Clean Bank: 'ଯଦି ଜାମିନରେ ଯିବାକୁ ଚାହୁଁଛ, ସକାଳୁ ଆସି ବ୍ୟାଙ୍କ ସଫା କର'

ଚର୍ଚ୍ଚାରେ ଓଡ଼ିଶା ହାଇକୋର୍ଟଙ୍କ ଜାମିନ ସର୍ତ୍ତ । ଜାମିନ ବଦଳରେ ବ୍ୟାଙ୍କରେ ସଫେଇ କରିବେ ଅଭିଯୁକ୍ତ । ପୂରା ଦୁଇ ମାସ ଯାଏଁ ବ୍ୟାଙ୍କ ପରିସରରେ ସଫାସଫି କରିବାକୁ ହେବ । ଏଭଳି ସର୍ତ୍ତ ରଖି ବ୍ୟାଙ୍କ ଠକେଇ ମାମଲାରେ ଜେଲରେ ଥିବା ଜଣେ ମହିଳାଙ୍କୁ ଜାମିନ ଦେଇଛନ୍ତି ହାଇକୋର୍ଟ । ଯଦି ସେ ସର୍ତ୍ତ ଅନୁସାରେ ସବୁଦିନ ସକାଳୁ ଆସି ବ୍ୟାଙ୍କ ପରିସରରେ ସଫେଇ ନକରନ୍ତି ତାହେଲେ ଜାମିନ ଖାରଜ କରାଯିବ ବୋଲି କୋର୍ଟ ସ୍ପଷ୍ଟ କରିଛନ୍ତି ।

ଅଧିକ ପଢନ୍ତୁ :କଲେଜ ଛାତ୍ରୀଙ୍କୁ ଦୁଷ୍କର୍ମ ପରେ ହତ୍ୟା ! ମିଳିଲା ଝୁଲନ୍ତା ମୃତଦେହ

ଅଭିଯୋଗ ଅନୁସାରେ, ଅଭିଯୁକ୍ତ ମନୋଜ୍ଞାନ ପଟ୍ଟନାୟକ ନିର୍ଦ୍ଦିଷ୍ଟ ସମ୍ପତ୍ତିକୁ ଏକାଧିକ ବ୍ୟାଙ୍କରେ ବନ୍ଧକ ରଖି ଲୋନ୍ ନେଇଥିଲେ  । କଟକ ଲିଙ୍କ ରୋଡ ଆଇସିଆଇସିଆଇ ବ୍ୟାଙ୍କରୁ ୩ଟି ପୃଥକ ଲୋନ ଆକାଉଣ୍ଟରେ ୧କୋଟି ୫ ଲକ୍ଷ ଟଙ୍କା ଋଣ କରିଥିଲେ । ପୂର୍ବରୁ ସମାନ ସମ୍ପତ୍ତିକୁ ଭୁବନେଶ୍ୱର ଅଶୋକ ନଗର ଇଣ୍ଡିଆନ ବ୍ୟାଙ୍କରେ ବନ୍ଧକ ରଖି ଲୋନ ନେବା ସହ ଏହାକୁ ପରିଶୋଧ କରିନଥିବା ଜଣାପଡ଼ିଥିଲା । 

କ୍ରାଇମବ୍ରାଞ୍ଚ ମାମଲାର ତଦନ୍ତ କରି ଅଭିଯୁକ୍ତ ମହିଳା ମନୋଜ୍ଞାନ ପଟ୍ଟନାୟକଙ୍କୁ ଗତ ଫେବୃଆରୀ ୫ ତାରିଖରେ ଗିରଫ କରିଥିଲା । ମହିଳାଙ୍କ ଜାମିନ ଆବେଦନର ବିଚାର କରି ହାଇକୋର୍ଟ କହିଛନ୍ତି, ଅଭିଯୁକ୍ତ ମହିଳା ସଂପୃକ୍ତ ବ୍ୟାଙ୍କରେ ଦୁଇ ମାସ ଧରି ସକାଳ ୮ଟାରୁ ୧୦ଟା ମଧ୍ୟରେ ସଫେଇ କରିବେ । ଯଦି ସର୍ତ୍ତ ପୂରଣ ନ କରନ୍ତି ତେବେ ତାଙ୍କ ଜାମିନ ଖାରଜ କରାଯିବ । ଅଭିଯୁକ୍ତଙ୍କ ଭିତରେ ସୁଧାର ଓ ସଂସ୍କାର ଆଣିବା ଉପରେ ଗୁରୁତ୍ୱ ଦିଆଯାଉଥିବା ବେଳେ ଓଡ଼ିଶା ହାଇକୋର୍ଟଙ୍କ ଏଭଳି ନିଆରା ସର୍ତ୍ତ ବେଶ୍‌ ଚର୍ଚ୍ଚାରେ ରହିଛି ।

ଅଧିକ ପଢନ୍ତୁ : ସେବାଶ୍ରମ ଉପରେ ପୋଲିସ ଓ ଶିଶୁ ସୁରକ୍ଷା ବିଭାଗର ଚଢାଉ