Elephant Conservation:ହାତୀ ସୁରକ୍ଷା ପାଇଁ ସରକାର ଆଣିବେ ସ୍ୱତନ୍ତ୍ର ନୀତି, ରିଜିଓନାଲ ଆକ୍ସନ ପ୍ଲାନ ପ୍ରସ୍ତୁତ କରିବ ବିଭାଗ

ଜନବସତିରେ ବୁଲୁଛି ହାତୀ । ଆଉ କେତେବେଳେ ଘରେ ପଶି ଦଳି ଦେଉଛି ଦନ୍ତା । ପୁଣି କେତେବେଳେ ଟ୍ରେନ୍ ଧକ୍କା କିମ୍ବା ବିଦ୍ୟୁତ୍ ଆଘାତରେ ହାତୀର ମୃତ୍ୟୁ ଘଟୁଛି । ଥମୁନି ହାତୀ-ମଣିଷ ସଂଘର୍ଷ। ମୁହାଁମୁହିଁ ହେବାରୁ ଯାଉଛି ଅନେକ ଜୀବନ। ହାତୀ-ମଣିଷ ଲଢେଇ ରୋକିବାକୁ ଭୁବନେଶ୍ୱରରେ ଅନ୍ତର୍ଜାତୀୟସ୍ତରୀୟ ମାନସମନ୍ଥନ। ୭ଟି ଦେଶର ପ୍ରତିନିଧିଙ୍କ ସହ ଯୋଗ ଦେଇଛନ୍ତି ଜଣାଶୁଣା ବିଶେଷଜ୍ଞ। କାହିଁକି ବଢୁଛି ହାତୀ ମଣିଷ ଲଢେଇ। କେମିତି ଏହାକୁ ରୋକାଯାଇପାରିବ। ସହର ମୁହାଁ ନହୋଇ କେମିତି ଜଙ୍ଗଲରେ ରହିବେ ହାତୀ ସେନେଇ ହେଉଛି ଆଲୋଚନା ପର୍ଯ୍ୟାଲୋଚନା।

ସେହିପରି ଏହି ଦିଗରେ କାମ କରିବାକୁ ରାଜଧାନୀ ଉପକଣ୍ଠ ଚନ୍ଦକାଠାରେ Center for Species Survival Asian Elephant ପ୍ରତିଷ୍ଠା କରିଛନ୍ତି ସରକାର। ଏହି ସଂସ୍ଥା ସରକାରଙ୍କୁ ଉପଦେଶ ଏବଂ ରିପୋର୍ଟ ଦେବ। ତାକୁ ଆଧାର କରି ସରକାର ତିଆରି କରିବେ ସ୍ୱତନ୍ତ୍ର ହାତୀ ନୀତି। ରିଜିଓନାଲ ଆକ୍ସନ ପ୍ଲାନ ପ୍ରସ୍ତୁତ କରିବ ବିଭାଗ। 

ରାଜ୍ୟରେ ଏବେ ପ୍ରାୟ ୨୧୦୦ରୁ ଅଧିକ ହାତୀ ରହିଛନ୍ତି। ସରକାରଙ୍କ ପାଇଁ ଏବେ ମୁଖ୍ୟ ଚାଲେଞ୍ଜ ସାଜିଛି, ହାତୀ-ମଣିଷ ଲଢେଇ। ଗତ ୧୦ ବର୍ଷରେ ଏଥିରେ ୯୦୦ ଜଣଙ୍କର ଜୀବନ ଯାଇଥିବା ବେଳେ ୭୫୦ ହାତୀ ପ୍ରାଣ ହରାଇଛନ୍ତି। ଯଦିଓ ସରକାର ବନ ସୁରକ୍ଷା ସମିତି, ଗଜ ସାଥୀ କାର୍ଯ୍ୟକ୍ରମ ଜରିଆରେ ସଚେତନ କରୁଛନ୍ତି। ହାତୀ କେମିତି ସହର ମୁହାଁ ନହେବେ, ସେଥିପାଇଁ ଜଙ୍ଗଲ ଭିତରେ ଅଧିକ ଖାଦ୍ୟ ଏବଂ ଜଳାଶୟର ବ୍ୟବସ୍ଥା କରାଯାଉଛି। ଆଗକୁ ଜଙ୍ଗଲରେ ଧାନ ଚାଷ କରିବାକୁ ବି ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ। ଯେଉଁଠି ଲଢେଇ ହେଉଛି ସଙ୍ଗେ ସଙ୍ଗେ ELEPHANT SQUAD, ରାପିଡ଼ ରେସପନ୍ସ TEAM ପହଂଚୁଛନ୍ତି। ଏ ବାବଦରେ ସର୍ଭିଲାନ୍ସ ପାଇଁ GPS, RADIO SCOLAR, AI CAMERA ବ୍ୟବହାର କରାଯାଉଛି।

ମଣିଷ-ହାତୀ ସହବସ୍ଥାନ ଅନ୍ତର୍ଜାତୀୟ କର୍ମଶାଳାକୁ ଆଜି ମୁଖ୍ୟମନ୍ତ୍ରୀ ଶୁଭାରମ୍ଭ କରିଥିବା ବେଳେ ଏହା ଦୁଇ ଦିନ ଧରି ଚାଲିବ।