Rivers Rising:ଲଗାଣ ବର୍ଷା ଫଳରେ ଉବୁଟୁବୁ ହେଉଛି ଉତ୍ତର ଓଡ଼ିଶା , ସୁବର୍ଣ୍ଣରେଖା ଫୁଲୁଥିବା ବେଳେ ବଢୁଛି ବୈତରଣୀ

ଲଗାଣ ବର୍ଷା ଫଳରେ ସୁବର୍ଣ୍ଣରେଖାରେ ଷଷ୍ଠ ଥର ବନ୍ୟା ଆଶଙ୍କା ସୃଷ୍ଟି ହୋଇଛି। ବସ୍ତା, ବାଲିଆପାଳ, ଜଳେଶ୍ୱର ଓ ଭୋଗରାଇ ଅଂଚଳ ପ୍ରଭାବିତ। ବିଭିନ୍ନ ଗାଁ ପାଣି ଘେରରେ ରହିଥିବାବେଳେ ନଦୀ କୂଳିଆ ଗାଁ ଗୁଡ଼ିକରେ ୪ ଫୁଟରୁ ଅଧିକ ଉଚ୍ଚର ପାଣି ପ୍ରବାହିତ ହେଉଛି । ଧାନ ଓ ପନିପରିବା ଚାଷ ବ୍ୟାପକ କ୍ଷତିଗ୍ରସ୍ତ ହୋଇଛି।

ଏପଟେ ବୈତରଣୀ ଜଳସ୍ତର ବି ବିପଦ ସଂକେତ ଉପରେ। ଯାଜପୁର ଜିଲ୍ଲାର ଦଶରଥପୁର ଓ କୋରେଇ ବ୍ଲକରେ ଦେଖାଦେଇଛି ବନ୍ୟା ସ୍ଥିତି। ସ୍ଥିତିକୁ ଦେଖି ଭଦ୍ରକ ଜିଲ୍ଲାରେ ଅଗ୍ନିଶମ ବାହିନୀର ଏକ ୯ ଜଣିଆ ଟିମ୍ ମୁତୟନ ହୋଇଥିବାବେଳେ ବାଲେଶ୍ବର ଜିଲ୍ଲାରେ ଗୋଟିଏ ୧୪ ଜଣିଆ ଟିମ୍ ନିୟୋଜିତ ହୋଇଛନ୍ତି । ଭୋଗରାଇ ଏବଂ ବାଲିଆପାଳରୁ ଆଉ ଦୁଇଟି ଟିମକୁ ମୁତୟନ କରାଯାଇଥିବା ସୂଚନା ମିଳିଛି ।

ସେପଟେ ଯାଜପୁର କାଣୀ ନଈରେ ଘାଇ । ବୈତରଣୀ ଶାଖା କାଣୀ ନଈରେ ୨୦ ଫୁଟର ଘାଇ ସୃଷ୍ଟି ହୋଇଛି । ଦଶରଥପୁର ଦରଗା ନିକଟରେ ଘାଇ ହୋଇଛି। ଫଳରେ ଗାଁରେ ପଶିଛି ବନ୍ୟାପାଣି। ଭୁସ୍ ଭୁସ୍ ହୋଇ ଗାଁରେ ବନ୍ୟାପାଣି ପଶୁଥିବା ଦେଖିବାକୁ ମିଳିଛି। ଘରେ ଘରେ ମଧ୍ୟ ପାଣି ପଶିଯାଇଛି । ଦଶରଥପୁର ବ୍ଲକର ୪ଟି ପଞ୍ଚାୟତ ଗୁରୁତର ଭାବେ ପ୍ରଭାବିତ ହୋଇଛି । ଲୋକମାନେ ଆତଙ୍କିତ ଅବସ୍ଥାରେ ରହିଛନ୍ତି।