CM Directs Tahsildars: ତହସିଲଦାରଙ୍କୁ ମୁଖ୍ୟମନ୍ତ୍ରୀଙ୍କ ତାଗିଦ୍, ଦୁର୍ନୀତିଗ୍ରସ୍ତଙ୍କୁ ବରଦାସ୍ତ କରିବିନି...

ଯେମିତି ବିଡିଓ କନଫରେନ୍ସରେ ଅଧିକାରୀଙ୍କୁ ତାଗିଦ କରିଥିଲେ, ସ୍ବଚ୍ଛତାର ପାଠ ପଢାଇଥିଲେ, ସମାନ ଢଙ୍ଗରେ ରାଜସ୍ୱ ଅଧିକାରୀଙ୍କ କର୍ମଶାଳାରେ କିଛି ଟାସ୍କ ସହ କିଛି ପରାମର୍ଶ ଦେଇ ତାଗିଦ୍ କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଗ୍ରାଉଣ୍ଡ ଜିରୋରେ ଲୋକଙ୍କ ସମସ୍ୟା ସମାଧାନ କରନ୍ତୁ, ଯେମିତି ଛୋଟ ଛୋଟ ଅଭିଯୋଗ ନେଇ କେହି ଭୁବନେଶ୍ୱର ନଆସୁ । ଆଉ ଜମି କିଣାବିକାରେ ସ୍ବଚ୍ଛତା ରଖ । ଏମିତି କିଛି ପରାମର୍ଶ ଦେଇଛନ୍ତି ମୁଖ୍ୟମନ୍ତ୍ରୀ । ରାଜସ୍ବ ମନ୍ତ୍ରୀ କହିଛନ୍ତି, ତହସିଲରେ ସାଧାରଣ ଲୋକଙ୍କୁ ଦିଅ ଭିଆଇପି ଟ୍ରିଟମେଣ୍ଟ । 

ବିଡିଓଙ୍କ ପରେ ତହସଲିଦାରମାନଙ୍କୁ ମୁଖ୍ୟମନ୍ତ୍ରୀଙ୍କ ତାଗିଦ । ସମୟ ଭିତରେ ଲୋକଙ୍କ ସମସ୍ୟା ସମାଧାନ କର । ଅଭିଯୋଗ ନେଇ ଯେମିତି କେହି ଭୁବନେଶ୍ୱର ନଆସନ୍ତୁ । ଜମିଜମା କାରବାର ବେଳେ ସ୍ବଚ୍ଛତା ରଖ । ଦୁର୍ନୀତିଗ୍ରସ୍ତ ଅଧିକାରୀଙ୍କୁ ବରଦାସ୍ତ କରିବେନି ମୋହନ ସରକାର । ରାଜସ୍ୱ ମନ୍ତ୍ରୀ କହିଲେ ତହସିଲ ଅଫିସକୁ କର ପିପୁଲ୍ ଫ୍ରେଣ୍ଡଲି । ଆଜି ଲୋକସେବା କନଭେନସନ ହଲରେ ଦୁଇ ଦିନିଆ ରାଜସ୍ବ ଅଧିକାରୀଙ୍କ କର୍ମଶାଳାରେ ଉପଜିଲ୍ଲପାଳ ଏବଂ ତହସିଲଦାରମାନଙ୍କୁ କିଛି ଏମିତି ଢଙ୍ଗରେ ଟାସ୍କ ଦେଇଥିଲେ ମୁଖ୍ୟମନ୍ତ୍ରୀ ଏବଂ ରାଜସ୍ୱ ମନ୍ତ୍ରୀ।

ଅଧିକ ପଢନ୍ତୁ: ରାଜ୍ୟରେ ଭୁଶୁଡ଼ି ପଡ଼ିଛି ଅର୍ଦ୍ଧ ନ୍ୟାୟିକ ବ୍ୟବସ୍ଥା ! ଚୌକି ପଡିଛି ଖାଲି, କିଏ ଦେବ ନ୍ୟାୟ ?

ମୁଖ୍ୟମନ୍ତ୍ରୀ କହିଥିଲେ ସରକାର ଆଉ ଲୋକଙ୍କ ଭିତରେ ବ୍ୟବଧାନ କମାଅ । ଗ୍ରାଉଣ୍ଡ ସ୍ତରରେ ଲୋକଙ୍କ ସମସ୍ୟା ଶୁଣି ସମାଧାନ କର। ଭୂମିହୀନଙ୍କୁ ପଟ୍ଟା ଦେବା ବ୍ୟବସ୍ଥା କର । ସରକାରୀ ଜମିକୁ ଜବରଦଖଲ ମୁକ୍ତ କର । ଶେଷ ଧାଡ଼ିରେ ଥିବା ଲୋକଙ୍କୁ ସେବା ଦେବାକୁ ତତ୍ପର ହୁଅ । ଦୁର୍ନୀତି ପ୍ରତି ସରକାରଙ୍କ ଶୂନ୍ୟ ସହନଶୀଳତା ନୀତିକୁ ଗୁରୁତ୍ୱ ଦିଅ । RI କିମ୍ବା ଭୂଲେଖକଙ୍କ ଭୁଲ୍ ପାଇଁ ମଧ୍ୟ ତହସିଲଦାର ଉତ୍ତରଦାୟୀ ରହିବେ । ଏହାସହ ମୁଖ୍ୟମନ୍ତ୍ରୀ କହିଛନ୍ତି, କିଛି କାମ ସଠିକ ଢଙ୍ଗରେ ହେଉନାହିଁ । ତହସିଲ ସ୍ତରରେ ଜମିଜମା ସମସ୍ୟାର ସମାଧାନ ହେଉନଥିବାରୁ ଅଦାଲତରେ ମାମଲା ବଢୁଛି । ତାର ସମାଧାନର ରାସ୍ତା ବାହାର କର ।

ଅନ୍ୟପଟେ ରାଜସ୍ବ ସେବା ସଠିକ୍ ଭାବେ ଲୋକଙ୍କ ପାଖରେ ପହଞ୍ଚାଇବାକୁ କର୍ମଶାଳାରେ ଗୁରୁତ୍ୱ ଦିଆଯାଇଛି । କର୍ଣ୍ଣାଟକ ରାଜସ୍ୱ ଢାଞ୍ଚାର ଉଦାହରଣ ଦେଇ ମୁଖ୍ୟ ସଚିବ କହିଛନ୍ତି, ସେଠାରେ ୭୦ ପ୍ରତିଶତ ବନ୍ଦୋବସ୍ତ ବ୍ୟବସ୍ଥାକୁ ଅଟୋମେଟିକ କରାଯାଇଛି । ଓଡିଶାରେ ବି ରାଜସ୍ବ ସେବା ସିଷ୍ଟମକୁ ରି-ଡିଜାଇନ କରିବାକୁ ହେବ । ସେଥିପାଇଁ ଏକ ଅନଲାଇନ୍ ସିଷ୍ଟମ କରିବେ ସରକାର । ଯେଉଁଥିରେ ରାଜସ୍ବ ବିଭାଗର ଅଧିକାରୀମାନେ ନିଜର ପରାମର୍ଶ ଦେଇପାରିବେ । ଏହାସହ ସବୁ ତହସିଲ ଅଫିସରେ ହେଲ୍ପ ଡେସ୍କ ରଖିବାକୁ ବି ନିର୍ଦ୍ଦେଶ ଦେଇଛନ୍ତି ମୁଖ୍ୟ ଶାସନ ସଚିବ ।

ବିପର୍ଯ୍ୟୟ ପରିଚାଳନାରେ ସଫଳତା, ବିଭିନ୍ନ ପ୍ରକଳ୍ପ ଏବଂ ଶିଳ୍ପ ପାଇଁ ଜମି ପ୍ରକ୍ରିୟାକୁ ତ୍ୱରାନ୍ବିତ କରିଥିବାରୁ ତହସିଲଦାରଙ୍କୁ ମଧ୍ୟ ପ୍ରଂଶସା କରିଛନ୍ତି ମୁଖ୍ୟମନ୍ତ୍ରୀ । ଅନ୍ୟପଟେ କୌଣସି ବି ତହସିଲରେ ଜଣେ ବି ଭୂମିହୀନ ଯେମିତି ନରହିବେ ସେଥିପ୍ରତି ଦୃଷ୍ଟି ଦେବାକୁ କୁହାଯାଇଛି ।

ଅଧିକ ପଢନ୍ତୁ: ଉନ୍ନତ ମାନର ଶୁଖୁଆ ବିକ୍ରି କରି ସ୍ବାବଲମ୍ବୀ ହେଉଛନ୍ତି ମହିଳା