BJD Conflict: ପୁଣି ଦେବାଶିଷ ସାମନ୍ତରାୟଙ୍କ ବିସ୍ଫୋରଣ, ନବୀନଙ୍କ ଅସୁସ୍ଥତା ନେଇ ପାଣ୍ଡିଆନଙ୍କୁ ନିଶାନା

ଦେବାଶିଷ ବିସ୍ଫୋରଣ, ବିଜେଡିରେ କମ୍ପନ। ରାଜ୍ୟ ରାଜନୀତିରେ ବଡ଼ ହଲଚଲ। ପୁଣି ପାଣ୍ଡିଆନଙ୍କ ଉପରେ ବର୍ଷିଲେ ବିଜେଡି ସାଂସଦ ଦେବାଶିଷ ସାମନ୍ତରାୟ। ନବୀନ ପଟ୍ଟନାୟକଙ୍କ ସ୍ବାସ୍ଥ୍ୟାବସ୍ଥା ସମ୍ପର୍କରେ ନଜଣାଇବାକୁ ନେଇ କଡ଼ା ନିଶାନା। ଦୈନିକ ଖବରକାଗଜକୁ ସାକ୍ଷାତକାରରେ ଦେବାଶିଷ ଦେଇଛନ୍ତି ଚାଞ୍ଚଲ୍ୟକର ବୟାନ। ନବୀନଙ୍କ ସ୍ବାସ୍ଥ୍ୟ ସମ୍ପର୍କରେ ରାଜ୍ୟବାସୀ କି ନେତାଙ୍କୁ ନଜଣାଇବା ପାଣ୍ଡିଆନଙ୍କ ବଡ ଭୁଲ। ଦଳ ପାଇଁ ବି କ୍ଷତି। ହସ୍ପିଟାଲରେ ଭର୍ତ୍ତି ହେବା ପରେ ଦଳୀୟ ନେତା ନବୀନଙ୍କ ସ୍ବାସ୍ଥ୍ୟାବସ୍ଥା ସମ୍ପର୍କରେ ଜାଣିଲେ। ଘରେ ଅସୁସ୍ଥ ହେବା ସମୟରେ କାହିଁକି ପାଣ୍ଡିଆନ୍ ଜଣାଇଲେ ନାହିଁ। ନବୀନ ବାବୁ ଓଡ଼ିଶାର ନେତା। ତାଙ୍କର ସବୁ ଖବର ରାଜ୍ୟବାସୀ ଓ ଦଳ ନେତା ଜାଣିବା ଦରକାର। ସେହିପରି ହସ୍ପିଟାଲରେ ନବୀନଙ୍କୁ ଭେଟିବା ପାଇଁ ଦଳୀୟ ନେତାଙ୍କୁ ନଛାଡିବା ଚର୍ଚ୍ଚା ଉପରେ ପ୍ରତିକ୍ରିୟା ରଖି ଦେବାଶିଷ କହିଛନ୍ତି ପାଣ୍ଡିଆନ୍ ଆଇ ଆମ୍ ଡାଉନ୍, ବଟ୍ ନଟ୍ ଆଉଟ୍' ବୋଲି କହିଥିବା ସତ ହୋଇଥିଲେ ଏହା ଅହଂକାରର ପରିଚାୟକ। ସେ ଜାଣିବା ଦରକାର ଓଡ଼ିଶା ପ୍ରତି ତାଙ୍କର ଅବଦାନ କି ସ୍ବପ୍ନ କିଛି ନାହିଁ। ଖବରକାଗଜକୁ ଦେଇଥିବା ଏହି ସାକ୍ଷାତକାରରେ ପାଣ୍ଡିଆନଙ୍କୁ ଦେବାଶିଷ ଭୈରବବାବୁ ବୋଲି ଉଲ୍ଲେଖ କରିଛନ୍ତି । ଏହି ଇଣ୍ଟରଭ୍ୟୁକୁ ନିଜ ସୋସିଆଲ୍ ମିଡିଆ ଏକ୍ସରେ ବି ସେୟାର କରିଛନ୍ତି ଦେବାଶିଷ ସାମନ୍ତରାୟ। ...

ଦେବାଶିଷ ସାମନ୍ତରାୟଙ୍କ ବୟାନକୁ ନେଇ ରାଜନୈତିକ ମହଲରେ ଚର୍ଚ୍ଚା ଆଲୋଚନା ଜୋର୍ ଧରିଥିବା ବେଳେ ପାଣ୍ଡିଆନଙ୍କ ପାଇଁ ପୁଣି ଓକିଲାତି କରିଛନ୍ତି ବିଜେଡିର କିଛି ନେତା। ସୁବାସ ସିଂ କହିଛନ୍ତି, ପାଣ୍ଡିଆନ୍ ଓ ପତ୍ନୀ ସୁଜାତା ନବୀନ ବାବୁଙ୍କ ପାଇଁ ଉତ୍ସର୍ଗୀକୃତ। ତାଙ୍କର ସେବା କିଏ କରିବେ ସେକଥା ନବୀନ ନିଷ୍ପତ୍ତି ନେବେ। ଏହାକୁ ନେଇ ମନ୍ତବ୍ୟ ଦେବା ନିନ୍ଦନୀୟ ଓ ଅପପ୍ରଚାର। ସୁଲତା ଦେଓ କହିଛନ୍ତି, ଆମକୁ ସବୁ କଥା ଜଣା ଯାଉଛି। ଦେବାଶିଷ କାହିଁକି ଏମିତି କହିଲେ ତାଙ୍କୁ ପଚାର। ଦେବାଶିଷଙ୍କ ମନ୍ତବ୍ୟକୁ ବ୍ୟକ୍ତିଗତ କହିବା ସହ ତା ଉପରେ ଦଳ ଓ ସୁପ୍ରିମୋ ନିଷ୍ପତ୍ତି ନେବେ ବୋଲି ସାଂସଦ ନିରଞ୍ଜନ ବିଶି କହିଛନ୍ତି। ...

ଦେବାଶିଷଙ୍କ ଅଭିଯୋଗ ଓ ଆକ୍ଷେପ ଉପରେ ପାଣ୍ଡିଆନଙ୍କ ପ୍ରତିକ୍ରିୟା ମିଳିନାହିଁ। ପୂର୍ବରୁ ୱାକଫ୍ ବିଲ ପ୍ରସଙ୍ଗରେ ବିଜେଡିର ଆଭିମୁଖ୍ୟକୁ ନେଇ ପାଣ୍ଡିଆନଙ୍କୁ ସମାଲୋଚନା କରିଥିଲେ ଦେବାଶିଷ। ଏବେ ନବୀନଙ୍କ ଅସୁସ୍ଥତା ପରେ ପାଣ୍ଡିଆନଙ୍କ ପୁନଃ ଆବିର୍ଭାବ। ଆଉ ବିଜେଡିରେ ପୁଣି ଥରେ ଅସନ୍ତୋଷ ଝଡ଼ ଦାନା ବାନ୍ଧୁଥିବାରୁ ଆଗକୁ ଏହା କି ରୂପ ନେବ ତାପରେ ନଜର।