LIVE TV
କିଟି କିଟି ଅନ୍ଧାର ରାତି। ରାସ୍ତା କଡ଼ରେ ଟ୍ରକ ଡାଲାରେ ଏକାକୀ ବସିଛନ୍ତି ପ୍ରଭୁ ଗଣନାଥ । ସିଏ ପୁଣି ହନୁମାନ ବେଶଧାରୀ ଗଣେଷ । ହାତରେ ଲଡୁ ନାହିଁ କି ପାଖରେ ଭକ୍ତ ନାହାନ୍ତି। ଏମିତିକି ଟ୍ରକ ଡ୍ରାଇଭର ବି ଫେରାର। ଖବର ନେବାରୁ ଜଣାପଡିଛି ଯେ, ତଥାକଥିତ ଭକ୍ତମାନେ ଠାକୁରଙ୍କ ପ୍ରତିମାକୁ ଏଇଠି ଛାଡ଼ିଦେଇ ଡିଜେ ପଛେ ପଛେ ଥାନାକୁ ଯାଇଛନ୍ତି। ଏ ଦୃଶ୍ୟ ଆମ ସଭ୍ୟ ସମାଜକୁ ଏତିକି କହିବାକୁ ଯଥେଷ୍ଟ ଯେ, ଆମେ ଆମକୁ ହିଁ ସମ୍ମାନ ଦେଇ ଶିଖିନେ। ଯାହାଙ୍କୁ ପୂଜା କରୁଛେ, ତାଙ୍କ ପ୍ରତି ନା ଭକ୍ତି ରହିଛି ନା ସମ୍ମାନବୋଧ। ଅଛି ତ କେବଳ ଶୋ’ ବାଜି।
Also Read
ଏମିତି ଦେଖିବାକୁ ମିଳିଛି ରାଜଧାନୀ ଭୁବନେଶ୍ବରରେ । ତଥାକଥିତ ବଡ଼ବଡ଼ିଆ ଲୋକଙ୍କ ସହର । ତମାଣ୍ଡୋ ଥାନା ଅଞ୍ଚଳ ଭଗବାନପୁର ମା’ ମଙ୍ଗଳା କ୍ଳବ ପକ୍ଷରୁ ପ୍ରଭୁ ଗଣନାଥଙ୍କ ପୂଜା ପାଇଁ ଆୟୋଜନ ହୋଇଥିଲା। ପୂର୍ବରୁ ଡିଜେ ପାଇଁ ବରାଦ୍ ବି ଦିଆ ସରିଥିଲା। ହେଲେ ଠିକ୍ ସମୟକୁ କମିଶନରେଟ୍ ପୁଲିସ୍ ଡିଜେ ବ୍ୟାନ କଲା ।
ଅଧିକ ପଢ଼ନ୍ତୁ: ଡାକ୍ତର ବେଶରେ ଶ୍ରୀଗଣେଶ, କଲେ ମୂଷିକର ଚିକିତ୍ସା
ତଥାପି ଆମାନିଆ କ୍ଲବ ପିଲା ଡିଜେ ବଜାଇଲେ। ଭସାଣୀ ଶୋଭାଯାତ୍ରାରେ ଧୁମ୍ ଡେଇଁଲେ। ପୋଲିସ ଏ ଖବର ପାଇବା ପରେ ଚଢାଉ କରିଥିଲା । ଗଣପତି ପୂଜା ଆୟୋଜନ କରି ଭାଣ୍ଡାମୀ କରୁଥିବା ପିଲାମାନେ ଛତ୍ରଭଙ୍ଗ ଦେଲେ । ପୋଲିସ ଆସିଲା ବେଳକୁ ଟ୍ରକ ଡାଲାରେ କେବଳ ଗଣେଶଙ୍କ ପ୍ରତିମା ଥିଲା, ଆଉ ଡିଜେ।
ପୋଲିସ DJ ଗାଡିକୁ ଥାନାରେ ଅଟକ ରଖିଲା। ଆଉ ସେବେଠୁ ଠାକୁରେ ଏଇଠି ଏମିତି ବସିଛନ୍ତି । ଆଉ ଏ କଥା ପ୍ରମାଣିତ ହୋଇଛି ଯେ, ଠାକୁରଙ୍କ ଅପେକ୍ଷା ପିଲେ ପୋଲିସକୁ ବେଶି ଭୟ କରୁଛନ୍ତି । କଥାଟା ଆପଣଙ୍କ ଲାଗି ସମାଲୋଚନା ଯୋଗ୍ୟ ହୋଇପାରେ । କିନ୍ତୁ ଆମେ ଯାହା ଦେଖିଲୁ ଆପଣଙ୍କୁ ତାହା ହିଁ କହିଲୁ।
ଡିଜେ ଗାଡିକୁ ସିଲ କରି ଥାନାକୁ ଆଣିଲା ତମାଣ୍ଡୋ ପୋଲିସ I କଟକଣା ସତ୍ତ୍ୱେ କାହିଁକି ଡିଜେ ବଜାଉଥିଲେ ସେନେଇ ଡିଜେ ମାଲିକଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ପୋଲିସ ପକ୍ଷରୁ କୁହାଯାଇଥିଲେ ବି ଖବର ପ୍ରସ୍ତୁତ କରିବା ବେଳକୁ ଠାକୁରେ ଭସାଣୀ ହୋଇଛନ୍ତି କି ନାହିଁ ସେ ନେଇ ତଥ୍ୟ ମିଳିପାରି ନାହିଁ ।
