LIVE TV
ବେଡ୍ରେ ମୂଷା... ବେଡ୍ ତଳେ ବି ମୂଷା... ରୋଗୀ ମୁଣ୍ଡ ଉପରେ ବି ମୂଷା...। ଯୁଆଡ଼େ ଦେଖିଲେ ସିଆଡ଼େ ମୂଷା । ମେଡିକାଲକୁ ଯଦି ଆପଣ ରୋଗୀ ନେଇ ଯାଇଥିବେ ତେବେ ଏମିତି ଦୃଶ୍ୟ ନିଶ୍ଟୟ ଆପଣମାନେ ଦେଖିଥିବେ । ମେଡିକାଲରେ ପୁଣି ମେଞ୍ଚେ ମେଞ୍ଚେ ମୂଷା । ଗୋଟାଏ ଘଣ୍ଟା ମଧ୍ୟ ମୂଷାମାନଙ୍କ ମେଳରେ ଏହି ମେଡିକାଲରେ ବିତାଇବା କେତେ ଯେ କଷ୍ଟ ତାହା କେବଳ ଅନୁଭବୀ ହିଁ ବୁଝିପାରିବେ ।
କୋରାପୁଟ ସହିଦ ଲକ୍ଷ୍ମଣ ନାୟକ ମେଡିକାଲ କଲେଜ । ଏଠି ମୂଷା ଦାଉରେ ପୂରା ଅତିଷ୍ଠ ରୋଗୀ । ମୂଷାଙ୍କୁ ଦେଖି କର୍ତ୍ତୃପକ୍ଷ ଚିନ୍ତା ବି ବଢ଼ିବାରେ ଲାଗିଲାଣି । ଏଥିପାଇଁ କର୍ମଚାରୀ ମାନଙ୍କୁ ନିୟୋଜିତ କରାଯାଉଛି । ମେଡିକାଲରେ ଲାଗିଛି ୨୦ ଯନ୍ତା । ଯନ୍ତାରେ ମୂଷା ପଡ଼ିବାର କ୍ଷଣି ଅନ୍ୟତ୍ର ସ୍ଥାନକୁ ନେଇ ଛାଡ଼ି ଦିଆଯାଉଛି ।
Also Read
ଏ ପ୍ରସଙ୍ଗରେ ମେଡିକାଲ୍ କଲେଜର ଅଧିକ୍ଷକଙ୍କ କହିବା କଥା, ମୂଷା ଉପଦ୍ରବ ପୂର୍ବ ଅପେକ୍ଷା ଅଧିକ ବଢ଼ିଛି । ମୂଷା ଆସୁଥିବା ସ୍ଥାନ ଗୁଡିକୁ ମରାମତି କରି ବନ୍ଦ କରିବାକୁ ପୂର୍ତ୍ତ ବିଭାଗକୁ ଅବଗତ କରାଯାଇଛି । ହେଲେ ବିଭାଗ ଏହାକୁ ଏତେଟା ଗୁରୁତ୍ଵ ଦେଉ ନାହିଁ । ଫଳରେ ବାଧ୍ୟ ହୋଇ ମୁଷା ଯନ୍ତା ଲଗାଯାଇ ମୂଷା ଧରା ଯାଉଛି । ଆଗକୁ ଟେଣ୍ଡର ମାଧ୍ୟମରେ ମୂଷା ନିପାତ କରିବାକୁ ପ୍ଲାନ ହୋଇଛି ବୋଲି କହିଛନ୍ତି ଅଧିକ୍ଷକ ।
ତେବେ ଓଟିଭିରେ କିଛି ଦିନ ତଳେ ମେଡିକାଲ୍ କଲେଜର ଆଇସିୟୁ ଏବଂ ଡାକ୍ତରଙ୍କ ଚ୍ୟାମ୍ୱରରେ ମୂଷାମାନଙ୍କ ଏ ଉପଦ୍ରବ ନେଇ ଖବର ପ୍ରସାରଣ କରାଯାଇଥିଲା । ଯାହାଫଳରେ ଏବେ ଚେତିଛନ୍ତି କର୍ତ୍ତୃପକ୍ଷ । ହେଲେ ଆଗକୁ ସଚେତନ ସହ ସଫେଇକୁ ଗୁରୁତ୍ୱ ନ ଦେଲେ ମୂଷା ଉପଦ୍ରବ କମିବନି ବୋଲି ସାଧାରଣରେ ମତ ପ୍ରକାଶ ପାଇଛି ।
