଲିସ ମଧ୍ୟରେ ଧସ୍ତାଧସ୍ତି ପରିସ୍ଥିତି ସୃଷ୍ଟି ହୋଇଥିଲା l କ୍ଷତିପୂରଣ ଦାବିରେ ଅଡି ବସିଥିଲେ ପରିବାର ଲୋକେ l ଏ ଘଟଣା ପୁରା ସହରରେ ଶୋକର ଛାୟା ଖେଳାଇଦେଇଛି l
ମୃତକଙ୍କ ପରିବାରକୁ କ୍ଷତିପୂରଣ ଦେବାକୁ ଘୋଷଣା କରିଛି କମ୍ପାନୀ । ପରିବାରରୁ ଜଣଙ୍କୁ ଡାଲମିଆ ସିମେଣ୍ଟରେ ଚାକିରି ପାଇଁ ମଧ୍ୟ ପ୍ରତିଶ୍ରୁତି ମିଳିଛି । ଅନ୍ୟପଟେ ଫ୍ୟାକ୍ଟ୍ରି ଆଣ୍ଡ ବଏଲର୍ ବିଭାଗ ପକ୍ଷରୁ ଡାଲମିଆ ସିମେଣ୍ଟର କେପି ପାୱାର୍ ପ୍ଲାଣ୍ଟ ବନ୍ଦ ପାଇଁ ନିର୍ଦ୍ଦେଶ ଦିଆଯାଇଛି l ଆଗକୁ ଯେଭଳି ଏପରିସ୍ଥିତି ନ ଉପୁଜେ ସେଥିପାଇଁ ଜିଲ୍ଲା ପ୍ରଶାସନ କମ୍ପାନୀ ଉପରେ କଡ଼ା ନଜର ରଖିଥିବା କୁହାଯାଇଛି l ତେବେ ରାଜଗାଙ୍ଗପୁର ବିଧାୟକ ରାଜନ ଏକ୍କା କମ୍ପାନୀର ଷ୍ଟ୍ରକଚର ଯାଞ୍ଚକୁ ନେଇ ପ୍ରଶ୍ନ ଉଠାଇଥିବା ବେଳେ, ସୁନ୍ଦରଗଡ଼ ଅତିରିକ୍ତ ଜିଲ୍ଲାପାଳ ଫ୍ୟାକ୍ଟ ଫାଇଣ୍ଡିଙ୍ଗ ପାଇଁ ତଦନ୍ତ ହେବ ବୋଲି ପ୍ରକାଶ କରିଛନ୍ତି l