Telia Borei Fish Price: ଗୋଟିଏ ମାଛ ବିକି ୫୦ ହଜାର ପାଇଲେ ମତ୍ସ୍ୟଜୀବୀ

ମାଛ କରିଦେଲା ମାଲାମାଲ । ହଜାରେ କି ଦୁଇ ହଜାର ନୁହେଁ ଏକାଥରକେ ଦେଲା ୫୦ ହଜାର । ତେଲିଆ ବୋରେଇ ମାଛ ଦେଲା ୫୦ ହଜାର ଟଙ୍କା। ତେଲିଆ ବୋରେଇ ମାଛ ଦେଖିବାକୁ ଯେତିକି ବଡ଼ ଏହାର ଦାମ୍‌ ମଧ୍ୟ ସେତେ ଅଧିକା । ଏହି ମାଛର ମାଂସ ଠାରୁ ଏହାର ପୁଟିର ଢ଼େର୍ ଚାହିଦା ରହିଛି।

ଏଥିପାଇଁ ଲୋକେ ଏହାକୁ ନେବାକୁ ଚାହିଁ ରହିଥା'ନ୍ତି । ଗୁରୁବାର ପରାଦୀପରେ ଜଣେ ମତ୍ସଜୀବୀଙ୍କ ଜାଲରେ ପଡିଥିଲା ତିନୋଟି ତେଲିଆ ବୋରେଇ ମାଛ । ଯାହାକୁ ବିକ୍ରି କରି ଏବେ ସେ ଚର୍ଚ୍ଚାରେ ରହିଛନ୍ତି । ସମୁଦ୍ରକୁ ଯିବା ବେଳେ ପ୍ରତ୍ୟେକ ଟ୍ରଲର ମାଲିକ ଏବଂ ମତ୍ସ୍ୟଜୀବୀ ଚାହିଁଥା'ନ୍ତି ଯେ ସେମାନଙ୍କ ଜାଲରେ ତେଲିଆ ବୋରେଇ ପଡନ୍ତୁ । 

ଏହି ମାଛ ଯେଉଁ ମତ୍ସ୍ୟଜୀବୀଙ୍କ ଜାଲରେ ପଡିଥାଏ । ସେ ନିଜକୁ ଅତ୍ୟନ୍ତ ଭାଗ୍ୟଶାଳୀ ବୋଲି ଭାବନ୍ତି । ଏହି ମାଛର ପୁଟି ଔଷଧୀୟ ସାମଗ୍ରୀ ପ୍ରସ୍ତୁତିରେ ଦରକାର ହେଉଥିବାରୁ ଏହାର ଦାମ୍ ଅଧିକ । ବିଦେଶକୁ ଏହି ମାଛର ପୁଟି ଅଧିକ ରପ୍ତାନି କରାଯାଇଥାଏ । କୋଲକାତାରୁ ବ୍ୟବସାୟୀମାନେ ଆସି ଏହାକୁ ନେଉଛନ୍ତି ।

୫ କିଲୋରୁ ଅଧିକ ଓଜନର ତେଲିଆ ବୋରେଇ ପୁଟି କିଲୋ ପିଛା ୫୦ ହଜାର ଟଙ୍କା । ସେହିପରି ଛୋଟ ଓ ବଡ଼ ମାଛର ପୁଟି ପାଇଁ ଅଲଗା ଦର ରହିଛି। ଭେକ୍ଟି, ମାଛ ପୁଟି ମଧ୍ୟ ଅଧିକ ମୂଲ୍ୟରେ ବିକ୍ରି ହେଉଛି ।

କେବଳ କଞ୍ଚା ନୁହେଁ ଶୁଖିଲା ପୁଟି ମଧ୍ୟ ବେଶ୍ ଅଧିକା ଦାମ୍‌ରେ ବିକ୍ରି କରୁଛନ୍ତି ବ୍ୟବସାୟୀ । ଏହି ମାଛ ପୁଟି ସବୁ ଔଷଧୀୟ କାମରେ ଲାଗୁଛି। ଯେଉଁଥିପାଇଁ ଜାତୀୟ ଏବଂ ଅନ୍ତର୍ଜାତୀୟ ବଜାରରେ ଏହି ମାଛର ଚାହିଦା ଢ଼େର ଅଧିକା ।

ଅଧିକ ପଢ଼ନ୍ତୁ: ୧୬ ବର୍ଷ ପରେ ଆରମ୍ଭ ହେଲା ମୁଖ୍ୟମନ୍ତ୍ରୀଙ୍କ ଅଭିଯୋଗ ଶୁଣାଣି; କାନ୍ଦି କାନ୍ଦି କଷ୍ଟ ଜଣାଇଲେ ସୂର୍ଯ୍ୟକାନ୍ତ...