Berhampur Municipal Corporation Meeting: BeMC ବୈଠକରେ ହୋହଲ୍ଲା; ମୁହାଁମୁହିଁ ହେଲେ ଦୁଇ କର୍ପୋରେଟର ଗୋଷ୍ଠୀ...

ବ୍ରହ୍ମପୁର ମହାନଗର ନିଗମ ବୈଠକରେ ହୋହଲ୍ଲା । ନବଗଠିତ ଷ୍ଟାଣ୍ଡିଂ କମିଟିକୁ ନେଇ ବୈଠକରେ ପ୍ରବଳ ହୋହଲ୍ଲା ଓ ପାଟିତୁଣ୍ଡ ହୋଇଛି । ଦୁଇ କର୍ପୋରେଟର ଗୋଷ୍ଠୀ ମଧ୍ୟରେ ପ୍ରବଳ ପାଟିତୁଣ୍ଡ ପରେ ବୈଠକ ଅଧାରୁ ଉଠି ପଳାଇଲେ ମେୟର ଓ କମିଶନର । ପରେ ବିଇଏମସି ଅଫିସ ମୁଖ୍ୟ ଫାଟକ ଆଗରେ କର୍ପୋରେଟର ଧାରଣା ଦେଇଥିବା ବେଳେ, ସେପଟେ କିନ୍ତୁ ମେୟର କହିଛନ୍ତି ସବୁ ସମସ୍ୟାର ସମାଧାନ ହେବ ।

ବ୍ରହ୍ମପୁର ମହାନଗର ନିଗମ ବୈଠକରେ ହୋହଲ୍ଲା। ମୁହାଁମୁହିଁ ହେଲେ ଦୁଇ କର୍ପୋରେଟର ଗୋଷ୍ଠୀ । ଉଠି ଚାଲିଗଲେ ମେୟର, କମିଶନର୍, ଅଧାରେ ବନ୍ଦ ବୈଠକ । ମୁଖ୍ୟ ଫାଟକ ଆଗରେ ଧାରଣା ଦେଲେ କର୍ପୋରେଟର୍ । ଆଜି ବ୍ରହ୍ମପୁର ମହାନଗର ନିଗମର ଷ୍ଟାଣ୍ଡିଂ କମିଟି ବୈଠକ ବେଳେ ଦେଖିବାକୁ ମିଳିଥିଲା ଏଭଳି ହାଇଡ୍ରାମା । ଗତ କିଛି ଦିନ ତଳେ କର୍ପୋରେଟର ମାନଙ୍କ ମଧ୍ୟରେ ଫାଟ ଦେଖିବାକୁ ମିଳିଥିବା ବେଳେ, ଆଜିର ବୈଠକରେ ଉଗ୍ରରୂପ ନେଇଥିଲା ବିବାଦ । ନବଗଠିତ ଷ୍ଟାଣ୍ଡିଂ କମିଟିକୁ ନେଇ ପ୍ରଶ୍ନ ଉଠାଇବା ସହ, ସଫେଇ ବ୍ୟବସ୍ଥାକୁ ନେଇ ବର୍ଷିଥିଲେ କର୍ପୋରେଟର ।

ଅଧିକ ପଢ଼ନ୍ତୁ: ମୋଦିଙ୍କ ସମ୍ବୋଧନ: କହିଲେ-ସମ୍ଭାବନାର ଭୂଖଣ୍ଡ ଓଡ଼ିଶା

ଏପରକି କିଛି କର୍ପୋରେଟର ସିଧା ସଳଖ କମିଶନରଙ୍କୁ ଅଙ୍ଗୁଳି ନିର୍ଦ୍ଦେଶ କରିଥିଲେ । ଯାହାକୁ ନେଇ ବୈଠକ ଅଧାରୁ କମିଶନର ଓ ମେୟର ଉଠି ଚାଲିଯାଇଥିଲେ। ପରେ କିଛି କର୍ପୋରେଟର ମହାନଗର ମୁଖ୍ୟ ଫାଟକ ବନ୍ଦ କରି ଧାରଣା ଦେବା ସହ ଗୋ-ବ୍ୟାକ୍ ନାରା ଦେଇଛନ୍ତି । ଧାରଣାରତ କର୍ପୋରେଟରଙ୍କୁ ମେୟର ବହୁବାର ବୁଝାଇଥିଲେ ସୁଦ୍ଧା, ଧାରଣାରୁ ଉଠିନଥିଲେ କର୍ପୋରେଟର । ଅନ୍ୟପଟେ କମିଶନର କହିଛନ୍ତି, ତାଙ୍କ ପ୍ରତି ହୋଇଥିବା ଦୁର୍ବ୍ୟବହାର ପ୍ରସଙ୍ଗରେ ସେ ଉପସ୍ଥିତ ଅଧିକାରୀଙ୍କୁ ଜଣାଇଛନ୍ତି ।  

ସେପଟେ ମେୟରଙ୍କ ସପକ୍ଷବାଦୀ କାଉନସିଲର ନିର୍ଦ୍ଦିଷ୍ଟ ନାଁ ନେଇ ଏହା ପଛରେ ଜଣଙ୍କ ଇସାରା କାମ କରୁଥିବା କଥା କହିଛନ୍ତି। ତେବେ କିଛି ଦିନ ଧରି କୁହୁଳୁ ଥିବା ଦୁଇ କର୍ପୋରେଟର ଗୋଷ୍ଠୀଙ୍କ ଗଣ୍ଡଗୋଳ ନେଇ ଆଜି ସହରରେ ଚର୍ଚ୍ଚା ଧରିଛି ।

ଅଧିକ ପଢ଼ନ୍ତୁ: ଆଗେଇ ଆସିଲେ ପୁଞ୍ଜିପତି, ନିବେଶ କରିବେ ଲକ୍ଷାଧିକ କୋଟି