Bogus Ration Card : ସାଙ୍ଘାତିକ ଅଭିଯୋଗ ଆଣିଲେ ଯୋଗାଣ ମନ୍ତ୍ରୀ,ସ୍ୱାସ୍ଥ୍ୟ କାର୍ଡ ହାତେଇବା ପାଇଁ ରାସନ କାର୍ଡ ନେଇଥିଲେ ଅଯୋଗ୍ୟ ହିତାଧିକାରୀ

ଅଯୋଗ୍ୟ ହୋଇଥିଲେ ମଧ୍ୟ ରାଜନୈତିକ କ୍ଷମତା ମାଧ୍ୟମରେ କିମ୍ବା ମିଥ୍ୟା ତଥ୍ୟ ଦେଇ ରାସନ୍ କାର୍ଡ ହାତେଇଥିଲେ ଏଥର ହେଵ ଆକ୍ସନ୍ । ରାସନ କାର୍ଡକୁ ନେଇ ରାଜ୍ୟ ସରକାରଙ୍କ ବଡ ଘୋଷଣା । ପୂର୍ବରୁ ଚଞ୍ଚକତା କରି ଯେଉଁ ଅଯୋଗ୍ୟ ହିତାଧିକାରୀ ରାସନ ପାଉଥିଲେ ସେମାନଙ୍କ କାର୍ଡ କାଟିଥିଲେ ରାଜ୍ୟ ସରକାର । E-KYC ପ୍ରକ୍ରିୟା ଦ୍ୱାରା ପୂର୍ବରୁ ଧରା ପଡ଼ିଥିଲେ ଲକ୍ଷାଧିକ ଅଯୋଗ୍ୟ ହିତାଧିକାରୀ ।

ହିତାଧିକାରୀମାନେ E-KYC କରିବା ପାଇଁ ଚଳିତ ମାସ ୧୫ ତାରିଖ ପର୍ଯ୍ୟନ୍ତ ସମୟ ଧାର୍ଯ୍ୟ ହୋଇଛି । ଏହି ଅବଧି ୧୫ ତାରିଖ ପରେ ଆଉ ବଢିବନାହିଁ ବୋଲି ସୂଚନା ମିଳିଛି । ଯେଉଁ ଅଯୋଗ୍ୟ ହିତାଧିକାରୀ କାର୍ଡ ଫେରାଇବେ ନାହିଁ ତାଙ୍କ ପ୍ରତି ସରକାର କଠୋର ହେବେ । ବର୍ତ୍ତମାନ ପର୍ଯ୍ୟନ୍ତ ୩୭ ଲକ୍ଷ ୮୫ ହଜାର ୪୯୬ ଜଣ ହିତାଧିକାରୀ E-KYC କରିନାହାନ୍ତି । ଅପରପକ୍ଷରେ ବାକି ଥିବା ଅବଧି ଅର୍ଥାତ ୬ ଦିନ ଭିତରେ E-kyc କରିବାକୁ ପୁଣିଥରେ ଅପିଲ୍ କରିଛନ୍ତି ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ।

ଅବଧି ଶେଷହେବା ପୂର୍ବରୁ ଯେଉଁମାନେ E-kyc କରିବେ ନାହିଁ । ସେଗୁଡିକୁ ସରେଣ୍ଡର ବୋଲି ଧରି ନିଆଯିବ ଏବଂ ସେହି କାର୍ଡ ଗୁଡ଼ିକୁ କାଟି ଦିଆଯିବ । ତଥାପି ଯଦି ଅଯୋଗ୍ୟ ମାନେ କାର୍ଡ ନଫେରାଇବେ ସରକାର କଠୋର କାର୍ଯ୍ୟାନୁଷ୍ଠାନ ନେବେ ବୋଲି ମନ୍ତ୍ରୀ ଚେତାଇ ଦେଇଛନ୍ତି । ୬ଲକ୍ଷ ନୂଆ ହିତାଧିକାରୀ ରାସନ କାର୍ଡ ଆବେଦନ କରିଛନ୍ତି । ପୁରୁଣା ଅଯୋଗ୍ୟ କାର୍ଡ କାଟି ନୂଆ ଲୋକଙ୍କୁ ଯୋଡ଼ା ଯିବ ।

ପୂର୍ବ ସରକାରଙ୍କ ସମୟରେ ପ୍ରାୟ ୮ଲକ୍ଷ ଆୟକର ଦେଉଥିବା ଲୋକ ମଧ୍ୟ ସ୍ବାସ୍ଥ୍ୟ କାର୍ଡ ପାଇବା ପାଇଁ ରାସନ କାର୍ଡ ନେଇଥିବା ନେଇ ରିପୋର୍ଟ ଆସିଛି । ଏହାର ରିପୋର୍ଟ ମନ୍ତ୍ରୀଙ୍କର ହସ୍ତଗତ ହୋଇଛି । ଏ ନେଇ ଅଧିକାରୀ ମାନଙ୍କୁ ସର୍ଭେ କରିବା ପାଇଁ ନିର୍ଦ୍ଦେଶ ଦିଆଯାଇଛି । ସେହି କାର୍ଡ ଗୁଡ଼ିକ ମଧ୍ୟ କଟାଯିବ । ମନ୍ତ୍ରୀ ଆହୁରି କହିଛନ୍ତି, ଅଯୋଗ୍ୟ ହିତାଧିକାରୀ କାର୍ଡ ନେବା ନେଇ ଲିଖିତ ଅଭିଯୋଗ କଲେ ଆକ୍ସନ ନିଆଯିବ । ତେବେ ଚାକିରି କରିଥିବା ଏବଂ ଆୟକର ଦେଉଥିବା ୧୨ହଜାର ଅଯୋଗ୍ୟ ହିତାଧିକାରୀ ରାସନ କାର୍ଡ ଫେରାଇ ସାରିଲେଣି ।

ଅଧିକ ପଢନ୍ତୁ: ବାରବାଟୀ ବ୍ୟାଟଲ: ଟସ୍ ଜିତି ଇଂଲଣ୍ଡର ବ୍ୟାଟିଂ ନିଷ୍ପତ୍ତି