/odishatv-khabar/media/post_attachments/uploadimage/library/16_9/16_9_0/IMAGE_1747895038.jpg)
Boat capsized
କ୍ଷଣିକ ଭିତରେ ଉଜୁଡିଗଲା ଗୋଟିଏ ହସଖୁସିର ସଂସାର । ମାଛ ପାଇଁ ସବୁ ହସଖୁସିରେ ପାଣି ପଶିଗଲା । ଜୀବିତ ଅବସ୍ଥାରେ ଯାଇ ଶେଷରେ ମୃତ ଅବସ୍ଥାରେ ଫେରିଲେ । ଯାଇଥିଲେ ମାଛ ଆଣିବା ପାଇଁ, ମାଛ ଆଣିବା ପରେ ବିକ୍ରି କରି ନିଜ ପରିବାର ପ୍ରତିପୋଷଣ କରିଥାନ୍ତେ । ହେଲେ ସେ କଣ ଜାଣିଥିଲେ ଯେ, ସେହି ମାଛ ପାଇଁ ହିଁ ଚାଲିଯିବ ଜୀବନ । ସ୍ତ୍ରୀ ଓ ୨ ଛୁଆଙ୍କୁ ନେଇ ମାଛ ଧରିବାକୁ ଯାଇଥିଲେ । ହେଲେ ନା ଫେରିଥିଲେ ସ୍ତ୍ରୀ, ନା ଫେରିଥିଲେ ଛୁଆ । ଫେରିଥିଲା ତ ସେମାନଙ୍କ ମୃତଦେହ । ନିମିଷକେ ଛାରଖାର ହୋଇଗଲା ପୂରା ପରିବାର । ଜୀବିତ ବାପାଙ୍କ ପୂରା ଦୁନିଆ ଦୋହଲିଗଲା ।
ଅଧିକ ପଢନ୍ତୁ: ଡଙ୍ଗା ବୁଡି ୨ ଛୁଆ ମୃତ, ମା’ ନିଖୋଜ: ଅଳ୍ପକେ ବର୍ତ୍ତିଲେ ବାପା
ଏଭଳି ଏକ ହୃଦୟ ବିଦାରକ ଘଟଣା ଘଟିଛି ଦେବଗଡ ଜିଲ୍ଲାରେ । ଦେବଗଡ କୁଣ୍ଢେଇଗୋଳା ଥାନା ତଲେଇସର ନିକଟ ରେଙ୍ଗାଳି ଜଳଭଣ୍ଡାରରେ ମାଛ ଧରିବା ପାଇଁ ସପରିବାର ଯାଇଥିଲେ । ବିଳମ୍ବିତ ରାତିରେ ଦୁଇ ନାବାଳକ ପୁଅଙ୍କୁ ନେଇ ବାପା ଓ ମା’ ମାଛ ଧରିବାକୁ ଯାଇଥିଲେ । ମାଛ ଧରିବା ବେଳେ ଦୁର୍ଭାଗ୍ୟବଶତଃ ମାଛ ଧରା ଡଙ୍ଗାଟି ଓଲଟି ପଡିଥିଲା । ହେଲେ, ଅଳ୍ପକେ ବର୍ତ୍ତି ଯାଇଥିଲେ ବାପା । ଏଥିରେ ବୁଡି ଯାଇଥିଲେ ମା’ ଓ ଦୁଇ ପୁଅ । ଡଙ୍ଗା ବୁଡିବା ପରେ ବାପା ଗୋଟିଏ ପୁଅକୁ ଧରି କୂଳକୁ ଆସିଥିଲେ । କିନ୍ତୁ ପରେ ପୁଅ ମୃତ ଥିବା ଜାଣି ପାରିଥିଲେ । ମୃତ ଦୁଇ ଶିଶୁଙ୍କ ମଧ୍ୟରେ ଜଣେ ୬ ବର୍ଷର ଓ ଅନ୍ୟ ଜଣେ ୩ ବର୍ଷର । ତେବେ ମା’ ନିଖୋଜ ଥିବା ବେଳେ ଉଦ୍ଧାରକାଳୀ ଦଳ ପହଞ୍ଚି ନିଖୋଜ ମା’ଙ୍କୁ ଦୀର୍ଘ ସମୟ ଧରି ଖୋଜାଖୋଜି କରିବା ପରେ ତାଙ୍କ ମୃତଦେହ ମିଳିଥିଲା ।
/odishatv-khabar/media/agency_attachments/2025/07/30/2025-07-30t051037428z-screenshot-2025-07-30-at-104031-am-2025-07-30-10-40-38.png)

/odishatv-khabar/media/media_files/2025/09/22/khabar-advertise-banner-2025-09-22-13-15-01.jpeg)