ଓଡ଼ିଶା ମାଟିରେ ପୁଣି ଥରେ ମାଡାମ୍ ପ୍ରେସିଡେଣ୍ଟ । କାଲି ପୁରୀରେ ହେବାକୁ ଥିବା ନୌସେନା ଦିବସରେ ମୁଖ୍ୟ ଅତିଥି ବନି ନୌବୀରଙ୍କ ଯୁଦ୍ଧ କୌଶଳର ଜଲୱା ଦେଖିବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ତା ପର୍ବରୁ ଶ୍ରୀମନ୍ଦିରର ଯାଇ ମହାପ୍ରଭୁଙ୍କୁ ଦର୍ଶନ କରିବେ । ଏହା ପୂର୍ବରୁ ଆଜି ଅପରାହ୍ଣରେ ଭୁବନେଶ୍ୱରରେ ପହଞ୍ଚିବା ପରେ ରାଷ୍ଟ୍ରପତିଙ୍କୁ କରାଯାଇଥିଲା ଭବ୍ୟ ସ୍ୱାଗତ ।
ପୁଣି ଓଡ଼ିଶାରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ... ମାଟିର ଝିଅଙ୍କ ଟିକିଏ ଝଲକ ପାଇଁ ରାଜଧାନୀରେ ନାହିଁନଥିବା ଉତ୍ସାହ... ସମୟ ଅପରାହଣ ଠିକ୍ ସାଢ଼େ ୪ଟା । ଭୁବନେଶ୍ୱର ଏୟାରପୋର୍ଟରେ ପହଞ୍ଚିଲା ବାୟୁସେନାର ସ୍ୱତନ୍ତ୍ର ବିମାନ । ବିମାନ ବନ୍ଦରରେ ମହାମହିମଙ୍କୁ ସ୍ୱାଗତ କରିଥିଲେ ରାଜ୍ୟପାଳ, ମୁଖ୍ୟମନ୍ତ୍ରୀ, ଭୁବନେଶ୍ୱର ମେୟର, ମୁଖ୍ୟ ଶାସନ ସଚିବ, ଡିଜିପି ପ୍ରମୁଖ ।
ସେଠାରେ ରାଷ୍ଟ୍ରପତି ସିଧାସଳଖ ଯାଇଥିଲେ ନୀଳାଦ୍ରି ବିହାର । ଯେଉଁଠି ପଣ୍ଡିତ ରଘୁନାଥ ମୁର୍ମୁଙ୍କ ପ୍ରତିମୂର୍ତ୍ତି ଉନ୍ମୋଚନ ସହ ନିକଟରେ ଥିବା ଉଦ୍ୟାନ ବୁଲି ଦେଖିଥିଲେ । ତା’ସହ ନିଜ ସଂପର୍କୀୟଙ୍କୁ ଭେଟିଥିଲେ ରାଷ୍ଟ୍ରପତି । ଏହାପରେ ଆଦିବାସୀ ଦେବସ୍ଥଳକୁ ଯାଇ ସେଠାରୁ ସିଧା ରାଜଭବନକୁ ଫେରିଛନ୍ତି । ଆସନ୍ତାକାଲି ଶ୍ରୀକ୍ଷେତ୍ର ପୁରୀରେ ଦିନତମାମ ରହିଛି ରାଷ୍ଟ୍ରପତିଙ୍କ କାର୍ଯ୍ୟକ୍ରମ ।
Also Read
ଅଧିକ ପଢନ୍ତୁ: କିଟି କିଟି ଅନ୍ଧାରିଆ ପାଇପ୍ରେ ୬୦ ରାତି! କେମିତି କାଟିଲେ ବୃଦ୍ଧ ..
କାଲି ସକାଳ ୯ଟାରେ ରାଷ୍ଟ୍ରପତି ଭୁବନେଶ୍ୱରରୁ ବାହାରି ସ୍ୱତନ୍ତ୍ର ହେଲିକପଟର ଯୋଗେ ପୁରୀ ଗସ୍ତ କରିବେ । ପ୍ରଥମେ ଶ୍ରୀମନ୍ଦିର ଯାଇ ମହାପ୍ରଭୁଙ୍କୁ ଦର୍ଶନ କରିବେ । ମା’ ବିମଳା ଓ ଲକ୍ଷ୍ମୀଙ୍କୁ ବି ଦର୍ଶନ କରିବେ ରାଷ୍ଟ୍ରପତି । ଏହି ଗସ୍ତ ପାଇଁ ସକାଳୁ କିଛି ଘଣ୍ଟା ପାଇଁ ସାଧାରଣ ଭକ୍ତଙ୍କ ପାଇଁ ଦର୍ଶନ ବନ୍ଦ ରହିବ । ମହାପ୍ରଭୁଙ୍କ ଦର୍ଶନ ପରେ ଗୋପବନ୍ଧୁ ଆୟୁର୍ବେଦ କଲେଜର ୭୫ତମ ପ୍ରତିଷ୍ଠା ଦିବସ ଓ ହୀରକ ଜୟନ୍ତୀ ସମାରୋହରେ ଯୋଗଦେବେ ମହାମହିମ ।
ଯେଉଁଠି ସାମିଲ ହେବେ ୮ଶହରୁ ଅଧିକ ଆଲୁମିନି । ସେଠାରୁ ମଧ୍ୟାହ୍ନ ୧୨ଟାରେ ପୁରୀ ରାଜଭବନ ଫେରି ଭୋଜନ କରିବେ ରାଷ୍ଟ୍ରପତି । ଅପରାହ୍ଣରେ ପୁରୀ ବ୍ଳୁ ଫ୍ଳାଗ୍ ବିଚରେ ଆୟୋଜିତ ନୌସେନା ଦିବସ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ସାମିଲ ହେବେ ମାଡାମ୍ ପ୍ରେସିଡେଣ୍ଟ । ଏଠାରେ ସଂଧ୍ୟା ୫ଟା ୪୫ ମିନିଟ ଯାଏଁ ନୌବୀରଙ୍କ ପରାକ୍ରମ ଦେଖିବେ ମହାମହିମ । ରାଷ୍ଟ୍ରପତିଙ୍କ ଗସ୍ତ ପାଇଁ ଟ୍ରାଫିକ କଟକଣା ଜାରି କରାଯାଇଛି ।
୫ ଦିନିଆ ଓଡ଼ିଶା ଗସ୍ତ କ୍ରମରେ ଆସନ୍ତା ୫ ତାରିଖରେ ଭୁବନେଶ୍ୱର ଓୟୁଏଟିର ୪୦ତମ ସମାବର୍ତ୍ତନ ଉତ୍ସବ ଯୋଗଦେବା ସହ ସେହିଦିନ ଭୁବନେଶ୍ୱରରେ ଜୁଡିସିଆଲ୍ କୋର୍ଟର ନୂଆ କୋଠାର ଉଦଘାଟନ କରିବେ ।