LIVE TV
ହିତାଧିକାରୀଙ୍କ ଖାତାକୁ ପର୍ଯ୍ୟାୟ ପରେ ପର୍ଯ୍ୟାୟ କ୍ରମେ ସୁଭଦ୍ରା ଟଙ୍କା ଯାଉଛି। କିନ୍ତୁ, ସୀମା ବିବାଦରେ ଫସିଥିବା ସୀମାନ୍ତ ଅଞ୍ଚଳ କୋରାପୁଟ ଜିଲ୍ଲା କୋଟିଆର ଅନେକ ମହିଳା ଯୋଜନାରୁ ବଞ୍ଚିତ ରହିଛନ୍ତି । ସେମାନଙ୍କ ପାଖରେ ଦୁଇଟି ରାଜ୍ୟ ଆନ୍ଧ୍ର ଏବଂ ଓଡ଼ିଶାର ଆଧାର କାର୍ଡ ରହିଥିବାରୁ ଯାଞ୍ଚ ବେଳେ କାଟ୍ ଖାଇଯାଇଛି ସେମାନଙ୍କ ଆବେଦନ । କେମିତି ହଟିବ ସମସ୍ୟା, ସେଥିପାଇଁ ଅଣ୍ଟା ଭିଡ଼ିଛି ପ୍ରଶାସନ ।
ଫାଟୁସେନେରୀ ଓ ଉପର ଗଞ୍ଜେଇ ପଦର ଗାଁର ଅନେକ ମହିଳାଙ୍କୁ ସୁଭଦ୍ରା ଯୋଜନାରେ ସହାୟତା ନମିଳିବାର କାରଣ, ସେମାନଙ୍କ ନାଁରେ ରହିଛି ଦୁଇ ଦୁଇଟି ରାଜ୍ୟ ଅର୍ଥାତ୍ ଓଡ଼ିଶା ଓ ଆନ୍ଧ୍ର ପଞ୍ଚାୟତ ନାଁ ଥିବା ଆଧାର କାର୍ଡ । ସୁଭଦ୍ରା ଯୋଜନାରେ ଟଙ୍କା ପାଇବା ପାଇଁ ଏହି ପଞ୍ଚାୟତର ମହିଳାମାନେ ଆବେଦନ ତ କରୁଛନ୍ତି, ହେଲେ ଯାଞ୍ଚ ବେଳେ ନାଁ କଟିଯାଉଛି । ସୀମା ବିବାଦରେ ଛନ୍ଦି ହୋଇଥିବା ଏହି ସୀମାନ୍ତ ଗାଁର ମହିଳାମାନେ କିନ୍ତୁ ଟଙ୍କା ପାଇବାର ଆଶା ଛାଡ଼ିନାହାନ୍ତି ।
Also Read
ଅପରପକ୍ଷରେ ଅଙ୍ଗନବାଡ଼ି କର୍ମୀ ଘର ଘରକୁ ଯାଇ ମହିଳାଙ୍କୁ ଗୋଟିଏ ଆଧାର କାର୍ଡ ରଖି ଅନ୍ୟଟି କାଟି ଦେବାକୁ ବୁଝାଉଛନ୍ତି । ସୂଚନା ଅନୁସାରେ କୋଟିଆ ପଞ୍ଚାୟତର ଉଭୟ ତଳ ଓ ଉପର ଗଞ୍ଜେଇପଦର ସହ ବର୍ଣ୍ଣାପାଡୁ, ମାଡକାର, ଫଗୁଣସିନେରୀ, ଫାଟୁ ସିନେରୀ ଏବଂ ଡୋଲିଆମ୍ବ ଭଳି ୨୬ଟି ଗାଁରେ ୨ ହଜାର ୨୫୫ଜଣ ସୁଭଦ୍ରା ଆଶାୟୀ ଅଛନ୍ତି । ସେମାନଙ୍କ ମଧ୍ୟରୁ ୧୫୮୫ ଜଣ ଆବେଦନ କରିଥିବା ବେଳେ ୧୧୦୦ ଜଣ ପ୍ରଥମ କିସ୍ତି ପାଇ ସାରିଲେଣି । ତଥାପି ଅନେକ ମହିଳା ଏଯାଏଁ ଆବେଦନ ମଧ୍ୟ କରିନାହାନ୍ତି । ଏହାର କାରଣ ଆନ୍ଧ୍ରର ଆଧାରକାର୍ଡ ଦ୍ବାରା ଓଡ଼ିଶାରେ ପଞ୍ଜୀକରଣ ହୋଇପାରୁନାହିଁ । ଏହାସହ ସେମାନେ ଆନ୍ଧ୍ର ଯୋଜନାରୁ ବଞ୍ଚିତ ହୋଇଯିବା ଡରରେ ସେଠିକାର ଆଧାର କାର୍ଡ କଟିଯାଉ ବୋଲି ବି ଚାହୁଁନାହାନ୍ତି ।
ଅଧିକ ପଢନ୍ତୁ: ଓଡ଼ିଆ ସିନେମା ଜଗତର ମାଇଲଖୁଣ୍ଟ ଭେଟେରାନ ଉତ୍ତମ ମହାନ୍ତି
ଏହାସତ୍ତ୍ବେ କୋଟିଆ ସଦର ଅଞ୍ଚଳରେ ୧୧ ଶହରୁ ଅଧିକ ମହିଳା ନାଁ ପଞ୍ଜୀକରଣ କରି ଟଙ୍କା ପାଇଥିବା ଜଣାପଡିଛି । ବାକି ଥିବା ମହିଳା କିପରି ଆବେଦନ କରିବେ ଓ ସୁଭଦ୍ରା ଯୋଜନାରେ ସାମିଲ ହୋଇପାରିବେ । ତା'ର ସ୍ଥିତି ଅନୁଧ୍ୟାନ କରିବା ପାଇଁ ନିଜେ କୋରାପୁଟ ଜିଲ୍ଲାପାଳ କୋଟିଆକୁ ଯିବା ସହ ଏଥିପାଇଁ ଏକ ଟାସ୍କ ଫୋର୍ସ ଗଠନ କରାଯିବ ବୋଲି କହିଛନ୍ତି । ଅପରପକ୍ଷରେ ସୁଭଦ୍ରାର ପ୍ରଥମ କିସ୍ତିର ଚତୁର୍ଥ ପର୍ଯ୍ୟାୟ ଟଙ୍କା ବଣ୍ଟା ସରିଲାଣି ତଥାପି ସହାୟତା ମିଳିବାର ଆଶା ଛାଡ଼ିନାହାନ୍ତି କୋଟିଆ ପଞ୍ଚାୟତବାସୀ ।
