Bomb Threat: ରାଜଧାନୀରେ ସ୍କୁଲକୁ ବୋମାରେ ଉଡ଼ାଇ ଦେବାକୁ ଧମକ, ତଲାସୀ ଜାରି

ଜାତୀୟ ରାଜଧାନୀ ଦିଲ୍ଲୀର ଦୁଇଟି ସ୍କୁଲକୁ ମିଳିଛି ବୋମା ଧମକ । ସୋମବାର ସକାଳେ ରାଜଧାନୀର ଚାଣକ୍ୟପୁରୀ ଓ ଦ୍ୱାରକା ଅଞ୍ଚଳର ଦୁଇଟି ସ୍କୁଲକୁ ବୋମାରେ ଉଡାଇଦେବାକୁ ଧମକ ମିଳିଛି । ଏହା ପରେ ତତ୍‌କ୍ଷଣାତ୍ ସନ୍ଧାନୀ ଦଳ ପହଞ୍ଚି ସର୍ଚ୍ଚ ଅପରେସନ କରିଛି । ଚାଣକ୍ୟପୁରୀର ନାଭି ସ୍କୁଲ ଓ ଦ୍ୱାରକାର ସିଆରପିଏଫ୍ ସ୍କୁଲକୁ ଏହି ବୋମା ଧମକ ମିଳିଛି । 

ଏହି ଦୁଇ ସ୍କୁଲକୁ ଦୁଇଟି ପୃଥକ୍ ଇମେଲ ଜରିଆରେ ଧମକ ଆସିଥିଲା । ଏହା ପରେ ଛାତ୍ରଛାତ୍ରୀ ଓ ସ୍କୁଲ କର୍ମଚାରୀଙ୍କ ସୁରକ୍ଷାକୁ ଦୃଷ୍ଟିରେ ରଖି ପୋଲିସ୍ ପକ୍ଷରୁ ଖୋଜାଖୋଜି ହୋଇଥିଲା । ହେଲେ, କୌଣସି ସନ୍ଦେହଜନକ ଜିନିଷ ମିଳିନାହିଁ ବୋଲି ଦିଲ୍ଲୀ ପୋଲିସ୍ ଏକ ବିବୃତ୍ତିରେ କହିଛି । 

ପୋଲିସ୍ କହିଛି ଯେ, ଏହି ଧମକ ଆସିବା ପରେ କଣ୍ଟ୍ରୋଲ ରୁମ ଏବଂ ବରିଷ୍ଠ ପୋଲିସ୍ ଅଧିକାରୀଙ୍କୁ ସୂଚନା ଦିଆଯାଇଥିଲା । ଏହା ପରେ ସନ୍ଧାନୀ କୁକୁରକୁ ନେଇ ଯାଞ୍ଚ ହୋଇଥିଲା । ହେଲେ କୌଣସି ଅସ୍ୱାଭାବିକ ଦ୍ରବ୍ୟ ଠାବ ହୋଇନଥିଲା । 

ଚଳିତ ବର୍ଷ ପ୍ରାରମ୍ଭରେ ଦିଲ୍ଲୀ ଏନସିଆରରେ ଥିବା ସେଣ୍ଟ ଷ୍ଟିଫେନ୍ କଲେଜକୁ ଇମେଲ୍ ଯୋଗେ ବୋମା ଧମକ ଆସିଥିଲା । ନୋଏଡାର ଶିବ ନାଦାର ସ୍କୁଲ ଏବଂ ଦିଲ୍ଲୀର ଆଲକନ୍ ସ୍କୁଲକୁ ବୋମା ଧମକ ମିଳିଥିଲା । ଏହା ପରେ ଭୟଭୀତ ହୋଇ ସ୍କୁଲ ପ୍ରଶାସନ ପକ୍ଷରୁ ଛାତ୍ରଛାତ୍ରୀମାନଙ୍କୁ ଘରକୁ ପଠାଇ ଦିଆ ଯାଇଥିଲା । ଯଦିଓ ପରେ ଦିଲ୍ଲୀର ଆଲକନ୍ ସ୍କୁଲକୁ ମିଳିଥିବା ବୋମା ଧମକ ମିଥ୍ୟା ବୋଲି ଜଣା ପଡିଥିଲା ।

ଅଧିକ ପଢନ୍ତୁ: ୬ ଦିନ ପରେ ମିଳିଲା ନିଖୋଜ ଛାତ୍ରୀଙ୍କ ମୃତଦେହ, ସୁଇସାଇଡ୍‌ ନୋଟ୍‌ରେ ଏମିତି ଲେଖିଛନ୍ତି ସ୍ନେହା...