ମାନ୍ୟବର... ମୁଁ ଆସିଗଲି... ଓଃ କି ଖୁସି। ଦୀର୍ଘ ୧୦ ବର୍ଷ ପରେ ଏଥର ବାଜି ପଲଟିଛି। ଦୁଧକା ଦୁଧ୍, ପାନିକା ପାନି... ଇଏ ଦେଖୁନ, ମୁଁ ପୁଣି କେନ୍ଦ୍ରାପଡ଼ା ଯାଉଛି। ରାସ୍ତାଘାଟ ସବୁ ବଦଳି ଯାଇଛି । ହଁ ବଦଳନ୍ତାନି କେମିତି ଗୋଟେ ଦଶନ୍ଧି ହେଲାଣି । ସେ ଦିନ ଜେଲକୁ ଯିବାବେଳେ କି ଲୋକ ଲୋ ବୋପା, କି ବାଡ଼ିଆ ପିଟା, କି ପଥର ଫିଙ୍ଗା। ଓଃ ସେ କଥା ମନେପଡ଼ିଲେ ଆଜି ବି ଏ ଦେହଟା ଶୀତେଇ ଯାଉଛି । କଥାରେ ଅଛି ପରା ଆଜି ତୋ ଦିନ, କାଲି ମୋର ବି ଦିନ ଆସିବ, ଏଇ ଦେଖ ଆଜି ମୋ ଦିନ ବି ଆସିଛି । ମୁଁ ମୋ ବାରିମୂଳକୁ ଯାଉଛି । କଟକଣା ହଟୁଛି, ଧୀରେ ଧୀରେ ହଟିବ । ପୂର୍ବପରି ପୁଣି ଆଶ୍ରମରେ ଗୋପୀମାନଙ୍କ ଗହଳି ଲାଗିବ । ମୁଁ ସାଜିବି ଆଣ୍ଠୁଆ ଗୋପାଳ । ଚାଲିବ ପୁଣି ମୋ ପଲଙ୍କ ସେବା । ଓଃ ସେ କଥା ମନେପଡ଼ିଲେ ଖାଲି କୁତୁ କୁତୁ ଲାଗୁଛି ତ ଆଉ । ହେ ଏ ନିଦଟା ଭାଙ୍ଗିଗଲା ।
ଏ କାଳ୍ପନିକ କାହାଣୀ ହୁଏତ ଆଉ କିଛି ଦିନ ପରେ ବାସ୍ତବ ରୂପ ନେଇ ପାରେ । କାରଣ କେନ୍ଦ୍ରାପଡ଼ାକୁ ଆଉ କିଛି ଦିନ ପରେ ଫେରିପାରନ୍ତି ସନ୍ତୋଷ ରାଉଳ ଓରଫ୍ ସାରଥି ବାବା । ତଥାକଥିତ ବାବା ସାରଥୀଙ୍କୁ କେନ୍ଦ୍ରାପଡ଼ା ବାରିମୂଳ ଯିବାକୁ ହାଇକୋର୍ଟ ସର୍ତ୍ତମୂଳକ ଅନୁମତି ପ୍ରଦାନ କରିଛନ୍ତି । ଅସୁସ୍ଥ ଭାଇଙ୍କୁ ଯାଇ ଦେଖା କରିବାକୁ ଏହି ସର୍ତ୍ତମୂଳକ ଅନୁମତି ଦେଇଛନ୍ତି କୋର୍ଟ । ୨ ମାସରେ କେବଳ ଥରେ କେନ୍ଦ୍ରାପଡ଼ା ବାରିମୂଳ ଯାଇପାରିବେ । ରାତିରେ କେନ୍ଦ୍ରାପଡ଼ାରେ ରହିପାରିବେନି କି ଆଶ୍ରମ ଯାଇପାରିବେନି ବୋଲି ହାଇକୋର୍ଟ କହିଛନ୍ତି।
Also Read
ସକାଳ ସାଢ଼େ ୫ରୁ ସନ୍ଧ୍ୟା ସାଢ଼େ ୫ଟା ମଧ୍ୟରେ ଭାଇଙ୍କୁ ଦେଖା କରିପାରିବେ ସନ୍ତୋଷ ରାଉଳ । ଏଥିପାଇଁ ପ୍ରଥମେ ଟ୍ରାଏଲ୍ କୋର୍ଟଙ୍କୁ ଜଣାଇବାକୁ ନିର୍ଦ୍ଦେଶ ଦେଇଛନ୍ତି ହାଇକୋର୍ଟ । ସେହିପରି ପୂର୍ବ ସର୍ତ୍ତ ଅନୁଯାୟୀ ୨ ଶହରୁ ଅଧିକ ଲୋକ ସମାଗମ ନ କରିବା କଟକଣା ବଳବତ୍ତର ରଖାଯାଇଛି । ଏହି ସର୍ତ୍ତ କୋହଳ କରିବାକୁ ସିଧାସଳଖ ହାଇକୋର୍ଟ ମନା କରିଛନ୍ତି । ପୂର୍ବରୁ କେନ୍ଦ୍ରାପଡ଼ା ନଯିବାକୁ ଓ ୨ ଶହ ଊର୍ଦ୍ଧ୍ବ ଲୋକ ସମାଗମ ନକରିବାକୁ ଜାମିନରେ ସର୍ତ୍ତ ରଖିଥିଲେ ହାଇକୋର୍ଟ ।